Adihayay ko Pades no Tamdaw, Kawra Itatihiay Iso ci Yihofa

1. Papakasoˈlin kita to maanan?

O FINAWLAN ni Yihofa kita, mansa mafanaˈay kita tangongolay ko olah Ningra kitaanan, makalimay Cingra o sangaˈayay ko kaˈorip no mita. (Loma 8:35-39) Pakasoˈlinay kita, edengan mitoor to safalod no Fangcalay Cudad maˈorip mamilifok to ngaˈayay epoc. (Isaya 48:17, 18) Kawra, ano fahal sa kita tahalifa to pasangaray no kaˈorip, sasamaan ko piharateng hani?

2. Alatek tahalifaay kita to maanan a pasangaray? Wa pakayni kita irato ko maanan sasa no harateng hani?

² O polong a finawlan ni Yihofa mamisiˈayaw to pasangaray. Tinakoen, o midemakan no paro no lomaˈ papatoled kitaanan alatek. Iraay ko pakidemay a adada no tireng ita alatek, telocto caayto ka adihay ko demak ci Yihofaan. Tahalifaay kita to pades alatek, anca pakayni pihakelongan tahacada to hakokay. Tahalifa to mahaenay a sapalifet i, saan kita miharateng alatek: “Hano mifekad konini a demak i tireng ako? O maanan ko mararaway a demak ako? Cowato ko papalemed ci Yihofa takowanan han?” Na iraay ko mahaenay a harateng iso han? Ano iraay i, aka a matoled! ˈAlomanay madimadiay sikawdan ni Yihofa na iraay ko malecaday a nafalocoˈan.—ˈOlic 22:1, 2; Hapakuk 1:2, 3.

3. Mikitini ˈOlic 34:19 mamananam ita ko maanan hani?

³ ˈOsien ko ˈOlic 34:19. Tosaay ko kalimlaan nonini sinael: (1) Tatahapades ko moecelay tamdaw. (2) Mamilidong ci Yihofa kitanan paliyas to sapalifet. Sasamaan ci Yihofa milidong kitanan hani? O cecay pakayraan i, papadama kitanan ira ko matatodongay noka pinengneng to kaˈorip itini tonini hekal. Na mikiˈokay ci Yihofa, o lalipahak kita midoko Cingranan, nikawrira nohatiniho o aawa ko cariraw no kaˈorip cowa ka saan Cingra mikiˈok. (Isaya 66:14) Pamoteken kono ikoran a tokel sanay palimoˈot Cingra kitanan, samanen noikor i, o mamahaen kita to halamhaman Ningra maˈorip kita tahadaˈoc. (2 Korinto 4:16-18) Nohatini, padamaay Cingra to romiˈamiˈad kitanan, ho ngaˈay kita pakahadidi miemem.—Radiw no mararomay 3:22-24.

4. Onini lalakaw mamilengo to maanan hani?

⁴ Dotoc i, mamilengo kita mikitini i nolitengan ato aniniay madimadiay sikawdan mamananam ko maanan, mikitini i nalifetan nangra mahapinang ita, mamalifa no tamdamdaw ko talifahal sanay a pasangaray, kawra ano tadiˈecen ci Yihofa, o mamalifok ko sapadama Ningra. (ˈOlic 55:22) Ano micekiw to nalifetan no madimadiay sikawdan i, ngaˈayay saharateratengen: “Ano malifa ko malecaday a pasangar i, sasamaan ko piharateng ako hani? O ngaˈayay taˈarawan nangra, sasamaan mikowad takowanan mitongal to pitadiˈec ci Yihofaan hani? Ngangaˈay kako misaka dademak to maanan mananamay a kimad hani?”

