Salicay No Miˈosiay Tamdaw

Hofocen ci Yis ikor, ci Yosif aci Mariya hano caka minokay i Nacali, ao materekho i Piclihim?

Cowa ka somowal ko Fangcalay Cudad, kawra mikitini kita i patalahkalan no Fangcalay Cudad a pina a demak, ngaˈay mahela ko caˈof alatek.

Iraay ko cecay coyoh pasowalay ci Mariyaan, o cacipoyapoy mahofoc to wawa cingra. Itiya, ci Mariya aci Yosif itiniay i Nacali no Kalili a niyaroˈ. (Luka 1:26-31; 2:4) Miliyas cangra to Icip minokay tayra i Nacali ikor, itiraayto ci Yis a lomahad, malo Nacali a tamdaw. (Matay 2:19-23) Mihaenay i, masowalho ci Yis, Yosif aci Mariya i, maharatengay ita ko Nacali.

Ci Mariya iraay ko cecay salawina ci Ilisapic, itiniay i Yuta ko kitiraan ningra, o faˈinay i, o saysi ci Cakariya, ikor mahofocay cangra to Mipaputisemay a Yohanian. (Luka 1:5, 9, 13, 36) Na tayraay ci Mariya i Yuta milisoˈ ci Ilisapican, hanaca malacafay ci Ilisapican to tolo folad ikor minokayay tayra i Nacali. (Luka 1:39, 40, 56) Mihaenay haw i, mafanaˈay ci Mariya to pala no Yuta.

Ikorto, midoedoay ci Yosif to rikec mitingki to ngangan. Miliyasay cingra to Nacali tayra i Piclihim, o ‘nalacolan ni Tafiti’ itira, o masowalay no sapairasol a kahofocan ni Misiya a pala. (Luka 2:3, 4; 1 Samuil 17:15; 20:6; Mika 5:2) Mahofoc ci Mariya ci Yisan ikor, cowa ka ˈorongen ni Yosif ci Mariya ato hofoc hananayho a wawa, minokay i Nacali, ao padotocayho materek i Piclihim, samanen naitini i Piclihim tayra i Yirusalim siwaay kongli, maraayay ko rarakaten. Materekho cangra i Piclihim ngaˈ, madepoc midoedo to saˈosi no rikec miˈorong to wawa tayra i fangcalay sefi a patoˈaya.—Lifi 12:2, 6-8; Luka 2:22-24.

Pasowalan no coyoh no Kawas ci Mariya, o wawa ningra mamilifok to ‘saaroˈan ni Tafiti’ hanaca ‘malo Hongti.’ Mahapinangay ni Yosif aci Mariya alatek, itini i niyaroˈ ni Tafiti a hofocen ci Yis iraay ko taˈangayay a tatodong. (Luka 1:32, 33; 2:11, 17) Ciharatengay cangra alatek itini i Piclihim mitala to cecay liyad a tatokian, minengneng iraay ko roma a sakayat no Kawas hokira.

Tahira i Piclihim ko miangangay i, hakowaayto ko halafin ni Mariya aci Yosif materek itira, cowa ka fanaˈ kita. Kawra sowal no sinael, itiya mapolongay cangra a maroˈ i cecay a lomaˈ, hanaca o ‘wawato’ ci Yis, cowato ko ˈengaenga cingra. (Matay 2:11) Ano nengnengen i, halafinayto a materek cangra i Piclihim, hanaca iraayto ko no niyah a lomaˈ.

Palimoˈotay ci Hiroti mipatay to ‘ilaenoay no tosa miheca faˈinayan a wawa . . . i Piclihim ato taliyokay a pala.’ (Matay 2:16) Midoedoay ci Yosif aci Mariya to limoˈot no Kawas, miˈorong ci Yisan milaliw tayra i Icip, hanaca materek itira tahira kapatayan ni Hiroti. Kawra miliyas cangra to Icip ikor cowa ka pinokay tayra i Piclihim, misamaanay hani? Samanen o mikowanay to Yutiya itiya o wawa ni Hiroti ci Arkilaus, tada mariˈangay cingra. Roma i, palimoˈotayho ko Kawas ci Yosifan aka a patikol. Oranto i, miˈorongay ci Yosif to paro no lomaˈ pasiˈamis tayra i dipayalay a Nacali, itiraayto palahad ci Yisan, pasifanaˈ cingranan midoko to Kawas.—Matay 2:19-22; 13:55; Luka 2:39, 52.

Ano nengnengen ci Yosif itiniay i ˈayaw no pikinafalah ni Yis to ˈorip mapatayayto. Ikor no pikinafalah ni Yis to ˈorip ngaˈ, iraayto ko hapakayraan no tamdaw tayra i kakarayan, mankora wa itini i fafekang no sera ci Yosif a patikol maˈorip. Itiyato i, mamaˈaraw no ˈalomanay tamdaw ci Yosif, mitengil to pipasowal ningra, cingra aci Mariya ikor no hofocen ci Yis misamaanay hano padadotocho a materek i Piclihim.