Ngaˈay Kita Tahadaˈoc Maˈorip

1. Mikiˈokay ci Yihofa pafeli kitaanan to tahadaˈocay a ˈorip, micalep misimsim tonini paira to maanan a epoc kitaanan hani?

MIKIˈOKAY ci Yihofa, o midofdofay Cingranan a tamdaw mamilifok to ‘tahadaˈocay a ˈorip.’ (Loma 6:23) Saharateratengen ita konini a sakiˈok ni Yihofa, wa mangalef tangongol ko olah i Cingranan. Haratengen hena, tangongolay ko olah no kakarayan Wama kitaanan, mansa pafeli kitaanan to midaˈocay a ˈorip, tahadaˈoc caka piliyas kita i Cingranan. Onini coko mitemerayto falocoˈ iso han?

2. Midaˈocay ˈorip a hatokel pairaay kitaanan to maanan a sapadama hani?

² Mikiˈokay ko Kawas pafeli kitaanan to tahadaˈocay a ˈorip, paˈicelay konini kitaanan itini sapalifet padadotoc mihadidi. Soˈlin sapipatayaw ko ˈada kitaanan, cowa ko tatalalikor kita. Misamaanay hani? O cecay lalangian kafanaˈan ita, ano tahira i patay a madimadi kita, o papatikolen ni Yihofa paˈorip kita, ira ko tokel ita tahadaˈoc caka patay. (Yohani 5:28, 29; 1 Korinto 15:55-58; Hipray 2:15) Hano ngaˈay kita pakasoˈlin, o tatahadaˈoc maˈorip kita hani? Nengnengen ko ilaenoay pina a lalangian.

CI YIHOFA TAHADAˈOCAY MATEREK

3. Hano ngaˈay pakasoˈlin kita, o ngangaˈay ci Yihofa tahadaˈoc paˈorip kitaanan? (ˈOlic 102:12, 24, 27)

³ Mafanaˈay kita tatahadaˈocen ni Yihofa paˈorip kita, samanen Pipowaran no ˈorip Cingra, o midaˈocay maˈorip a Kawas. (ˈOlic 36:9) Mitadtaday ko ilaenoay a sinael, nai ti:yaho materekayto ci Yihofa, tatahadaˈoc materek. ˈOlic 90:2 sowal sa ci Yihofa “nai ti:yaho tangasa i daˈoc” o Kawasto Kiso. ˈOlic 102 fedengan iraay ko kalecadan a pitadtad. (ˈOsien ko ˈOlic 102:12, 24, 27.) Roma i, pairasolay a Hapakuk sanay: ‘Yihofaaw, coko tahadaˈocay materek Kiso han? O Kawas ako, o Fangcalay Kiso, tahadaˈoc cowa ka patay Kiso.’ —Hapakuk 1:12.

4. Ano pasangaray kita cipinang to nai ti:yaho materekayto ci Yihofa a mahaenay harateng i, o haharatengen ko maanan? Tadtaden.

⁴ Ci Yihofa o ‘midaˈocay a Kawas,’ pasangaran nanay kiso cipinang to mahaenay a harateng han? (Isaya 40:28) Soˈlinay i, mahaenay ko piharateng no roma tamdaw. Sanay ci Iliho: ‘O tadamaanay ko Kawas, caay ko mamafanaˈ kita. Caay ko mamafilo ita a misaˈosi ko mihecaan Ningra.’ (Yopu 36:26) Kawra ano cowa ka cipinang kita to maanan a demak i, o mararawayto konini demak cowa ka saan. Tinakoen, alatek cowa ka cipinang to rakat no tedi a pakayraan, kawra paihkalay koni o cowa ka terek ko tedi han? Cowa! Malecaday, kita o tamdaw pakayni ci Yihofaan to materekay nai ti:yaho, tangasa i daˈoc sanay a harateng alatek cowa ka songilaˈ cipinang kita, kawra cowa ka ngaˈay kita eca pakasoˈlin to o tahadaˈocay ko Kawas. Ano cipinangay anca cowa ka cipinang kita, pakayni i demak no Misangaˈay a Tatapangan cowa ko mamafalic. (Loma 11:33-36) Iˈayaw no masadak ko cidal, ato romaroma tedi ato polong no dohaw i, materekayto ko Kawas. Ngaˈayay pakasoˈlinen, ‘tano ˈicelan ni Yihofa misangaˈ ko sera,’ iˈayaw no ‘micelak to kakarayan’ materekayto Cingra. (Yirimiya 51:15; Dmak 17:24) Iraayho ko maanan a lalangian ngaˈay pakasoˈlin kita to tatahadaˈoc kita maˈorip hani?

