Itini Kapadesan Milifok to Rihaday

1. O maanan ko sapafeli no Kawas a rihaday? Pakayni kitaanan iraay ko maanan a epoc hani? (Filipi 4:6, 7)

IRAAY ko cecay rihaday cowa ka fanaˈ ko ˈalomanay tamdaw, o sapafeli no Kawas a rihaday. Onini i kemoday no falocoˈ a rihaday, o tangongolay ko kalawidang to Kawas a tamdaw ko ngaˈayay milifok. Ano ira ko sapafeli no Kawas a rihaday kitaanan, wa ira ko rihakeday a harateng. (ˈOsien ko Filipi 4:6, 7.) Wa malo ngaˈayay a widang ita ko maolahay to Kawas a tamdaw, wa ngaˈayho matongal ko piingid to ‘pafeliay to rihaday a Kawas.’ (1 Tisalonika 5:23) Ano mafanaˈ kita, mitadiˈec ato midofdof to kakarayan Wama, soˈlin tahalifa to tatiihay a pakayraan, o sapafeli Ningra a rihaday kitaanan wa parihaday to falocoˈ ita, ecato ka cariraw.

2. Hano mafanaˈ kita to ngangaˈay kita milifok to sapafeli no Kawas a rihaday hani?

² Ano misiˈayaw kita to lifong, pades, lalood anca sapalak, onini katalawan a pakayraan, wa soˈlin kita milifok to sapafeli no Kawas a rihaday han? Itini mahaenay a pakayraan, madoloay kita a matalaw. Kawra, pakalalokan ni Yis ko nisawawaan ningra: ‘Aka masomad ko falocoˈ namo, aka matalaw.’ (Yohani 14:27) ˈAlomanay salikaka mitengilay to sowal ni Yis, soˈlin tahalifa to pakidemay a sapalifet, kawra mitadiˈec to sapadama ni Yihofa, milifokay cangra to dipayalay ato rihadayay falocoˈ. Tada mikowaday konini kitaanan!

ITINI KALIFONGAN A TATOKIAN MILIFOK TO RIHADAY

3. O lifong wa samaan palahdaw to rihaday no tamdaw hani?

³ O lifong taˈangayay ko pifalic to kaˈorip ita. Nengnengen ko 2019 a lifong samaanay mifiyor to ˈalomanay tamdaw. O cecay safanaˈ, mataˈlifay ko kalitosa a tamdaw somowalay itini kalifongan a tatokian cowa ka ngaˈay ko fotiˈ. Roma i, macariraway, matoleday, patelasay misaka dademak to epah ato cemel, mariˈangay a demak i paro no lomaˈ ato sakinasoˈotaw a pakayraan kalikiay a matongal. Itini kitiraan iso ano mifekaday ko lifong, sasamaan kiso miˈimer to macariraway a harateng, hanaca milifok to sapafeli no Kawas a rihaday hani?

4. Pakayni paˈayawan ni Yis to salikoray romiˈad a pakayraan, mafanaˈ tonini a sapairasol hano ngaˈay padama kitaanan milifok to rihaday hani?

⁴ Paˈayaway ci Yis itini salikoray romiˈad, ‘icowacowa’ wa ira ko lifong. (Luka 21:11) Mafanaˈ tonini a sapairasol wa padama kitaanan milifok to rihaday, misamaanay? Mifekad ko lifong i, cowa ko mamarawraw kita, samanen mafanaˈay to mamahecad to misowalan ni Yis ko kalingad no demak. Mihaenay, mamitengil kita to limoˈot ni Yis, pasowalay cingra to itiniay salikoray romiˈad maˈorip a tamdaw, sanay cingra: ‘Aka a marawraw.’—Matay 24:6.

5. (1) Mikitini Filipi 4:8, 9 ngaˈay mahapinang, misiˈayaw to lifong i mamicangacang kita to maanan? (2) Mitengil to milokoingan a Fangcalay Cudad iraay ko maanan a epoc tisowanan hani?

