Ka Picerid a Misaday a Militemoh to Romiˈad ni Yihofa

1. Mamisamaan ko demak ita wangaˈ materek a maˈorip i romiˈad ni Yihofa?

ITINI Fangcalay Cudad, ‘romiˈad ni Yihofa’ hananay i, o pipalaˈafoan ni Yihofa to ˈada a romiˈad, milidong to finawlan Ningra. Itini nolitengan, na mitefocay ci Yihofa to pinapina a kitakit. (Isaya 13:1, 6; Icikil 13:5; Cifaniya 1:8) Itini lintad no mita, ‘romiˈad ni Yihofa’ misatapangay itini piˈodis to Taˈangayay Papilon a tatokian, tahira i kafekadan no Armakiton a malahci. Toha sakaterekaw maˈorip tonini a romiˈad, nohatiniho a mitengil kita to sowal ni Yis. Palimoˈotay ci Yis kitaanan pakayni tonini ‘taˈangayay padiing’ ‘misongilaˈ a misaday,’ tatodong i, ka picerid a misaday to sapisiˈayawaw tonini a romiˈad, aka mahokaˈ to kahacecay a tatokian.—Matay 24:21; Luka 12:40.

2. Saka 1 Tisalonika iraay ko maanan epoc i kitaanan hani?

² Itini saka 1 Tisalonika, tarokos ci Pawlo kalasaka dademakay to pina sapatinako padama to Krisciyang micerid a misaday, militemoh to pisawkitan ni Yihofa a romiˈad. Mafanaˈay ci Pawlo cowa ko tatangsol a ira ko romiˈad ni Yihofa. (2 Tisalonika 2:1-3) Kawra papiceriday a misaday to salikaka, malecad to airato anocila kora romiˈad. Tengilen ita ko sapalimoˈot ni Pawlo. Nengnengen samaanay cingra mitadtad tora ilaenoay salicay: (1) Sasamaan a ira ko romiˈad ni Yihofa? (2) Cima ko caay ko mamaterek a maˈorip hani? (3) Mamisamaan kita misaday?

SASAMAAN A IRA KO ROMIˈAD NI YIHOFA?

3. O romiˈad ni Yihofa mamatiya o mitakaway a ira to dadaya, hano saan ko sowal hani? (Nengnengen ko coka.)

³ ‘Matiya o mitakaway a ira to dadaya.’ (1 Tisalonika 5:2) Sakadademakan ni Pawlo ko tolo sapatinako somowal to sasamaan ko kaira no romiˈad ni Yihofa, o saka cecay konini. Kalamkamay ko demak no mitakaway, hanaca itiniay i dadaya talifahal sanay a ira. O romiˈad ni Yihofa tatalifahal wa saan a ira, macekoken ko tamdaw. Kalikiay ko nika lingad no demak, ano o soˈlinayto a Krisciyang fafahkaˈen alatek. Kawra, cowa ko mamatira o tatiihay tamdaw cangra a mapalaˈafo.

4. O romiˈad ni Yihofa matiya o mamahofoc a fafahiyan a maˈatˈat, hano saan ko sowal hani?

⁴ ‘Matiya o mamahofoc a fafahiyan a maˈatˈat.’ (1 Tisalonika 5:3) O mamahofoc a fafahiyan cowa ka fanaˈ to hahacowa a mahofoc, kawra mafanaˈay cingra to mamafekad konini a demak. Maraodto ko toki, tatalifahal saan a mahofoc cingra alatek, misemsemay to adada, cowa ko aeca ka masadak ko wawa. Malecaday, cowa ka fanaˈ kita to romiˈad ni Yihofa, to hahacowa a ira, hahacowa a tatokian a ira, kawra pakasoˈlinay kita a ira ko romiˈad ni Yihofa. Itiyato i, o pisawkit no Kawas to mariˈangay tamdaw talifahal wasa a ira, cowa ko papakalaliw cangra.