O PISANGAˈ KITAANAN O NGANGAˈAY TAHADAˈOC MAˈORIP

5. Ci Atam aci Ifa na iraay ko maanan a hatokel hani?

⁵ O misangaˈan ni Yihofa i fafekang no sera a pinaˈorip sahtoay citolasay ko ˈorip, edengan ko tamdaw ko mikiriwiˈay. Pafelian ni Yihofa ko tamdaw to mikiriwiˈay a hatokel, o ngangaˈay tahadaˈoc caka patay. Kawra patalipaˈelalan Ningra ci Atam: ‘Oya sapisaˈosi to ngaˈayay tatiihay a kilang, aka komaen kiso, samanen kakomaenan iso a romiˈad, o mamapatay kiso.’ (Satapangan 2:17) Ano midofdofay ci Atam aci Ifa ci Yihofaan isalakat i, cowa ko mamapatay. Mihaenay o matatodongay a sapateloc a sowal i, ano mitafoay cangra to madimadi, salikor o papakaenen ni Yihofa cangra to ‘heci no sakaˈorip a kilang,’ tatodong nonini milifokay cangra to sakiˈok ni Yihofa, wa ngaˈay ‘tahadaˈoc maˈorip.’b—Satapangan 3:22.

6-7. (1) O maanan a wacay paihkalay to na ngangaˈay ko tamdaw padadotoc maˈorip hani? (2) Itini faelohay hekal makalimay kiso palahad to maanan a kaolahan a demak? (Nengnengen ko coka.)

⁶ O ponoˈ no tamdaw ira ko taˈangayay a pitelian wangaˈ masoped ko emin a hakelong no ˈorip a miharatengan. Kawra mahapinangay no kakakosiya, o pisopedan no ponoˈ no tamdaw mikikakaay tonini ko nika adihay, hakelong no ˈorip ita cowa ko mamaemin misaka dademak. Tada kasemeran konini. O cecay a tilid 2010 mihecaan masowalay no mitepangan no kakako a casi, o pisopedan no ponoˈ no mita maedeng 250 emang GB ko adihay, ngaˈayay misoped to 300 emang a tatokian (mataˈlifay ko 300 miheca) a kamok no tilifi. Soˈlinay i, o pisopedan no ponoˈ no tamdaw cowa ka hatini aca alatek, kawra onini a mahapinangay mitadtaday to, misafaco ci Yihofa to ponoˈ no tamdaw iraay ko taˈangayay kitiraan pisopedan to lihaf, o tamdaw itini ˈapotoay 70 anca 80 miheca mimingay aca ko misaka dademakan.—ˈOlic 90:10.

