Cacekiwen Lalakaw 25
Malohemay Malitengay—Ka Pasayra ci Kitiyonana a Minanam
‘Ano sowalenho ako ko nidemakan ni Kitiyon ato romaroma pairasolay i, cacangoˈotto ko toki.’—HIPRAY 11:32.
RADIW 63 Madimadi
KALIMLAAN NO LALAKAWa
1. Mikitini 1 Pitiro 5:2, misaaretengay ko malohemay malitengay to maanan?
MICADAAY to sapatorod ni Yihofa ko malohemay malitengay, mamidimokos to kalimlaan a siri Ningra. Misaaretengay cangra toniya kalimlaan a ˈinorong matayal saki salikaka, caay ka talaw to roray ‘misongilaˈ pakaen’ to siri no Kawas. (Yirimiya 23:4; ˈosien ko 1 Pitiro 5:2.) Ira ko mahaenay a pakaenay ilalomaˈ no kasakopang, tada miakoˈiday kita ci Yihofaan!
2. Alatek o tatahalifa ko malohemay malitengay to maanan a sapalifet?
2 Ano midemak ko malohemay malitengay to ˈinorong i, tatahalifa to adihayay sapalifet. Tinakoen, adihayay ko tayal nangra midimokos to kasakopang. Ci Toni o malohemay malitengay itini Padaka, itini picada to tayal i, maminanam cingra paihkal to misapoeneray a waywayan. Sanay cingra: “Mifekad ko lifong i 2019 miheca i, sapilikakawaaw to saˈopo ato mitosilay a tayal no kasakopang, adihay ko micadaan ako a tayal. Kawra ano hakowato ko pisaˈicel ako, hato cowa ka lahci ko demak. Telocto, awaay ko toki ako misongilaˈ mitolon ato micekiw to Fangcalay Cudad ato mitepangan a cudad.” Itiniay i Kosowo malohemay malitengay ci Ilie malifaay ko roma sapalifet. Cecay laliyadan, o kitiraan ningra mifekaday ko lalood, itiya sapidoedoaw to sakayat no likakawa pasangaran nanay cingra. Sanay cingra: “Itiya ocoren no fenpo kako tayra i katalawan a pala padama to salikaka i, tada matalaway kako, o sakayat no likakawa hato cowa ka tatodong saan miharateng.” Ci Timo itini i Asiya malo mikiriwiˈay manilnil a mitosilay. Cecay laliyadan, to romiˈamiˈad adihayay ko hatayal ningra, tada marorayayto sanay cingra miharateng. Sanay cingra: “Latekay, marorayay ko falocoˈ awaayto ko ˈicel ako saan miharateng.” Malifa no malohemay malitengay ko mahaenay a sapalifet i, sasamaan ko pidemak hani?
3. Minanam to pakayniay Kakitaan ci Kitiyonan a maˈoningay, pakayni kitaanan maemin hano iraay ko epoc?
3 O malohemay malitengay ngangaˈay minanam to taˈarawan no Kakitaan ci Kitiyon. (Hipray 6:12; 11:32) Manilnilay cingra midipot ato pakaen to finawlan no Kawas. (Kakitaan 2:16; 1 Rayray 17:6) Malecad ci Kitiyonan, o malohemay malitengay anini manilnilay itini mafodifoday a lintad midimokos to finawlan no Kawas. (Dmak 20:28; 2 Timoti 3:1) Wa ngaˈay ko malohemay malitengay minanam ci Kitiyonan, patalahkal to misapoeneray, misamimingay ato makahiay midofdof a waywayan, wa ngaˈayho mitodong cingranan itini pidemak to ˈinorong i, padadotoc a mihadidi. O romaroma salikaka maherek minanam to nano demak ni Kitiyon i, o mamatongal ko piakoˈid to marorayay ko tayal a malohemay malitengay, hanaca makahi a midama cangranan.—Hipray 13:17.