5. O romiˈad ni Yihofa matiya o romiˈad ko kaira, hano saan ko sowal hani?

⁵ Matiya o romiˈad ko kaira. O saka tolo a sapatinako ni Pawlo miliyaw a somowal to itiniay i dadaya ko mitakaway, kawra nohatini tano monihar a patinako to romiˈad ni Yihofa. (1 Tisalonika 5:4) Itiniay i dadaya ko mitakaway, alatek ˈifowaay cangra mitakaw to dafong cowa pisinanot to toki, taengadto i, mahapinangto no tao cangra. Malecaday, o ˈalomanay a tamdaw matiyaay o mitakaway a tamdaw, itiniay i toˈemanay cangra, midemak to cowa ko kahemekan no Kawas a demak, irato ko taˈangayay padiing i, awaayto ko pilimekan nangra. Cowa ka lecad cangranan, misetekay kita eca ka pidemak to kaˈintehan ni Yihofa a demak, misamacayay ko falocoˈ midemak to “masamaamaanay a ngaˈayay, ato moecelay, ato soˈlinay” a demak, mansa maherekayto misaday kita. (Ifiso 5:8-12) Dotoc i, sakadademakan ni Pawlo ko tosa milingatay a sapatinako mitadtad, cima ko caay ko mamaterek a maˈorip itini romiˈad ni Yihofa.

CIMA KO CAAY KO MAMATEREK A MAˈORIP ITINI ROMIˈAD NI YIHOFA?

6. ˈAlomanay tamdaw matiya o mafotiˈay, hano saan ko sowal hani? (1 Tisalonika 5:6, 7)

⁶ ‘Mafotiˈay a tamdaw.’ (ˈOsien ko 1 Tisalonika 5:6, 7.) Patinakoan ni Pawlo to mafotiˈay a tamdaw koya caay ko mamaterek a maˈorip itini romiˈad ni Yihofa. Maeholto ko tamdaw i, cowato ka fanaˈ to mataˈlifay a toki ato mafekaday i taliyok a demak. Mihaenay, cowa ka fanaˈ cangra mamafekad ko maanan kalimlaan a demak, cowa ka ngaˈay a midemak to maanan. Anini, mahecaday o mafotiˈay ko ˈalomanay tamdaw. (Loma 11:8) Soˈliˈlin ihkalay ko wacay to itiniayto kita i ‘salikoray a romiˈad’ nohatini, mamafekadto ko taˈangayay a padiing, ˈarawhan cowa pikihar cangra tonini a wacay. Ano mafekad ko pina taˈangayay a demak i hekal i, itiya iraay ko paihkalay to miming a hemek mitengil to ngaˈayay lihaf no Hongti Kitakit, ˈarawhan ˈalomanay nangra miliyaway haca maehol ko fotiˈ, cowa ka talipaˈelal. Ano oyato a pakasoˈlinay to romiˈad ni Yihofa a tamdaw, maraayayho kora romiˈad sanay miharateng. (2 Pitiro 3:3, 4) Kawra mafanaˈay kita, mataˈlifto ko cecay romiˈad, mangata mangataayto ko romiˈad ni Yihofa, mankora papadadotoc kita talipaˈelal.