⁷ Misangaˈ ci Yihofa kitaanan i, pairaay to ciˈicelay a kalim ita, saka tahadaˈocaw a maˈorip. Sowal no Fangcalay Cudad, ‘mitelian ni Yihofa i falocoˈ no tamdaw ko midaˈocay a kalim.’ (Patnakay 3:11) Mihaenay, o pinengneng ita to patay malecaday o ˈada. (1 Korinto 15:26) Ano ira ko pakidemay a adada no tireng ita, maedeng cowa ko papakihater saan, mitala to kapatay. Tocerid mikilimay kita to ising, komaenayho to cemel miadah to adada. Ano makilim ko matatodongay a pakayraan i, wa misaˈicel kita midipot to ˈorip no niyah. Roma i, ano mapatay ko salawina, ano hakowaayto ko mihecaan nangra, tada masomaday kita, hanaca o hatiniay a somad padotocay to cecay liyad alatek. (Yohani 11:32, 33) Haratengen hena, o ponoˈ ita ngangaˈay tahadaˈoc minanam, hanaca iraay ko kalim no falocoˈ to saka tahadaˈocaw a maˈorip, ano cowa ka ciharateng ko sidaˈitay a Misangaˈay a Tatapangan to saka tahadaˈocaw maˈorip no mita, hano mihaen misafaco ato misangaˈ Cingra to tamdaw hani? Adihayayho ko lalangian ita pakasoˈlin o ngangaˈay kita tahadaˈoc maˈorip. Sanay aca nengnengen ita, o nano demak ni Yihofa isalakat ato anini samaanay paihkal Cingra to cowa ka falic ko araaw no Niyah.

O ARAAW NI YIHOFA COWA KA FALIC

8. Pakayni to araaw ni Yihofa kitaanan, mikitini Isaya 55:11 mananam ita ko maanan?

⁸ Soˈlin mararaway ci Atam aci Ifa, parocokay to patay i polong a teloc, kawra cowa ka falic ko araaw ni Yihofa. (ˈOsien ko Isaya 55:11.) Kamayan makalim Cingra to madimadiay a tamdaw ngaˈay tahadaˈoc maˈorip. Hano mafanaˈ kita hani? Nengnengen ita pakayni sapalaˈosiaw ci Yihofa to araaw no Niyah na somowalay ato na midemakay to maanan.

9. Na mikiˈokay ko Kawas to maanan hani? (Taniil 12:2, 13)

⁹ Mikiˈokay ci Yihofa papatikol paˈorip to mapatayay a tamdaw, ho ira ko toki nangra milifok to midaˈocay a ˈorip. (Dmak 24:15; Titus 1:1, 2) Madimadiay a Yopu pakasoˈlinay, makalimay ci Yihofa patikol paˈorip to mapatayay a tamdaw. (Yopu 14:14, 15) Pairasolay a Taniil mafanaˈay, iraay ko tokel no tamdaw patikol maˈorip hanaca tahadaˈoc maˈorip. (ˈOlic 37:29; ˈosien ko Taniil 12:2, 13.) Itiniay i lintad ni Yis Yutaya a tamdaw mafanaˈay, wa ngaˈay ci Yihofa pafeli to midaˈocay a ˈorip i madimadiay midoko Cingranan a tamdaw. (Luka 10:25; 18:18) Roma i, kinapinaay ci Yis mihadak tonini a sakiˈok ni Yihofa, ano ci Yisto patikolan no Kawas paˈorip cingra.—Matay 19:29; 22:31, 32; Luka 18:30; Yohani 11:25.