ANO MISAALI TO MISAMIMINGAY ATO MISAPOENERAY I
4. Samaanay ci Kitiyon patalahkal to misamimingay ato misapoeneray?
4 Misamimingay ko waywayan ni Kitiyon, misapoenerayho. Itiya o Israil tamdaw tahacadaay to saroero no ciˈicelay Mitiyan a tamdaw, oranto mipiliˈan ni Yihofa ci Kitiyon milidong to Israil a tamdaw. Tiya pasowalen no coyoh ci Kitiyon tonini a lihaf i, sanay cingra: ‘O aˈirangan ako itini i Manasi a ngasaw i, o samimingay, o satadancaay kako itini i paro no lomaˈ niyam.’ (Kakitaan 6:15) Harateng ningra awaay ko tatodong no niyah mitamorong tonini a ˈinorong sanay, kawra ikakaay ko kacipinang ni Yihofa cingranan. Pakayni pitadiˈec to sapadama ni Yihofa, malaˈosiayto ni Kitiyon midemak konini a ˈinorong.b
5. Itini maanan a pakayraan, pasangaray ko malohemay malitengay paihkal to misamimingay ato misapoeneray a capeling hani?
5 O malohemay malitengay itini kahirahira no demak, o mamisaˈicel paihkal to misamimingay ato misapoeneray a capeling. (Mika 6:8; Dmak 20:18, 19) Cowa ko mamaliko cangra to inaneng ato malaˈosiay no niyah a demak, cowaho ko papakayni mararaw ko pina a demak, ciharateng to awaay ko kapo no niyah saan. Nikawrira, paihkal to misamimingay ato misapoeneray nolatekay cowa ko madoloay. Tinakoen, micadaay ko cecay malohemay malitengay to adihayay tayal, ˈarawhan cowa ka lahci a midemak. Anca, dademak ko cecay malohemay malitengay i, micadaay to salikaf anca sapakahemek. Itini mahaenay a pakayraan, o malohemay malitengay sasamaan pasayra ci Kitiyonan minanam hani?
O malohemay malitengay mitodong to taˈarawan ni Kitiyon, ira ko misamimingay a waywayan, o mamakahi micangacang to sapadama no tao, tinakoen itini sapisawacay a paliding a demakan i, misaali to sapadama no tao (Nengnengen ko saka 6 fatac)
6. Sasamaan ko malohemay malitengay mitodong ci Kitiyonan patalahkal to misamimingay a capeling? (Nengnengen ko coka.)
6 Micangacang to sapadama. O cecay misamimingay a tamdaw mafanaˈay to citolasay ko ˈicel no niyah. Ci Kitiyon o misamimingay, mansa makahiay pasayra i tao micangacang to sapadama. (Kakitaan 6:27, 35; 7:24) O citanengay a malohemay malitengay oha mamihaen to demak. I fafekang a lalakaw masowalay ci Toni sanay: “Kako samanen mafiyoray no kalomahadan no niyah a lalengawan, madoloay micada to adihayay a tayal. Oranto, misaˈosiay kako itini no pakalomaˈay a pidoko minanam to misamimingay sanay a lalangian. O roma i, papipasowalan ako ko fafahi takowanan, itini misamimingay a pakayraan samaanayto ko midemakan ako. Miliyaway kako minengneng to jw.org wangcan a cecay ika, lalangian i, Malo Taˈarawan ci Yis, Pahatatanam to Tao, Pakasoˈlin to Tao, Patongal to ˈIcel no Tao.” Ikor, ci Toni misatapangay mitahidang to tao miˈesal to tayal ningra. Pairaay konini to maanan ngaˈayay minaroˈan hani? Sanay ko sowal ni Toni: “O demak no kasakopang milifokayto to ngaˈayay a pilosimet, kako sa i, iraayto ko adihayay a toki patanektek to kalawidang no niyah aci Yihofa.”