7. Matiya o malasangay no epah koya papalaˈafoen no Kawas a tamdaw, hano saan ko sowal hani?

⁷ ‘Malasangay no epah a tamdaw.’ Patinakoan ni Pawlo to malasangay no epah koya papalaˈafoen no Kawas a tamdaw. Malasang ko tamdaw i, o mifekaday i taliyok ningra a demak matayoayto ko piharateng, cowato ka mataneng ko pisaˈosi. Malecaday, o tatiihay a tamdaw cowa pikihar to sarikec no Kawas, o mipiliˈan nangra a kaˈorip o sakalaˈafo no niyah. Kawra palimoˈotay ko Fangcalay Cudad to Krisciyang ‘padadotoc a mapalal.’ (1 Tisalonika 5:6) Sanay ko sowal no cecay mikakingkiway to Fangcalay Cudad, o mapalalay a tamdaw “rihaday ko ponoˈ sanay, mafanaˈay mitingting to demak, matatodong ko pihapinang, matatodong ko pisaˈosi.” Hano papadadotoc kita rihaday ko ponoˈ hani? Samanen mihaen i, ngaˈ caka picapid to mirikecay anca lacongis nonini a hekal. Mangataayto ko romiˈad ni Yihofa, wa matongal ko macadaay ita a saroero, mapacieci itini tonini lacongis mipiliˈ a midama to cecay. Kawrira, aka calemcem kita, samanen o fangcalay saocor no Kawas papadama kitaanan padadotoc rihaday ko ponoˈ, mataneng ko pisaˈosi.—Luka 12:11, 12.

PAKAYNI TO ROMIˈAD NI YIHOFA MAMISAMAAN A MISADAY HANI?

8. Iraay ko pina capeling papadama kitanan micerid talipaˈelal, padadotoc mapalal, onini a capeling itini 1 Tisalonika 5:8 patatinakoan to maanan? (Nengnengen ko coka.)

⁸ Micaˈedong to ‘sapatada to falohang,’ sakafongen ko ‘kafong.’ Patinakoan ni Pawlo kita to micaˈedongay to kihcod rikoˈ no sofitay, padadotoc a talipaˈelal. (ˈOsien ko 1 Tisalonika 5:8.) Itini kalaloodan, ano hacowato o hamamisaday ko sofitay milood. Malecaday, pakayni to romiˈad ni Yihofa micerid kita a misaday, eca ka mahokaˈ. Micaˈedong to pakasoˈlinay falocoˈ ato olah a sapatada to falohang, misakafong to hatokel a kafong. Palahad tonini a capeling tada taˈangayay ko pipadama kitanan.

9. O pakasoˈlinay falocoˈ sasamaan midipot kitanan hani?

⁹ Malecad o sapatada to falohang mamidipot to falocoˈ no tireng no sofitay, o pakasoˈlinay ato ciolahay midipotay to kemod no falocoˈ ita, padama kitanan padadotoc midoko to Kawas ato mikotod ci Yisan. Ira ko pakasoˈlinay ita i, o papasoˈlin to palifonay ci Yihofa to misarocoday micangacang Cingranan a tamdaw. (Hipray 11:6) Ira ko pakasoˈlinay ita i, o mamadimadi to ˈAˈideman ci Yisan, soˈlin misiˈayaw to sapalifet cowa ko mamisafelit cingranan. Anini, ˈalomanay salikaka soˈlin misiˈayaw to hakokay anca cangoˈot to sakaˈorip, kamayan mitawmec to madimadi. Ano todongen ita cangra i, wa mapaˈicel ko pakasoˈlinay falocoˈ, miremo to pasangar. O ˈalomanay salikaka isalakatay micangacang to Hongti Kitakit misakantang to kaˈorip. Todongen ita ko taˈarawan nangra wa ngaˈay paˈicel to pakasoˈlin, caka pitiˈer to pakadafongay.b

10. Ano maolah kita to Kawas, maolahho to tao, hano ngangaˈay padadotoc a mihadidi ato mitosil?

¹⁰ To sapadadotocaw a talipaˈelal, mararid a mapalal, kalimlaan ko ciolahay a falocoˈ. (Matay 22:37-39) Maolah kita to Kawas i, o kakodait a mitosil, soˈliˈlin tahalifa to pasangaray cowa ko mamisawad. (2 Timoti 1:7, 8) Ano maolah kita toya caayho ka fanaˈ to kimad a tamdaw i, o papadadotoc a mitosil, tano masakenakenaay a pakayraan a misawacay, tinakoen tano tingwa ato tikami paladaˈ to ngaˈayay lihaf. Makalimay kita mamafalic cangra ano hacowa alatek, misatapang a midemak to moecelay a demak, cowa ko mamisawad kita mitala cangranan.—Icikil 18:27, 28.