10. O patikolay maˈorip a tinakoan isalakat misawacayay to maanan hani? (Nengnengen ko coka.)

¹⁰ Ci Yihofa o Pafeliay to ˈOrip i tamdaw a Kawas, iraay ko ˈicel patikol paˈorip to mapatayay a tamdaw. Pafelian Ningra ko pairasolay ci Iliya tonini a ˈicel, ho ngaˈay cingra patikol paˈorip to faˈinayan wawa no cecay maponengay fafahiyan i Carifat. (1 Hongti 17:21-23) Ikor, ya pairasolay ci Ilisa mitadiˈecay to ˈicel no Kawas patikol paˈorip to cecay faˈinayan wawa no fafahiyan i Sunim. (2 Hongti 4:18-20, 34-37) Oniya maˈoningay ato roma patikolay maˈorip a tinakoan misawacayay, iraay ko ˈicel ni Yihofa patikol paˈorip to mapatayay a tamdaw. Onini a ˈicel pafelianho Ningra ci Yis, mikitini midemakan ni Yis i fafekang no sera a kafahkaˈan mafanaˈ kita tonini. (Yohani 11:23-25, 43, 44) Nohatini, patikolayto ci Yis tayra i kakarayan, milifokay to ‘fadangalan i kakarayan ato i seraay.’ Mihaenay, ngangaˈay cingra palaˈosi to mihadakan no niyah a sakiˈok, oya ‘polong i tademay a tamdaw’ papatikol maˈorip sanay, ira ko toki milifok to tahadaˈocay a ˈorip.—Matay 28:18; Yohani 5:25-29.

11. Hano misaaliay kita to sapatefoc ngaˈ ngaˈay tahadaˈoc maˈorip hani?

¹¹ Hano pasalaten ni Yihofa ko kanonoˈan Ningra a wawa ci Yis misemsem a mapatay hani? Sanay ci Yis: ‘Tangongolay ko olah no Kawas to tamdaw, hai sanay pafeli to foseniˈan a wawa no Niyah, padama to polong mihakelongay cingranan a tamdaw eca ka malaˈafo, ao mamilifok to tahadaˈocay a ˈorip.​’ (Yohani 3:16) Pakayni sakangaˈay ita milifok to tahadaˈocay a ˈorip, hai sanay ko Kawas patafang to ˈorip no kanonoˈan a wawa Ningra malo sapatefoc, patado kitaanan palasawad to raraw. (Matay 20:28) Onini o kalimlaan a demak to sapalaˈosiaw no Kawas to araaw Ningra. Sanay ko tarokos ci Pawlo mitadtad: ‘O patay pakayniay i cecay tamdaw ko sakaira, patikol maˈorip ko mapatayay papakayni i cecay tamdaw ko sakaira. Pakayni ci Ataman, mamapatay ko polong a tamdaw anini, pakayni ci Kristoan, papatikol maˈorip ko polong a tamdaw noikor.’—1 Korinto 15:21, 22.

12. Sapalaˈosiaw tonini araaw no Niyah, samaanay ko pidemak ni Yihofa?

¹² Pasifanaˈan ni Yis ko nisawawaan micangacang to Hongti Kitakit no Kawas tayni ato palaˈosi to araaw no Kawas i fafekang no sera. (Matay 6:9, 10) O araaw no Kawas mahawpay o tamdaw aitini i fafekang no sera milayap to tahadaˈocay ˈorip. Sapalaˈosiaw tonini araaw, minilnilan ni Yihofa ci Yis malo Misiya Hongti no Hongti Kitakit, mipiliˈho i fafekang no sera to 144,000 a tamdaw tayra i kakarayan malacafay ci Yisan a matayal.—Paˈarawan 5:9, 10.

13. Midemakay ci Yihofa to maanan? Sasamaan ko pidemak iso hani?

¹³ Anini, misaˈopoay ci Yihofa to ‘taˈangayay ˈopo a tamdaw,’ hanaca pahatatanam cangranan, ho ngaˈay cangra malo finawlan no Hongti Kitakit Ningra. (Paˈarawan 7:9, 10; Yakop 2:8) Soˈlin maˈoripay cangra i matomesay ko kaciˈangian ato malalooday a hekal, kawra misaˈicelay cangra palahdaw to kihcod a ˈinteh, caay ka lecad to romaroma tamdaw pakayni i kitakit, kasafinacadan ato tekedan a ˈinteh a maliwasak cangra. Itini i sapatinako a tatodong pala kangkanganto nangra ko fonos. (Mika 4:3) O lalood no hekal ˈalomanay ko mapatayay a tamdaw, kawra onini taˈangayay ˈopo a tamdaw cowa pirienang tonini a lalood, misaˈicelayho padama to tamdaw mafanaˈ to Kawas ato araaw Ningra, paira to toki no tamdaw milifok to ‘soˈliˈlinay a ˈorip.’ (1 Timoti 6:19) Pakayni sapidopoaw to Hongti Kitakit no Kawas, alatek tahasiˈayaway cangra to pisafelit no paro no lomaˈ anca malahdaway ko sakaˈorip, kawra midimokosan ni Yihofa cangra, awaay ko kacangoˈotan nangra. (Matay 6:25, 30-33; Luka 18:29, 30) Onini a demak pakasoˈlinen ita, o Hongti Kitakit no Kawas o soˈlinay, hanaca wa padadotocen no Kawas pakayni tonini Hongti Kitakit palaˈosi to araaw Ningra.