7. Ano micada to salikaf ko malohemay malitengay i, sasamaan mitodong to taˈarawan ni Kitiyon? (Yakop 3:13)
7 Misiˈayaw to salikaf i, damsay ko pipacaˈof. Micada to salikaf ko malohemay malitengay i, pasangaray patalahkal to misapoeneray alatek. Itini mahaenay a pakayraan, wa ngaˈay cangra mitodong to taˈarawan ni Kitiyon. Maedeng mafanaˈay ci Kitiyon cowa ko malefotay a tamdaw ko niyah, mansa tiya likafen no Ifraim a tamdaw cingra i, cowa ka keter cingra. Paihkalay ci Kitiyon to misapoeneray, mihadidiay a mitengil to ngaliwngiw nangra, damsayay a mikangodo pacaˈof cangranan, oranto i, dipayalayto ko demak. (Kakitaan 8:1-3) O citanengay a malohemay malitengay wa ngaˈay mitodong ci Kitiyonan, ano micada to salikaf i, songilaˈen a mitengil, hanaca damsay ko pipacaˈof. (ˈOsien ko Yakop 3:13.) Ano mihaen i, wa ngaˈayto cangra itini kasakopang micowat to dipayal.
8. Ano micada to sapakahemek ko malohemay malitengay i, sasamaan ko pipacaˈof hani? Sadaken ko tinakoan.
8 Panokayen ci Yihofaan ko sapakahemek. Mapadik ni Kitiyon ko Mitiyan a tamdaw ikor, sapaˈdilaw ko Israil tamdaw ci Kitiyonan. Kawra cowa ka kahi ci Kitiyon a micada, ao panokayay to polong a narorayan ci Yihofaan. (Kakitaan 8:22, 23) Sasamaan ko malohemay malitengay mitodong ci Kitiyonan hani? Ano malaˈosi ko pina demak i, panokayen ko ˈdil ci Yihofaan. (1 Korinto 4:6, 7) Tinakoen, ano pakahemek ko tao to cecay malohemay malitengay inanengay pasifanaˈ, ngangaˈay cingra mitadtad, o Kimad no Kawas ko ciˈicelay, samanen micadaay to sapahatatanam no likakawa no Kawas hato iraay ko hatiniay a inaneng ningra. Mamicerid cangra miharateng, mikidatay ko niyah to pisamacay no tao a minengneng hokira. Malohemay malitengay ci Timosi, ya manilnilho cingra i maolahay mihadak to pakapapotalay a kimad. Sanay cingra: “Isalakat makapahay ko sakayat ato sapatinako ako, adihayay ko sapitadtad. Soˈliˈlin maolahay ko mitengilay, mararidayho pakahemek takowanan, kaadayayan i, o kako ko misinanotan nangra, cowa ko Fangcalay Cudad anca ci Yihofa.” Ikor, mahapinangay ni Timosi mamifalic ko niyah to pakayraan a pasifanaˈ, ho eca ka pakidem ko tao misamacay cingranan. (Taneng 27:21) Pairaay to maanan a minaroˈan konini hani? Sanay cingra: “Pasowalay ko papina salikaka takowanan, o kimad ako padamaay cangranan, miremo to pasangaray anca mihadidi to sapalifet, matongalay ko piingid ci Yihofaan. Matengil ko mahaenay sowal, tada lipahakay kako. Palalinien to macadaay a sapakahemek isalakat, ikakaayto ko lipahak anini.”
ANO MISAALI TO MAMIDOFDOF ATO TIMOLO I
Midofdofay ci Kitiyon to sakayat miˈesal toˈaloman no sofitay, 300 aca ko mipiliˈan citanengay a tamdaw malingad milood (Nengnengen ko saka 9 fatac)
9. Sapidofdofaw ci Kitiyon ci Yihofaan ato patalahkal to timolo, hano cowa ko madoloay hani? (Nengnengen ko papotalay coka.)
9 Manilnil ci Kitiyon malo kakitaan ikor, misaaliay to mamidofdof ci Yihofaan, misaaliayho patalahkal to timolo. Tinakoen, palimoˈotan ni Yihofa cingra mamipeleng to misangaˈan no wama ningra patoˈayaan ci Paalan, tada o katalawan konini a ˈinorong. (Kakitaan 6:25, 26) Ikor, misaˈopoan ni Kitiyon ko sofitay micoˈay to ciˈicelay a ˈada, kawra kinatosaay ci Yihofa palimoˈot cingranan miˈesal to ˈaloman no sofitay. (Kakitaan 7:2-7) Salikor, palimoˈotanho ni Yihofa cingra itini lafii miˈodis to pakopangan no sofitay no ˈada.—Kakitaan 7:9-11.