ITINI NOLITENGAN

5. Tahalifaay to maanan a pasangar ci Yakop pakayni ci Lapanan hani? (Nengnengen ko papotalay coka.)

⁵ Nolitengan madimadiay sikawdan ni Yihofa tahalifaay to masakenakenaay talifahal sanay a pasangar. Nengnengen ko nalifetan ni Yakop. Palimoˈotan no wama cingra tayra i fakian ci Lapanan misafafahi to wawa ningra, samanen o midokoay to Kawas ci Lapan. Mikiˈokan no wama cingra, o papalemeden ni Yihofa cingra. (Satapangan 28:1-4) Oranto i, matatodongay ko pisaˈosi ni Yakop, miliyas to Kanan a pala, malingad tayra i lomaˈ no faki ci Lapanan. Tatosaay ko fafahiyan a wawa ni Lapan, o cecay ci Liya, o roma ci Rakil. Maolahay ci Yakop ci Rakilan, to sakacifafahiyaw cingranan, hayi sanay ci Yakop patado ci Lapanan matayal to 7 miheca. (Satapangan 29:18) ˈArawhan o kalingad no demak cowa ka hatira to niharatengan ni Yakop. Misakaniwan ni Lapan ci Yakop, papisafafahi cingranan to sakakaay a wawa ci Liyaan. Soˈliˈlin mihayay ci Lapan ikor no cecay lipay pafafahien ci Yakop ci Rakilan, nikawrira o saali ningra i, papatadoho ci Yakop cingranan matayal to 7 mihecaan. (Satapangan 29:25-27) O roma sa i, kinapinapinaay ci Lapan micicih to mihayan ningra a palifon ci Yakopan. Padadotocay misamsam ci Yakopan, 20 miheca ko nika halafin.—Satapangan 31:41, 42.

6. Misiˈayawayho ci Yakop to maanan a pasangar?

⁶ Misiˈayawayho ci Yakop to romaroma a pasangar. Taˈangayay ko lalomaˈan ningra, kawra marariday malatiˈil ko wawa ningra, hanaca pacakayan ko safa ci Yosif mala koli. O tatosaay a wawa ni Yakop ci Simiyong aci Lifi mipalakay to ngangan no lalomaˈan, pakangodoayho to fangcalay ngangan ni Yihofa. Roma i, kaolahan ni Yakop ci Rakil mahofoc to saka tosa a wawa i, mahalodotay a mapatay. Malitengto ci Yakop i, pakayni i pakidemay a kedal mafolaway tayra i Icip.—Satapangan 34:30; 35:16-19; 37:28; 45:9-11, 28.

7. Samaanay ci Yihofa palemed ci Yakopan hani?

⁷ Soˈliˈlin tahalifa to adihayay pasangar, kawra cowa ka malahdaw ko nika pakasoˈlin ni Yakop ci Yihofaan ato sakiˈok Ningra. Hato pakayni toninian, palemedan ni Yihofa ci Yakop. Tinakoen, soˈliˈlin kinapinapinaay ci Lapan a misakaniw ci Yakopan, kawra pafelian ni Yihofa ci Yakop to adihayay a hafay. O roma i, nao mapatayayto ci Yosif sanay ci Yakop a miharateng, ˈarawhan, malalitemohayho ci Yosifan cingra. Haratengen iso hena, hakowaay ko noka piakoˈid ni Yakop ci Yihofaan itiya? Tona tangongolay ko kalawidang ni Yakop aci Yihofa, mansa pakaremoay cingra to masamaamaanay a sapalifet. (Satapangan 30:43; 32:9, 10; 46:28-30) Kita i, ngangaˈay padadotoc patanektek to nika lawidang aci Yihofaan. Mihaen i, soˈlinto talihafal sa tahasiˈayaw to sapalifet, o ngangaˈay kita pakaremo a misiˈayaw.