⁵ Mifekad ko lifong i, madoloay kita macariraw, anca marawraway. Fafahiyan salikaka ci Tesib iraay ko mahaenay a nalifetan. O faki ningra, o kaka ato ising mapatayay toniya kalifongan anini. Calemcemay cingra madenga ko niyah, anca padengaen ko matoˈasayto a wina no niyah. Matalawayho cingra ano malahdaw ko katayalan, awato ko payci sapiˈaca to kakaenen ato saesoy no lomaˈ. Malingaday ko kacalemcem ningra, telocto cato ka ala ko fafotiˈen. Kawra ikor patikolayto rihaday ko falocoˈ ni Tesi. Samaanay ko pidemak ningra hani? Patodicek ko pitolon ningra, micangacang to sapadama ni Yihofa parihaday cingranan, miharateng to tawlikay a demak. (ˈOsien ko Filipi 4:8, 9.) Pakayni milokoingan a Fangcalay Cudad, mitengilay cingra to pipasowal ni Yihofa cingranan. Sanay cingra: “O rihadayay a ngiha i lokoing misayaray to falocoˈ ako, papiharatengayho takowanan matomesay to siniˈada ci Yihofa.”—ˈOlic 94:19.

6. Micekiw ato mirienang to saˈopo iraay ko maanan a sapadama tisowanan hani?

⁶ Maedeng misasifoday ko lifong to nokaˈorip iso, kawra aka a papicaraen ko lifong tisowanan misongilaˈ micekiw ato mirienang to saˈopo. Itini cudad ita ato ika adihayay ko nalifetan no tamdaw, padamaay konini kitaanan miharateng, soˈlin misiˈayaw ko ˈalomanay salikaka to malecaday a pasangaray, kawra kamayan padadotoc madimadi ci Yihofaan. (1 Pitiro 5:9) Mirienang to saˈopo papadama tisowanan misinanot to pinengneng no Fangcalay Cudad, misamacay to tawlikay a demak, ngaˈayho padama tisowanan ira ko toki masasipakalalok to salikaka. (Loma 1:11, 12) Adihayen ko piharateng samaanay ci Yihofa padama to midokoay Cingranan a tamdaw mihadidi to adada, pakalowid to makokiˈay ato matoˈolay harateng, o mamatongal tanektek ko pakasoˈlin iso, wa ngaˈayho kiso pakasoˈlin papadamaen ni Yihofa kiso.

7. Mikitini i tarokos ci Yohanian mananamay iso ko maanan?

⁷ Ka picerid milinnak to salikaka. Kalifongan a tatokian, soˈlin ngaˈay kiso masasoˈaraw to salikaka, o mamalaliyas ko tireng alatek. Ano mahaenay, malecaday ko harateng iso to tarokos ci Yohanian. Makalimay ci Yohani sapiˈarawaw to ngaˈayay widang no niyah ci Kayusan, masasiˈayaw masasowal cingranan. (3 Yohani 13, 14) Kawra, mafanaˈay ci Yohani cecay liyad cowa ka ngaˈay cingra masasoˈaraw ci Kayusan, orato midemakay cingra to ngaˈayay demaken no niyah a demak, mitilid to tikami pafeli ci Kayusan. Ano caka ngaˈay masasoˈaraw kiso to salikaka i, ngaˈayay tanamen patingwa anca palay cangranan, anca i soci masasoˈaraw masasowal cangranan. Ano padadotoc kiso malalinnak to salikaka, cowato ko mamatoˈol, wa rihaday ko falocoˈ. Ano mikiriwiˈay a cariraw kiso, ngaˈayay misaali to sapadama no malohemay malitengay, micada to sapakalalok ato kaciharateng nangra.—Isaya 32:1, 2.

ITINI PIFEKAD NO PADES MILIFOK TO RIHADAY

8. O pades wa samaan palahdaw to rihaday iso alatek?

⁸ Ano tahalifa kiso to cedas, matodoh anca ˈatoray, soˈlin halafinayto a mataˈlif, kamayanho a macariraw kiso alatek. Ano malahdaw ko salawina anca hafay iso, o mamasomad kiso alatek, awaay ko padamaay a maketer. Kawra, mitaypiyaway koni to cangoˈotay kiso to pakasoˈlin anca pakidemay misaareteng to dafong cowa ka saan. O macadaay iso o pakidemay a sapalifet, o roma tamdaw o aira ko masofaway a harateng iso wa saan miharateng. (Yopu 1:11) Soˈlin itini pasangaray a pakayraan, wa ngaˈayho kiso milifok to rihaday. O maanan ko pakayraan hani?