TADA MAKAPAHAY A HATOKEL!

14-15. Na somowalay ci Yihofa to tahadaˈoc palahdaw to patay, onini a sakiˈok salikor sasamaan malaˈosi hani?

¹⁴ Mala hongtiayto no kakarayan a Hongti Kitakit ci Yis, papalaˈosien ningra ko polong mikiˈokan ni Yihofa. (2 Korinto 1:20) Mikitini 1914 miheca misatapang, padadotocay ci Yis milowid to ˈada. (ˈOlic 110:1, 2) Cato ka halafin, cingra ato 144,000 a tamdaw wa misongilaˈ mipadik to ˈada, palaˈafo to polong tatiihay a tamdaw.—Paˈarawan 6:2.

¹⁵ Ci Yis wa itini i Comaˈol Miheca Pikowan a tatokian patikol paˈorip to mapatayay tamdaw, hanaca padama to polong midofdofay ci Yihofaan a tamdaw miliyaw malefot ko tireng. Pakataˈlifay to salikoray sapalifet a tamdaw wa saˈosien ni Yihofa to o moecelay a tamdaw, cangra ‘mamilayap tonini a sera, rihaday ko ˈorip a tahadaˈoc.’ (ˈOlic 37:10, 11, 29) O ‘saikoray a ˈada o patay papalahdawen,’ itiya wa lipahakto kita!—1 Korinto 15:26.

16. Midoko kita ci Yihofaan o sakakaay a lalangian o maanan hani?

¹⁶ Mikitini Fangcalay Cudad, adihayay ko lalangian ita pakasoˈlin, iraay ko hatokel ita tahadaˈoc maˈorip. Soˈlin matomesay ko pasangar toniya salikoray a ˈawaled, kawra onini a hatokel padamaay kitaanan padadotoc madimadi ci Yihofaan. Kawra, o araaw no falocoˈ no mita midoko ci Yihofaan cowa ko pakayniay aca sapilifokaw to midaˈocay ˈorip. Madimadi kita ci Yihofaan ato ci Yisan, sakakaay a lalangian i samanen maolahay kita Cangranan. (2 Korinto 5:14, 15) Mahaenay a olah papadama kitaanan makalim mitodong cangranan, ciharatengayho tawlik pasowal to tao tonini hatokel ita. (Loma 10:13-15) Palahaden ita ko caay pisateked a harateng, hinapaladaˈ to tamdaw, mamalo kaolahanto ni Yihofa a tamdaw, tahadaˈoc malo widang Ningra.—Hipray 13:16.

17. Kita kahacecay tamdaw sasamaan ko pidemak hani? (Matay 7:13, 14)

¹⁷ Mamilifok kita to tahadaˈocay a ˈorip han? Maherekayto ci Yihofa paira to toki ita romakat i sakatayra i midaˈocay ˈorip a lalan. Nohatini, kita kahacecay a tamdaw mamisetek to falocoˈ materek tonini a lalan. (ˈOsien ko Matay 7:13, 14.) Noikor ano tahadaˈoc kita maˈorip i, sasamaan ko kaˈorip hani? Ilaenoay a lalakaw mamilengo tonini.