8. O Hongti ci Tafiti ciharatengay to sapidemakaw to maanan?

⁸ O Hongti ci Tafiti ciharatengay pakayni ci Yihofaan sapidemakaw to pina a demak, kawra cowa ka saolatekay saan midemak cingra. Tinakoen, makalimay ci Tafiti patireng to fangcalay sefi no Kawas, pasowal hananay ningra to kalim no falocoˈ ko pairasolay ci Natan. Hananay ni Natan cingra: ‘Tona mikalacafayan no Kawas kiso, toor han ko niharatengan iso a midemak.’ (1 Rayray 17:1, 2) Matengil konini a sowal, maedeng makowaday ko falocoˈ ni Tafiti. Tangsolay misatapang a milimasmas tonini a taˈangayay demak alatek.

9. Matengil ni Tafiti ko katoledan ningra a lihaf ikor, samaanayto ko demak ningra hani?

⁹ Tada kalikiay, pairasolay ni Yihofa patayniay to katoledan a lihaf. ‘Toya dadaya’ pasowalan ni Yihofa ci Natan, cowa ko ci Tafiti ko papatireng to fangcalay sefi, o wawa ningra ko papatireng sanay. (1 Rayray 17:3, 4, 11, 12) Matengil konini a lihaf ikor i, samaanay ko piharateng ni Tafiti hani? Kalikiay cingra misalof to patosokan no niyah, satapangayto misaday to payci ato lalosidan to sapatireng no wawa ci Solomon.—1 Rayray 29:1-5.

10. Samaanay ci Yihofa palemed ci Tafitian?

¹⁰ Pasowalan ni Yihofa ci Tafiti cowa ko cingra ko mamisangaˈ to fangcalay sefi, ikor tangsolay ko Kawas patireng to katatelekan cingranan, mikiˈok cingranan to papala hongtien ko cecay a teloc ningra tahadaˈoc. (2 Samuil 7:16) I faelohay hekal, wa itini ci Tafiti i Pikowan ni Yis to Comaˈol Miheca a tatokian, milayap to rahekeray lipahakay a kaˈorip. Itiya mafanaˈto cingra, onini a tadamaanay a Hongti nao teloc ningra. Papalipahak konini cingranan! Mikitini tonini maˈoningay mananam ita, ano ciharatengay kita matayal saki Yihofaan to pina a demak, kawra cowa ka malaˈosi konini a kalim no falocoˈ, alatek pakaynien ni Yihofa i cowa ka harateng a pakayraan palifon kitaanan.

11. Hongti Kitakit no Kawas soˈliˈlin cowa ka itini pitalaan no saka 1 hahekalan a Krisciyang a tatokian a ira, kawra samaanay cangra milifok to sapalemed ni Yihofa hani? (Dmak 6:7)

¹¹ Isaka 1 hahekalan a Krisciyang misiˈayaway to caay ka harateng a pakayraan. Tinakoen, halamhamay cangra to sapakaˈarawaw to kaira no Hongti Kitakit no Kawas, kawra cowa ka fanaˈ cangra to hahacowa mafekad konini a demak. (Dmak 1:6, 7) Samaanayto ko demak nangra hani? Padadotocay cangra matayal to mitosilay a demak, misaˈicel a palosiyang to ngaˈayay lihaf. Telocto i, mahapinangay nangra to mipalemedan ni Yihofa cangra.—ˈOsien ko Dmak 6:7.

12. Tahalifa to kedal i, saka 1 hahekalan a Krisciyang samaanay a midemak?

¹² Iraay ko cecay laliyadan, ‘polong no hekal’ mafekaday ko pakidemay a kedal. (Dmak 11:28) O itiyaay Krisciyang malecaday to tao mamisiˈayaw tonini pasangaray a pakayraan. Mamaharateng iso hokira, onini a kedal hakowaay ko pifiyor cangranan hani? O tawki no lomaˈ maedeng calemcemay to ngangaˈay paririˈ to paro no lomaˈ hokira. Mihalakaay misakakahad to tayal a kaemangay tamdaw sasamaanto hani? O nanayaren ko mihalakaan no niyah saan cangra miharateng han? Soˈliˈlin cowa ka lecad ko kahacecay a pakayraan, kawra misalofay cangra. Padadotocay cangra misaˈicel a mitosil, hanaca makahiay paladaˈ to dafong i Yutiyaay a salikaka.—Dmak 11:29, 30.