9. Paˈayaway ci Yis to manan, ho misaday ko falocoˈ ita to mamifekad a pades?

⁹ Haratengen ko paˈayawan ni Yis mamifekad ko manan a demak. Harateng no ˈalomanay tamdaw tahadaˈocto cowa ko mamifekad ko pades i tireng no niyah sanay, kawra mafanaˈay kita mamalingad ko adihay no pades, hanaca o mamafiyor kita alatek. Pasowalan ni Yis ko nisawawaan, ˈayaw no ira ko salikoray romiˈad, wa ira ko ‘taˈangayay ˈatoray’ ato romaroma pades mifekad. (Luka 21:11) Paˈayawayho ci Yis mamatongal ko ‘mararaway a demak.’ Anini, o raraw, mariˈangay ato katalawan piˈodis soˈlinay a matongal. (Matay 24:12) ˈAlomanay madimadiay midoko ci Yihofaan a tamdaw na tahalifaay to pades. Cowa ka pasowal ci Yis, tahalifa kita to pades i, samanen cowa ka ciharateng ci Yihofa kitaanan. (Isaya 57:1; 2 Korinto 11:25) Awaay ko pinang to tatano kafahkaˈan a pakayraan ci Yihofa midipot kitaanan, paliyas to pades kitaanan, kawra papafeli Cingra to kihcod a saali no mita, padama kitaanan eca ka marawraw, milifok to rihaday.

10. Pakayni i pades talaˈayaw misaday, hano paihkalay to pakasoˈlinay kita ci Yihofaan? (Taneng 22:3)

¹⁰ Ano talaˈayaw kita mihalaka to sapisiˈayaw to kacalohan a pakayraan, ano mifekad sato ko pades i, wa madolo to rihaday ko falocoˈ. Kawra talaˈayaw misaday mitaypiyaway to cangoˈotay ko pakasoˈlin ita ci Yihofaan hokira? Cowa ka hatira. Soˈlinay i, talaˈayaw pakayni i pades a misaday, paihkalay koni to pakasoˈlinay kita to mamidimokos ci Yihofa kitanan. Misamaanay hani? Patalipaˈelalay ko Fangcalay Cudad kitaanan ka talaˈayaw misaday to mamifekad a pades. (ˈOsien ko Taneng 22:3.) O likakawa no Kawas marariday pakayni i casi, saˈopo no kasakopang ato salasil, patalipaˈelal kitaanan talaˈayaw misaday to macalohay a pakayraan.c Ano mitadiˈec kita ci Yihofaan, nohatini o mamitengil tonini a sapaini, eca ka pitala mifekadto ko pades ngaˈ itiya a midemak.

11. Mikitini nalifetan ni Makelite mananamay iso ko maanan?

¹¹ Nengnengen ko nalifetan no fafahiyan salikaka ci Makelite. I ngata no kitiraan ningra matodohay ko colin, milasilay ko sifo papiliyas to cilomaˈay. Samanen malecaday a tatokian ˈalomanay ko milaliway, maˈetengayto ko lalan, cato ka romakat ko paliding. Itiya, o fali miedefay ko kohtingay a ˈacefel, itini sanayto i paliding ci Makelite. Kao ngaˈayay, talaˈayaway cingra misaday hato ngaˈayay miliyas to katalawan. Ilalomaˈ no kafang ningra iraay ko cecay wito, mansa ngaˈay cingra mikitini i roma lalan a milaliw. Pakayni sakaecaˈaw ka moraraw i kacalohan a pakayraan, talaˈayaway to cingra parakat to paliding tonini a lalan. Samanen talaˈayaway misaday, hato madipotay ko ˈorip ni Makelite.

