Maharatengayho Iso Han?

Misongilaˈan iso miasip ko lalakaw no Mikecolay han? Wa ngaˈay pacaˈof to laenoay salicay:

Tongalen ita ko toki masasowal ci Yihofaan, mitengil to sowal Ningra, ato miharateng to milingatay Cingranan a demak, mamalifok ko maanan a epoc hani?

Wa inaneng ko misaˈosian ita, mamalo sangaˈayay a singsi no Fangcalay Cudad, mamatongal ko tanektek no pakasoˈlin, papadadotoc matongal ko olah ci Yihofaan.—w22.01, saka 30-31 fiedac.

Nohatini minanam kita mitadiˈec ci Yihofaan ato minilnilan Ningra a tamdaw, wa ira ko maanan a epoc hani?

Nohatiniho minanamto kita mitadiˈec ci Yihofaan, pakasoˈlin sahtoay o sangaˈayay ko pakayraan Ningra a dademak, hanaca midofdof to sakayat no malohemay malitengay, midama to saˈosi nangra. Mihaen, itini i taˈangayay padiing a tatokian, o macadaay ita a sakayat soˈlin kafahkaˈan nengnengen, cowa ka tada matatodong, mamakahiho kita a midofdof.—w22.02, saka 4-6 fiedac.

Pasowalan no coyoh ci Cikariya ‘ci Cirupapil mitatiway to towiya’ o mamitadtad to maanan hani? (Cikariya 4:8-10)

Onini mapolosi o papasifanaˈ to finawlan no Kawas, onini a maˈaraway a fangcalay sefi soˈlin cowa ka samaan, kawra o mamalahci konini a fangcalay sefi, hanaca o mamatoor ko palinian ni Yihofa.—w22.03, saka 16-17 fiedac.

Sasamaan kita itini sasowalen malo ngaˈayay a taˈarawan hani? (1 Timoti 4:12)

Itini pitosil i, sasidaˈit ko sowal, mikangodo to tao. Itini saˈopo i, ano romadiw to sapahemek a radiw samacayen ko falocoˈ, ka picerid pacaˈof. Masasowal to cerid no romiˈad i, o soˈliˈlinay ko hasowal ato pakalalok to tamdaw, aka somowal to midokaˈay to tamdaw a sowal.—w22.04, saka 6-9 fiedac.

Masowalay i Taniil saka 7 fedengan a sepat taˈangayay a ˈaˈadopen (kitakit) a tahapinangan masaˈopoay i misowalan no Paˈarawan 13:1, 2 i tireng no cecay ˈaˈadopen, mikitini mahapinangay ita ko maanan?

Masowalay itini Paˈarawan 13 fedengan a ˈaˈadopen o mitaypiyawan nonini cowa ko cecay sifo anca ciˈicelay a kitakit tonini a hekal, tinakoen o Loma. O mitaypiyawan nira o halafinay to mikowan to tamdaw a ˈicel no polong a mirikecay.—w22.05, saka 9 fiedac.

Sasamaan ko pidemak ita, paihkalay to pakasoˈlinay ko niyah o masadafdafay ko Kawas?

Ano pakararaw ko tao kitaanan, hanaca tangongolay ko kadokaˈ ita, wa misaˈicel kita eca ka ˈinteh, ecato ka keter, patoroden ko demak i kamay ni Yihofa. Ci Yihofa o papalahdaw to pairaan no raraw a kihcod a roray.—w22.06, saka 10-11 fiedac.

Manilnilay itini saˈopo mitolon a faˈinayan salikaka mamiharateng to maanan hani?

O faˈinayan salikaka cowa ka ngaˈay tano satolon a misalof to salikaka anca milasil to demak. Citatodongay mitolon a faˈinayan salikaka cowa ka ngaˈay adihay ko sowal, mangalef itini satapang no saˈopo, o mamisinanot ko faˈinayan salikaka tonini. (Matay 6:7)—w22.07, saka 24-25 fiedac.

‘O tatiihay ko demak a tamdaw i, patikol maˈorip micada to sasawkit’ o manan ko tatodong hani? (Yohani 5:29)

Cowa ko papakayni iˈayaw no mapatay cangra midemakan a demak misaˈosi to raraw, ao mamitoor to ikor no patikol maˈorip cangra a harateng ato waywayan micada to sasawkit, itini lalomaˈ no cecay liyad tatokian o hahapinangen anca sasinanoten.—w22.09, saka 18 fiedac.

Itini 1922 miheca 9 folad a taykay, mihadakay ko salikaka ci Rosofo to maanan mikowaday to falocoˈ a sowal?

Itini Padaka Ohayo Sansuciyaw a pala misikayan a taykay, sowal no salikaka ci Rosofo: “Nengnengen, mikowanayto ko Hongti! O patadoay kamo cingranan pasayra i polong no hekal a milasil. Mihaenay ka pilasil, pilasil, pilasil to Hongti ato Hongti Kitakit Ningra!”—w22.10, saka 3-5 fiedac.

Misowalan no Isaya 30 fedengan ci Yihofa tano maanan tolo a pakayraan padama kitanan padadotoc mihadidi?

Mikitini toniya fedengan mananamay ita, ci Yihofa wa (1) misinanot mitengil ato pacaˈof to satolon ita, (2) pafeliay to sakayat kitaanan, (3) adihayay ko sapafeli a sapalemed kitaanan anini ato noikoran.—w22.11, saka 9 fiedac.

Hano mafanaˈ kita isaˈayaw o ˈOlic 37:10, 11, 29 na malaˈosiayto, wa miliyaw malaˈosi noikor?

Na iraay ko dipayalay a lintad no Israil, tinakoen o pikowan ni Solomon mahaenay. O sowal ni Tafiti matatodongay ko pitadtad to pakayraan itiya. Masowalay ni Yis ko lakoing noikor, hanaca misaka dademakay to saka 11 sinael a sowal. (Matay 5:5; Luka 23:43)—w22.12, saka 8-10, 14 fiedac.