13. Itini tonini taˈangayay a kedal, malifokay no saka 1 hahekalan a Krisciyang ko maanan a sapalemed hani?

¹³ Itini tonini taˈangayay a kedal, malifokay no saka 1 hahekalan a Krisciyang ko maanan a sapalemed hani? O tahacadaay to sapakiyaho a salikaka matinakoay nangra ko pidama ni Yihofa. (Matay 6:31-33) Maedeng makakedecayto cangra to padamaay a salikaka sanay a miharateng, o pakiyahoay to dafong anca tano romaroma pakayraan mipadang to mapadesay a salikaka, matinakoay nangra ko mipaladaˈay a hemek. (Dmak 20:35) Makamisaˈicelay cangra misiˈayaw to faelohay a pakayraan, hato malifokayto ko pipalemed ni Yihofa.

14. Ci Parnapas ato tarokos ci Pawlo tahalifaay to maanan a demak hani? Telocto samaanay aki? (Dmak 14:21, 22)

¹⁴ Saka 1 hahekalan a Krisciyang marariday tahalifa to hakokay. Nolatekay, fahal sanay a mifekad ko hakokay, cowa ka haraterateng. Nengnengen ko tinakoan ni Parnapas ato tarokos ci Pawlo. Itira cangra i Listra satapangho a mitosil i, o itiraay a tamdaw mahemekay mihamham cangranan, mitengilay to patenakan nangra a lihaf. Kawra ikor i, iraay ko misafelitay tamdaw ‘miˈowingay to finawlan,’ isalakat na mihamhamay ci Pawloan a tamdaw mitatiway to fakeloh a mitekol cingranan, mangata mapatay cingra. (Dmak 14:19) Kawra ci Parnapas aci Pawlo tayraay i roma pala padadotoc mitosil. Telocto i? ‘Mapadamaay nangra ko ˈalomanay tamdaw mala nisawawaan,’ o nisowalan nangra ato ngaˈayay taˈarawan, patanektekay to pakasoˈlinay falocoˈ no salikaka. (ˈOsien ko Dmak 14:21, 22.) Ci Parnapas aci Pawlo talifahal sanay mahakokay, ˈarawhan kodaitay a padadotoc mitosil, tada mapalemeday ko ˈalomanay tamdaw. Malecadayto, ano kodait kita midemak to sapafeli ni Yihofa kitaanan a tayal i, o mamilifok kita to sapalemed Ningra.

ANINIAY LINTAD

15. Mikitini salikaka ci Maykmilonan mananamay iso ko maanan hani?

¹⁵ ˈAyaw no saka 1914 a mamihecaan, finawlan ni Yihofa pakayni to noikoran tada halamhamay a mitala. Tinakoen, salikaka ci Maykmilon ato ˈalomanay a itiyaay a tamdaw, miharateng to mangataayto tatayra i kakarayan cangra a milayap to halifon. Isaka 1914 miheca saka 9 folad a cecay pikimad ningra: “Alatek o salikorayto ako a pikimad konini,” sanay. Manaokaniw, cowa ko salikoray a pikimad ningra. Ikor sanayto ko sowal no salikaka ci Maykmilon: “Alatek macalohay kita, miharateng to tatayra i kakarayan ko niyah, ˈarawhan o mamisamacay kita matayal saki Tatapangan.” Soˈlinay a ˈifowa matayal ko salikaka ci Maykmilon. Faedetay ko falocoˈ mitosil, hato mapakalalokay ko ˈalomanay pakayniay to misatenokay ko saaroˈan a mapalitay a salikaka. Tahalitengto cingra i, padadotocay a madimadi, kodaitay a mirienang to saˈopo. Salikaka ci Maykmilon itini i pitala to sapalifon, kalasaka dademakay to toki cingra, malifokayto ko maanan a epocan hani? 1966 miheca, ˈayaw no mamapatay cingra i, sanay ko sowal ningra: “O pakasoˈlinay falocoˈ ako nohatini mahecaday to isalakatay a tanektek.” O tatodongen no mita maemin ko taˈarawan ningra! Ano halafinayto kita mihadidi to sapalifet i, mataˈlifayto ko nipitala ita, tatodongen ita ko ngaˈayay taˈarawan ningra.—Hipray 13:7.