12. Hano mamidofdof kita to sakarihaked a sakayat hani?

¹² Sapipatikolaw to masieroday ko sifo, midipot to rihaked ita, palimoˈotay caka ngaˈay masadak to dadaya, misaali to cilomaˈay miliyas anca papidemak to pina a demak. Roma tamdaw cowa kakahi mihaen to demak, anca naˈon sanay eca ka pidemak, samanen tangoˈolay cangra mifalah to dafong no niyah. Kawra sasamaan ko pidemak no Krisciyang hani? Palimoˈotay ko Fangcalay Cudad kitaanan: ‘Pakayni i Tatapangan, ka pidofdof kamo to patirengan no tamdaw sapikowan a limasmas. Ano o hongtito, anca o ˈaˈideman, o dadofdofen namo maemin.’ (1 Pitiro 2:13, 14) Sapidipotaw to rihaked ita, o likakawa no Kawas mihadakay to pina sakayat. Marariday micada kita to sapatalipaˈelal, pasowalen ko malohemay malitengay to faelohay sapilinnak a pakayraan. Mihaen, itini macalohay a pakayraan, wa ngaˈayto cangra milinnak kitaanan. Mihaenay ko demak iso han? Pakayni miliyas to pades, malinah, milifok to sapadama to tahapadesay a dafong anca hacowa a tatokian, tano maanan a pakayraan padama to tao, macadaay ita ko milingatay a sakayat. Ano caka pitengil kita tonini a sakayat, o papaira to katalawan no ˈorip no niyah ato malohemay malitengay. Haratengen, onini madimadiay a tamdaw miceriday midipot kitaanan. (Hipray 13:17) Sanay ci Makelite: “Pakasoˈlinay kako, samanen mitengilay to sakayat no malohemay malitengay ato likakawa no Kawas, hato madipotay ko ˈorip ako.”

13. ˈAlomanay miliyasay to lomaˈ a salikaka samaanay milifok to lipahak ato rihaday no falocoˈ?

¹³ ˈAlomanay salikaka pakayni i pades, fodifod ato lalood, mapacieciay miliyas to lomaˈ. Kawra misaˈicelay cangra mananam to faelohay kitiraan, kalikiayho patikol to midokoay a tayal. Malecad i saka 1 hahekalan pakayniay i sapalak maliwasak tayra icowacowa a Krisciyang, padadotocay cangra ‘milasil to ngaˈayay lihaf no kimad no Kawas.’ (Dmak 8:4) Mitosilay a tayal padamaay cangranan misamacay to harateng i Hongti Kitakit no Kawas, eca ko haharateng sa to hakowaay ko pasangar no kaˈorip no niyah. Telocto, ngaˈayay cangra padadotoc lipahak ato rihaday ko falocoˈ.

TAHALIFA TO SAPALAK I MILIFOK TO RIHADAY

14. O sapalak wa samaan palahdaw to rihaday ita hani?

¹⁴ Adihayay a demak na ngangaˈay parihaday kitanan, kawra micadaay to sapalak, hato cowa ka ngaˈay kita midemak tonini a demak. Tinakoen, ngaˈay pasalat masasoˈaraw to salikaka, pakapapotal a mitosil, ngaˈay ko kaˈorip eca ka calemcem malepel no dimeng, pairaay to lipahak ita ato karenec. Kawra itini sapalak, awaayto ko pasalat ita midemak tonini a demak alatek, telocto calemcemayto kita alatek, cowa ka fanaˈ mamifekad ko maanan a demak noikor. Mahaen ko harateng matatodongay, kawra o maminaˈon kita, samanen sowal ni Yis o sapalak papalahdaw to pakasoˈlin no mihakelongay cingranan a tamdaw. (Yohani 16:1, 2) Mihaenay, ano tahalifa to sapalak samaan ko pidemak ita ngaˈ padadotoc rihaday ko falocoˈ hani?