11. Maolah kita to salikaka mamisamaan ko pidemak? (1 Tisalonika 5:11)

¹¹ O kaolahan ita a tamdaw mahawpay ko salikaka i kasakopang. Sasamaan kita patalahkal to hatiniay a olah hani? ‘Masasihinom pakalalolalok’ kita. (ˈOsien ko 1 Tisalonika 5:11.) Mahecad kita o makakapotay mamilood a sofitay, masasipaˈicel to salikaka. Itini kalaloodan i, madokaˈay no mita ko kapot a sofitay alatek, kawra cowa ko mipadetengan a mihaen. Malecaday, cowa ko papadeteng kita midokaˈ anca miˈodis to salikaka no mita. (1 Tisalonika 5:13, 15) Roma i, mamikangodo kita to mikeriday a faˈinayan salikaka. (1 Tisalonika 5:12) Tiya mitilid ci Pawlo to saka 1 Tisalonika a cudad i, faelohayho mapatireng ko Tisalonika a kasakopang cowaho pakaala to cecay miheca. O malohemay malitengay awaayho ko manan a nalifetan, ciraraway ko demak alatek, kawrira kamayan mikangodo ko salikaka cangranan. Anini, mangata mangatato ko taˈangayay padiing, mangalef ko pitiˈer ita to sakayat no malohemay malitengay, samanen anoikor latek mamalahdaw ko pirinnak ita to i congpoay ato fenpoay salikaka. Mihaenay, nohatiniho o papalahad kita to olah ato mikangodo to malohemay malitengay. Ano o mananto ko mamafekad a demak, ka padadotoc kita mapalal. Aka minengneng to dangoc no malohemay malitengay, ao mamisinanot samaanay ci Yihofa pakayni ci Yis Kristoan, mikerid tonini madimadiay a salikaka.

12. O tokel sasamaan midipot to ponoˈ ita hani?

¹² Matiya o kafong mamidipot to fongoh no sofitay, sakalidong a tokel mamidipot to ponoˈ ita. Fanekfekay ko tokel ita, mansa mahapinangay ko hekal ni Satan awaay ko maamaan a epoc i tamdaw. (Filipi 3:8) Ano ira ko tokel ita i, o rarihaday caay ka sasifod ko falocoˈ. Ci Walay aci Lawlinta itiniay i Afrika matayal, iraay ko hatiniay a nalifetan nangra. Ilalomaˈ no tolo lipay, o cecay nangra mapatayay ko wama, o cecay mapatayay ko wina, iraay ko lifong isaka 2019 miheca, awaay ko pakayraan minokay pacafay to paro no lomaˈ. Sanay ci Walay: “Samanen iraay ko patikolay maˈorip a hatokel, mansa ano maharateng niyam cangra i, cowa ko iˈayaway a tireng nangra, ao patikol maˈorip i faelohay hekal a tanoktokayto a tireng nangra. Ano masomad kako maˈilol i, onini a tokel parihadayay to falocoˈ ako.”

13. Sasamaan kita milifok to fangcalay saocor hani?

¹³ ‘Aka padengen ko namal no fangcalay saocor.’ (1 Tisalonika 5:19) Patatinakoan ni Pawlo to namal i falocoˈ ita ko fangcalay saocor. Ano iraay ko sapafeli no Kawas a fangcalay saocor i, wa faedetto ko falocoˈ ita, ˈifowa a midemak to matatodongay a demak, iraho ko ˈicel matayal to demak ni Yihofa. (Loma 12:11) Sasamaan kita milifok to fangcalay saocor hani? Tolonen a micangacang ko Kawas pafeli kitaanan to fangcalay saocor, cekiwen ko mitemeran no fangcalay saocor a Fangcalay Cudad, ato micawmaˈ to mikayatan no fangcalay saocor a likakawa no Kawas. Mihaen kita to demak i, ngangaˈayto a palahad to minaroˈan no fangcalay saocor.—Kalatiya 5:22, 23.