16. Salikaka ci Hapot Cannis ato fafahi ningra malifaay ko maanan talifahal sanay a sapalifet? (Yakop 4:14)

¹⁶ O ˈalomanay tamdaw ni Yihofa mamisiˈayaw to talifahal sanay a adada no tireng. Tinakoen, itini nalifetan no salikaka ci Hapot Cannis somowalay,b cingra ato fafahi isaˈayaw maolahay itini i Kana malo mikiriwiˈay manilnil a mitosilay, kawra ikor ciadadaay cingra to pakidemay a matoleday ko falocoˈ a adada. Salikaka ci Cannis somowalay to Yakop 4:14 a sinael, onini a kafalic o cowa ka harateng ningra a ‘anocila’ a demakan. (ˈOsien.) Sanay cingra: “O sasiˈayawen niyam konini a demak, miliyas to Kana ato ˈalomanay kanonoˈan a widang, minokay tayra i Kanata [mipaising].” Pakayniay i sapadama ni Yihofa, salikaka ci Cannis ato fafahi ningra ngaˈayay pakaemem to sapalifet, padadotoc madimadi a matayal saki Kawas.

17. O nalifetan no salikaka ci Cannis samanay pakalalok to romaroma tamdaw?

¹⁷ Milomal ko salikaka ci Cannis to nalifetan no niyah i, mihadakay to nafalocoˈan no niyah. O sowal ningra taˈangayay ko pifiyor to romaroma tamdaw. O cecay fafahiyan salikaka sanay: “O nalifetan no salikaka ci Cannis tada o mitemeray takowanan a lalakaw. . . . Pakayni sapiadahaw to adada, hato sawad sanay cingra to tayal no niyah. Miˈosi toniya nalifetan ningra, padamaay takowanan matatodong ko pinengneng to pakayraan no niyah.” Sanayho ko cecay faˈinayan salikaka: “10 miheca malo malohemay malitengay kako, ikor ciadadaay to nofalocoˈan hato sawad sanay to tayal. Tada pasokiyaway ko niyah saan kako, ano miˈosi to nalifetan no tamdaw i, mangodoay ko falocoˈ, awaay ko pakayraan padotoc a miˈosi. . . . Kawra salikaka ci Cannis itini pasangaray pakayraan padotocay mihadidi, o nalifetan ningra tada pakalalokay takowanan.” Mihaenay, ano tahalifa kita to fahal sanay pasangaray i, padadotoc mihadidi, wa ngaˈayto pakalalok to romaroma tamdaw. Soˈlin adihay ko pasangar no kaˈorip, wa ngaˈayho kita patalahkal to pakasoˈlin, padadotoc mihadidi, patireng to ngaˈayay a taˈarawan no salikaka.—1 Pitiro 5:9.