15. Hano cowa ko mamatalaw kita micada to sapalak hani? (Yohani 15:20; 16:33)

¹⁵ Pasowalay ko Fangcalay Cudad kitaanan: ‘Polong sapikotodaw ci Kristo Yisan soˈliˈlin ko kaˈorip a tamdaw, o tatahacada to sapalak.’ (2 Timoti 3:12) Cecay faˈinayan salikaka ci Anteli, makeceng ko mitosilay tayal i kitiraan a kitakit ikor, mahapinangay ningra pasangaray ko niyah micada to tatahacada to sapalak maemin ko Krisciyang sanay a demak. Miharateng cingra: “ˈAlomanay ko Misawacayay Tamdaw ni Yihofa itini, sasamaan ko sifo miemin a milepel tamiyanan hani?” Mihaen ko harateng ningra cowa paira to rihaday no niyah, padotocay a calemcem. O romaroma salikaka paiken sanay to demak i kamay ni Yihofa, cowa ka ciharateng to cowa ko mamalepel ko niyah. Mihayiay cangra micada tonini a demak, mansa cowa ka hecad ci Antelian a calemcem. Orato misetekay ci Anteli misalof to harateng no niyah, malecad to roma salikaka misarocod mitadiˈec to Kawas. Kalikiay, milifokayto cingra to rihaday. Nohatini, soˈlin kamayan pasangar ko pakayraan, kawra lipahakan nanay cingra. Ano kitato wa ngaˈay mahaen. Haratengen, cowa ko pipasowal aca ni Yis kitaanan misaday misiˈayaw to sapalak, mikiˈokayho o ngangaˈay kita itini sapalak madimadi to Kawas.—ˈOsien ko Yohani 15:20; 16:33.

16. Ano micada to sapalak i, o mamidofdof kita to maanan a sakayat?

¹⁶ O tayal ita ano tahacada to sakeceng i, ngangaˈay kita mikitini i fenpo ato malohemay malitengay micada to pina sakayat. Onini a sakayat wa midipot kitaanan, ho ngaˈay kita padotoc micada to sapahaled to pakasoˈlin a kakaenen, ato padama kitaanan padadotoc mitosil itini toniya pakayraan nohatini. Ka pisarocod a midofdof, soˈlin cowa ka tada cipinang kiso to mikeriday faˈinayan salikaka hano mihadak toniya mahaenay a sakayat, oha dadoedoen a midemak. (Yakop 3:17) O roma i haratengen, o milingatay to salikaka anca kasakopangay a demak a lihaf, aka patalahkalen to awaay ko fadangalan mafanaˈ a tamdaw.—Patnakay 3:7.

17. Malecad to saka 1 hahekalan a tarokos, mamisetek to falocoˈ kita samaan ko pidemak hani?

¹⁷ Miˈodis ci Satan to finawlan no Kawas, sakakaay lalangian i ‘misawacayay ci Yisan’ cangra. (Paˈarawan 12:17) Aka a matapiˈ ni Satan ato hekal ningra. Haratengen, itini sapalak padadotoc mitosil pasifanaˈ to tamdaw papadama kitaanan milifok to lipahak ato rihaday. Itini saka 1 hahekalan, palimoˈotay ko ˈaˈideman no pihakelongan to tarokos akato mitosil, kawra onini a madimadiay salikaka mipiliˈay midofdof to Kawas, padadotoc mitosil, telocto milifokay cangra to taˈangayay a lipahak. (Dmak 5:27-29, 41, 42) Manaokaniw, ano makeceng ko mitosilay tayal, ano mitosil kita i oha maminaˈon a misinanot. (Matay 10:16) Kawra ano misarocod kita a midemak o mamilifok to rihaday, samanen mafanaˈay kita mahemekay ci Yihofa, hanaca o milasilan ita o sapilidong to tamdaw a lihaf.

O PAFELIAY TO RIHADAY A KAWAS WA KALACAFAY TISOWANAN

18. Haratengen ita, edengan o cima ko ngangaˈay pafeli kitaanan to rihaday?

¹⁸ Aka calemcem, soˈlin itini pasangaray a pakayraan, wa kamayan ira ko rihaday ita. Haratengen, misaalian ita i o sapafeli no Kawas a rihaday, kantangen ko sowal, edengan ci Yihofa ko papafeli kitaanan to mahaenay a rihaday. Misiˈayaw to lifong, pades anca sapalak i, ka pitadiˈec Cingranan, kelecen mihakelong ko likakawa Ningra, halamhamho to makapahay hatokel noikor. Mihaen, ‘o pafeliay to rihaday a Kawas wa kalacafay tisowanan.’ (Filipi 4:9) Dotoc a lalakaw mamilengo, tahalifa ko salikaka to sapalifet i, sasamaan kita padama cangranan milifok to sapafeli no Kawas a rihaday.