10. Itini maanan a pakayraan, o malohemay malitengay pasangaray midofdof to sakayat alatek?
10 O malohemay malitengay o ‘mamakahi midofdof,’ makahi mitoor to sakayat no Fangcalay Cudad ato likakawa no Kawas a midemak. (Yakop 3:17) Mihaen ko demak nangra o patirengay to ngaˈayay taˈarawan. Kawra, sapihaenaw to demak cowa ko madoloay nolatekay. Tinakoen, o mihadakan no likakawa no Kawas a sakayat adihayay, anca kalikiay ko kafalic nolatekay. Latekay cisasaay ko malohemay malitengay to cecay sakayat o matatodongay hokira. O roma i, sapidemakaw ko malohemay malitengay to cecay ˈinorong o mamarepet alatek. Itini mahaenay a pakayraan, sasamaan ko malohemay malitengay mitodong ci Kitiyonan ira ko makahiay midofdof a waywayan hani?
11. Sasamaan ko malohemay malitengay patalahkal to midofdofay a waywayan?
11 Songilaˈen misinanot ko sakayat ato mitoor a midemak. Pasowalan no Kawas ci Kitiyon sasamaan mipalak to patoˈayaan a cadada no wama ningra, aicowa patireng to faelohay a patoˈayaan ci Yihofaan, ato papatafang to maanan a pinaˈorip malo sapatoˈaya. Cowa ka cisasa ci Kitiyon to matatodongay konini a sakayat hokira, ao tangsolay mitoor a midemak. Anini, sapidipotaw to rihaday ita, ato patanektek to kalawidang ita ci Yihofaan, o likakawa ni Yihofa pakaynian i tikami, salasil ato taˈarawan pafeli to sakayat i malohemay malitengay. Madimadi ko malohemay malitengay midofdof tonini a sakayat no likakawa no Kawas, pairaay to haepoc no polong a kasakopang. Tada maolahay kita cangranan!—ˈOlic 119:112.
12. Ano masalof ko sakayat no likakawa no Kawas, o malohemay malitengay sasamaan mitoor to sowal no Hipray 13:17 a midemak?
12 Makahi misalof. Mitooran ni Kitiyon ko limoˈot ni Yihofa, papinokay to ˈalomanay a sofitay, o maˈosaway a tamdaw cowato ka pakaala to kalicecay no simoˈot. (Kakitaan 7:8) Saan cingra miharateng alatek: “Kalimlaan ko mahaenay a pifalic han? Ano mihaen mamalaˈosi ko demak han?” Ano samaanto i, mitooran ni Kitiyon a midemak. Anini, mitodongay ko malohemay malitengay to taˈarawan ni Kitiyon, midofdof to sakayat no likakawa, makahi a misalof. (ˈOsien ko Hipray 13:17.) Tinakoen, itini 2014 miheca, pakayni mitomadaway a tayal to Hongti Kitakit Kasaˈopoan ato Pitaykayan, misalofan no Malohemay Malitengay i Congpo ko pakayraan mihadak to payci. (2 Korinto 8:12-14) Isalakat, pacaliwan no likakawa no Kawas ko kasakopang to payci a patireng to Kasaˈopoan, ikor wa patikolen no kasakopang ko payci. Kawra nohatini, misaka dademakan no likakawa no Kawas ko kiyaho, patireng to Kasaˈopoan ato Pitaykayan. Ano iraay ko saali icowa i, aitira a patireng, cowato ka pisimsim to maedengay ko kiyaho no kasakopang hokira. Mafanaˈ ci Hosay toniya pisalof ikor, cisasaay to mamalaˈosi koniya sakayat hokira. Saan cingra miharateng: “Ano mihaen to demak, maedeng awa ko cecacecay aca a Kasaˈopoan to mapatirengay. Itini tamiyanan, cowa ka haen ko pidemak.” O maanan ko padamaay ci Hosayan midofdof to sakayat no likakawa hani? Sanay cingra: “Taneng 3:5, 6 patalipaˈelalay takowanan mitadiˈec ci Yihofaan. O kalingad no demak tada kafahkaˈanto, nohatini adihayay ko mapatirengay niyam a Kasaˈopoan. Onini faelohay a pakayraan mapalemeday ko ˈalomanay a salikaka, mihaenay hato maroyaroyayto a mapolong.”