18. Nengnengen ko miliyawan misasing a coka. Mikitini tonini a fafahiyan salikaka mananam iso ko maanan?

¹⁸ Mahecaday to 2019 miheca lifong a pades, o kaˈorip no ˈalomanay salikaka tahacadaay to pakidemay pifiyor. Tinakoen, i Nayciliya cecay maponengay a salikaka, awaayto ko payci ato kakaenen i lomaˈ. Cecay papacem licayan no fafahiyan wawa cingra, cecayayto katotong ko felac i lomaˈ, maemin komaen ikor samaanto aki. Pasowalan ningra ko fafahiyan wawa, soˈliˈlin awaayto ko maanan i lomaˈ, kawra o tatodongen nangra ko maponengay no Carifat, maherek milimasmas to salikoray a kakaenen, ikor misarocoday to falocoˈ mitadiˈec ci Yihofaan. (1 Hongti 17:8-16) Cowaho piharateng cangra to o maanan ko kakaenen to kalahokan, iraayto ko salikaka patayniay to dafong, ilalomaˈay a kakaenen maedengay tosa a lipay cangra komaen. Sowal no fafahiyan salikaka, cowa ka harateng ningra tiya masasowalho to fafahiyan wawa i, masongilaˈayto ni Yihofa mitengil! Mikitini mahapinang, edeng mitadiˈec ci Yihofaan, ano fahal sa ira ko sapalifet i, matongalay ko piingid Cingranan.—1 Pitiro 5:6, 7.

19. Tahalifaay ko salikaka ci Alikes Yiesaw to maanan a hakokay?

¹⁹ Toniya pina miheca, ˈalomanay salikaka tahacadaay to fahal sanay mifekad a hakokay. Nengnengen ko nalifetan no salikaka ci Alikes Yiesaw. Itiniay Rowasiya ko kitiraan ningra, micada cingra to paputisem i 1994 miheca i, iraayho ko pasalat no Misawacayay Tamdaw ni Yihofa itira. Kawra mafalicayto ko pakayraan. 2020 miheca, fahal sanay ko dimeng mikinsa to lomaˈ no salikaka ci Yiesaw, miˈafasay to adihayay dafong ningra. Ikor no pina folad, pahoingan no sifo cingra, o sapahoing a wacay o mihadakan no cecay mipakingkiwan a tamdaw. Misakaniway koniya tamdaw sao maolahay to Fangcalay Cudad, cecayay miheca malacafay to salikaka ci Yiesawan minanam to Fangcalay Cudad, hanaca milokoingan ningra ko noka pinanam nangra. Tada o mariˈangay konini a tamdaw!

20. Salikaka ci Yiesaw samaanay patanoktok to kalalaˈed ningra aci Yihofa?

²⁰ O hakokay to salikaka ci Yiesawan o pidokaˈ aca han? Cowa, o kalalaˈed ningra aci Yihofa matongalay ko katanektek. Sanay cingra: “O pitolon ako ato fafahi matongalayto ko kapicerid. Matinakoayho ako, ano awaay ko sapadama ni Yihofa, wa pasangar a padadotoc miemem.” Sanayho cingra: “Notekedan a picekiw taˈangayay ko sapadama takowanan. Ilalomaˈ no Fangcalay Cudad adihayay ko maˈoningay mitadtaday, ano padadotoc a rihaday, mitadiˈec ci Yihofaan i, tada masakalimlaan. Midotimay kako to taˈarawan no nolitengan madimadiay a sikawdan, miharatengho o maanan ko padamaay cangranan padadotoc a rihaday.”

21. Mikitini tonini lalakaw mananam ita ko maanan hani?

²¹ Mikitini tonini lalakaw mananam ita ko maanan hani? Maˈorip tonini a hekal, o tatahalifa to masakenakenaay caay ka harateng a pakayraan, kawra ano tadiˈecen ita ci Yihofa, o papadama Cingra kitaanan. Malecad o sinael no lalangian sanay: ‘O moecelay a tamdaw, adihayay ko pades, kawra milidongan ni Yihofa cingra paliyas to kihcod a pades.’ (ˈOlic 34:19) Mihaenay, aka sasamacay sato pasangaray no niyah, ao papadadotoc misinanot samaanay ci Yihofa tano taˈangayay a ˈicel midama kitaanan. Ano mihaen, o mamalecad kita to tarokos ci Pawloan, matomes ko pakasoˈlin a somowal: ‘Mitadiˈecay kako toya pafeliay to ˈicel a Tatapangan, maremoay ko kihcod a demak.’—Filipi 4:13.