14. Sapadadotocaw milifok to fangcalay saocor, aka pidemak kita to maanan hani? (Nengnengen ko coka.)

¹⁴ Pafelito ko Kawas to fangcalay saocor i, ka pinaˈon kita, ‘aka padengen ko namal no fangcalay saocor.’ Edengan oya makoracay ko harateng ato waywayan a tamdaw ko pafelian no Kawas to fangcalay saocor. Ano padadotoc kita miharateng to cowa ka korac a midemakho i, caayto pafeli ko Kawas to fangcalay saocor. (1 Tisalonika 4:7, 8) Sapadadotocaw milifok to fangcalay saocor, aka a ‘misakahmaw to patemeran no Kawas a lihaf.’ (1 Tisalonika 5:20) Itini tonini a lihaf, o roma milingatay to romiˈad ni Yihofa, o roma patalipaˈelalay kitaanan macalohayto nohatini, o pakaynian no Kawas i fangcalay saocor pafeli kitaanan. Mansa, maraayayho ko Armakiton cowa ko aitini i kaˈorip ita a mifekad aka ka saan. Haratengen mangataayto konini a romiˈad, padadotoc a makorac ko waywayan, ˈifowa to midokoay a demak to romiˈamiˈad. Hato ikaˈayawayto konini a romiˈad.—2 Pitiro 3:11, 12.

‘HAPINANGEN KO MAAMAAN A DEMAK’

15. Sasamaan ko pidemak ita eca ka masaˈefit no sapatemer no tatiihay coyoh a lihaf? (1 Tisalonika 5:21)

¹⁵ Cowato ko hahalafin, o misafelitay to Kawas a tamdaw mamilasil to ‘dipayalayto’ sanay a lihaf. (1 Tisalonika 5:3) Itiyato i, o sapatemer no tatiihay coyoh a lihaf mamatenak, telocto i, malipalaway ko ˈalomanay tamdaw. (Paˈarawan 16:13, 14) Kita ano ‘hapinangen’ ko maamaan a demakan i, cowato ko mamalipalaw. (ˈOsien ko 1 Tisalonika 5:21.) Ora ‘hapinangen’ sanay a Krisiya sowal i, milingatay to mihapinangay to ekim anca linkim to o soˈlinay o makaniway hokira, patalipaˈelalay kitaanan mihapinang to matengilay anca maˈosiay a lihaf to o soˈlinay o makaniway hokira. Mihaen to demak tada masakalimlaan to i Tisalonikaay a Krisciyang, mangalefay masakalimlaan i kitaanan, samanen mangata mangataayto ko taˈangayay padiing. Aka sao maapaay a tamdaw, maamaan a sowalan pakasoˈlin sa, ao sakadademaken ko inaneng, pakayni to maˈosiay matengilay ita palalinien to Fangcalay Cudad ato sakayat no likakawa ni Yihofa. Ano mihaen i, cowa ito ko mamalipalaw, pakasoˈlin to naitiniay i tatiihay coyoh a sasowalen.—Taneng 14:15; 1 Timoti 4:1.

16. Iraay ko maanan tanektekay a hatokel ita? Mamisetek kita to falocoˈ samaan ko pidemak?

¹⁶ Kita o ˈalomanay tamdaw, mamilakowit to taˈangayay padiing. Nikawrira o tekedan a tamdaw, cowa ka fanaˈ to mamifekad ko maanan a demak nocila. (Yakop 4:14) O mamaˈorip kita milakowit to taˈangayay padiing hokiya, anca ˈayaw nonini mapatayto, ano padadotoc kita madimadi, o mamilifok to midaˈocay ˈorip malo sapalifon. O manilnilay no fangcalay saocor a Krisciyang tatayra i kakarayan malacafay ci Yisan, roma lopayˈay a siri wa itini fafekang no sera a lakoing midaˈoc maˈorip. Nanay kita maemin pamoteken ko pinengneng to makapahay a hatokel, micerid a misaday a militemoh to romiˈad ni Yihofa.