Soˈlin itini i makecengay a kilac a mitosil i, satimoloen ita, tano ciepocay a pakayraan misawacay to tamdaw (Nengnengen ko saka 13 fatac)
13. (1) Pakasoˈlinay ci Kitiyon to maanan? (2) Sasamaan ko malohemay malitengay mitodong ci Kitiyonan hani? (Nengnengen ko coka.)
13 Timolo a midofdof to limoˈot ni Yihofa. Soˈlin matalawan nanay ci Kitiyon, anca misiˈayaw to sakapatay no ˈorip, kamayan a midofdof ci Yihofaan. (Kakitaan 9:17) Malifok ningra ko sakiˈok ni Yihofa ikor, pakasoˈlinayto papadamaen ni Yihofa cingra midipot to Israil tamdaw. Itini makecengay ko mitosilay tayal a kilac, mitodongay ko malohemay malitengay to taˈarawan ni Kitiyon. Soˈlin mapasawad ko tayal, marepet, masayfang anca makariˈang no tamdaw, kamayan a timolo cangra mikerid, malacafay to salikaka mirienang to saˈopo ato mitosilay a tayal.c Itini taˈangayay padiing a tatokian, cowa ko caciˈangi ko malohemay malitengay to katalawan, tatimolo a midofdof to sakayat. Onini a sakayat papilasilay kitaanan malecaday to masaˈikayay a soeda sapisawkit a lihaf alatek, ato pasowal kitaanan ano micada to saˈodis no Makok a Kok i, sasamaan a midipot to niyah.—Icikil 38:18; Paˈarawan 16:21.
ANO HAMAMIHADIDI I
14. Misamaanay hano hamamihadidi ci Kitiyon hani?
14 Malo kakitaan cowa ko madoloay a demak, marorayay ko tireng ni Kitiyon. Mapadikto ko Mitiyan a tamdaw milaliw i, misalafiiyay ci Kitiyon milepel cangranan naitini i Dafdaf no Yicril tangsa i lawac no Yortan ˈAlo, itira o makarengorengosay a pala alatek. (Kakitaan 7:22) Tomerepay ci Kitiyon han? Cowa. Soˈliˈlin tada malotayayto cingra ato mikotoday cingranan a 300 tamdaw, kawra kamayan cangra padadotoc a kiemel. Milakecay cangra to Yortan ˈAlo, padadotoc a milepel to ˈada. Salikorto i, malepelayto nangra ko Mitiyan a tamdaw, mipadik cangranan.—Kakitaan 8:4-12.
15. Itini masamaanay a pakayraan, hamamihadidi ko malohemay malitengay hani?
15 Nolatekay, midimokos ko malohemay malitengay to kasakopang ato paro no lomaˈ no niyah i, tada malotayay ko tireng. Ano mahaenay i, sasamaan a mitodong ci Kitiyonan ko malohemay malitengay hani?
O sidaˈitay a malohemay malitengay pakalalokay to misaaliay to sapadama a salikaka (Nengnengen ko saka 16-17 fatac)
16-17. O maanan ko padamaay ci Kitiyonan padadotoc a mihadidi? Papakasoˈlinen no malohemay malitengay ko maanan hani? (Isaya 40:28-31) (Nengnengen ko coka.)
16 Pakasoˈlinen ci Yihofa to papafeli to ˈicel i tisowanan. Pakasoˈlinay ci Kitiyon ci Yihofaan to papafeli to ˈicel i cingranan, cowa patoleden ni Yihofa cingra. (Kakitaan 6:14, 34) Tinakoen, tiya keriden ni Kitiyon ko tamdaw milepel toya tatosa hongti no Mitiyan i, comikayay cangra milepel, kawra oya tatosaay hongti mikalicay to lakota a milaliw. (Kakitaan 8:12, 21) Tona padamaan no Kawas cangra milepel tora tatosaay hongti, malowiday nangra. Malecaday, o malohemay malitengay ngangaˈay mitiˈer ci Yihofaan, samanen ‘caay ko mamaroray a masetoˈ Cingra,’ itini pisaalian nangra i, papafelien cangra to ˈicel.—ˈOsien ko Isaya 40:28-31.
17 Nengnengen ko nalifetan no faˈinayan salikaka ci Masiw, o Mirinnakay to Ising a Iing cingra. Tada marorayay konini a tayal, o manan ko padamaay cingranan padadotoc mihadidi hani? Sanay ci Masiw: “Matinakoay ako ko sowal i Filipi 4:13 to soˈlinayto. Kinapinapinaay ano malotay kako i, micangacangay kako ci Yihofaan a mitolon, mingitangit Cingranan pafeli takowanan to ˈicel a padama to salikaka. Itiya, mahapinangay ako pafeliay ci Yihofa takowanan to fangcalay saocor, irato ko ˈicel ako padadotoc a kodait.” Soˈlin nolatekay cowa ko madoloay, o malohemay malitengay kamayan malecad ci Kitiyonan misarocod to falocoˈ ato ˈicel a midimokos to salikaka. O cacipinang cangra, o ˈicel no niyah iraay ko tolas, cowa ko sao haratengay saan a madangar ko demak. Kawrira ngaˈayay a pakasoˈlin cangra, o papacaˈofen ni Yihofa ko micangacangan nangra, pafeli to ˈicel i cangranan, padama cangranan padadotoc a mihadidi.—ˈOlic 116:1; Filipi 2:13.
18. Ano lomalen i, sasamaan ko malohemay malitengay mitodong ci Kitiyonan?
18 O malohemay malitengay ngaˈayay mikitini ci Kitiyonan minanam to adihayay kalimlaan a demak. Itini picada to hahakowa ko tayal, anoca mapakahemek ato malikaf no tao i, papaihkal to misamimingay ato misapoeneray a waywayan. Mangata mangatato ko salikoray a romiˈad, o mamangalef cangra ira ko timolo ato makahiyay midofdof a waywayan. Roma i, o papakasoˈlin cangra ano tahasiˈayaw to masamaanay a pasangar, papafelien no Kawas cangra to ˈicel a miremo. O malohemay malitengay malalokay a matayal, o aakoˈiden ita cangra, hanaca ‘padadotocen misalimla ko mahaenay a tamdaw.’—Filipi 2:29.
RADIW 82 Todongen ko Damsay ni Kristo
a Itini sapasangaray a laliyadan no likisi no Israil kitakit, minilnilan no Kawas ci Kitiyon pakaen ato midipot to finawlan Ningra. Madimadiay ci Kitiyon toniya ˈinorong maedeng 40 miheca, toniya tatokian, adihayay ko malifaay ningra a sapalifet. Onini a lalakaw mamilengo, o malohemay malitengay ano tahalifa to sapalifet i, sasamaan mitodong to taˈarawan ni Kitiyon.
b O misamimingay ato misapoeneray oniya tosa tada mararingiay a capeling. O misamimingay a tamdaw, mihayiay to cowa ko mamadangar no niyah ko roma demak, cowa ko papakidem misaareteng a minengneng to niyah. Misapoeneray a tamdaw mikangodoay to tao, o pinengneng to tao ikakaay to niyah a masakalimlaan saan. (Filipi 2:3) Tocerid, o cecay misamimingay a tamdaw, o misapoeneray ko falocoˈ a tamdaw.