LALENGOEN LALAKAW 50
Ira ko Pakasoˈlinay Falocoˈ Iraho ko Noka Pidemak, Wangaˈ Malo o Moecelay a Tamdaw
‘Todongen ko pakasoˈlinay falocoˈ ni Apraham a midemak.’—LOMA 4:12.
RADIW 54 Pakasoˈlinen ko Falocoˈ Ita
KALIMLAAN NO LALAKAWa
1. Ano lengoen ita ko pakasoˈlinay falocoˈ ni Apraham, sasamaan ko piharateng ita hani?
PAKATENGILAY ko ˈalomanay tamdaw ci Aprahaman, kawra cowa ka adihay ko nika fanaˈ nangra cingranan. Nikawrira, kiso i, adihayay ko nika fanaˈ pakayni to demak ni Apraham, tinakoen sowal no Fangcalay Cudad o wama no polong pakasoˈlinay ko falocoˈ a tamdaw hananay cingra. (Loma 4:11) Alatek wa saan kiso miharateng: “Ngangaˈay kako a mitodong ci Aprahaman, matiya cingranan a tanektek ko nika pakasoˈlin no falocoˈ han?” Hayi, ngangaˈay kiso.
2. Hano mamicekiw kita to maˈoningay pakayni ci Aprahaman, hanaca misinanot to taˈarawan ningra hani? (Yakop 2:22, 23)
2 Sapalahadaw to matiraay ni Apraham a pakasoˈlinay falocoˈ, o pakayraan i, micekiw to maˈoningay pakayra cingranan, misinanot to taˈarawan ningra. Mitengilan ni Apraham ko sapalimoˈot no Kawas, malinah tayra i maraayay a pala, kalalomaˈ han ko pakopangan halafin a mihecaan, kalim sanay patafang to kanonoˈan a wawa ci Isakan malo sapatoˈaya ci Yihofaan. Mihaen cingra samanen tada mitiˈeray ci Yihofaan. Pakayni to nika pakasoˈlin ato pidemak ningra, milifokay to pihayda ni Yihofa ato malawidang Ningra. (ˈOsien ko Yakop 2:22, 23.) Halamhamay ci Yihofa kitanan maemin, mahawpay kiso, ngangaˈay milifok to pihayda ato malawidang Ningra. Mihaenay, mikayatan Ningra ci Pawlo aci Yakop somowal to tinakoan ni Apraham i Fangcalay Cudad. Dotoc mamikitini kita i Loma saka 4 fedengan ato Yakop saka 2 fedengan, milengo to taˈarawan ni Apraham. Pakayni tonini madimadiay sikawdan i nolitengan, onini tosa fedengan misaka dademakay to cecay kalimlaan a sowal.
3. Misaka dademakay ci Pawlo aci Yakop to maanan a sinael?
3 Ci Pawlo aci Yakop misaka dademakan to sowal i Satapangan 15:6, sanay koniya sinael: ‘[Ci Apraham] pakasoˈlinay a midofdof ci Yihofaan, malo o moecelay a tamdaw hananay no Kawas a minengneng cingra.’ Malo o moecelay tamdaw hananay, tatodong i, mihaydaan no Kawas cingra, o makoracay awaay ko raraw sanay. O cowa ka lefot, ciraraway a tamdaw, ˈarawhan makoracay awaay ko raraw han no Kawas a minengneng, tada kafahkaˈan konini! Maedeng halamhamay kiso to o moecelay han no Kawas kiso a minengneng, hayi, o mamalaˈosi konini. Samaan ko pidemak hani? Salakat cacipinang kita, misamaanay hano o moecelay tamdaw han ni Yihofa a minengneng ci Apraham.
IRA KO PAKASOˈLINAY FALOCOˈ WANGAˈ
4. O maanan a lalangian micongeday to tamdaw malo o moecelay hani?
4 O sowal ni Pawlo itini Loma cudad, ciraraway ko tamdamdaw sanay. (Loma 3:23) Ano mahaenay i, hano o moecelay awaay ko raraw han no Kawas minengneng ko tamdaw, hanaca milifok to pihayda no Kawas hani? Toha sapadamaaw to polong misasoˈlinay ko falocoˈ a Krisciyang makilim ko sapacaˈof, somowalay ci Pawlo to tinakoan ni Apraham.
5. O manan a lalangian malo o moecelay tamdaw han ni Yihofa ci Apraham hani? (Loma 4:2-4)
5 Miliyas ci Apraham to nalacolan, itiniay i Kanan maˈorip, itiyaay malo o moecelay tamdaw hananay ni Yihofa cingra. Hano ngaˈay malo o moecelay tamdaw han ni Yihofa ci Apraham hani? Samanen malefotay ko pidofdof ni Apraham to Rikec ni Mosi han? Cowa ka hatira. (Loma 4:13) Soˈlinay haw i, malo o moecelay han no Kawas ci Apraham ikor, mataˈlif ko 400 mihecaan ngaˈ milasilan ko Rikec ni Mosi i Israil tamdaw. Ano hatiraay i, manan ko lalangian ni Yihofa palo moecelay tamdaw ci Aprahaman hani? Iraay ko pakasoˈlinay falocoˈ ni Apraham ci Yihofaan, patalahkalan ni Yihofa cingra to mikiriwiˈay a sidaˈit, malo o moecelay tamdaw han no Kawas cingra.—ˈOsien ko Loma 4:2-4.
6. O ciraraway tamdaw o moecelay han ni Yihofa a minengneng, tatodong nonini sasamaan ko pidemak Ningra?
6 Somowalay haca ci Pawlo, midofdof mihakelong ko tamdaw to Kawas ‘ngangaˈay pakayni noka pakasoˈlin no falocoˈ malo o moecelay tamdaw.’ (Loma 4:5) Dotoc mitadtaday ci Pawlo: ‘Somowalay ci Tafiti o cowa ko pakayniay i waywayan malo o moecelay tamdaw han no Kawas, o malemeday a tamdaw cingra. Sowal ningra: “Masododay ko mararaway waywayan, matahepoay ko raraw a tamdaw, tada malemeday! Cowa ko ciraraway han ni Yihofa a tamdaw tada malemeday!” ’ (Loma 4:6-8; ˈOlic 32:1, 2) O tamdaw ano paihkal to nika pakasoˈlin to Kawas, sasododen no Kawas, mitahepo ko raraw nonini a tamdaw. Sasahcien no Kawas misodod cingra, caayto ko ciraraway a tamdaw han cingra. Tona paihkalay konini tamdaw to pakasoˈlinay falocoˈ, o moecelay, makoracay awaay ko raraw, hananayto no Kawas minengneng cingra.
7. Mikitini i maanan a pakayraan, nolitengan a madimadiay midokoay to Kawas a tamdaw o moecelay han hani?
7 Soˈliˈlin ci Apraham, Tafiti ato nolitengan romaroma madimadiay midokoay to Kawas a tamdaw malo o moecelayto a tamdaw hananay, kawra kamayan o cowa ka lefot ciraraway tamdaw cangra. Nikawrira, tona iraay ko pakasoˈlinay falocoˈ, malo o makoracay awaay ko raraw hananay no Kawas, itini i pinengneng no Kawas cangra atoya cowa ka pakasoˈlin to Kawas a tamdaw taˈangayay ko kasasiroma. (Ifiso 2:12) Itini Loma a cudad ihkalay ci Pawlo mitadtad, o tamdaw ano sakalawidangaw ni Yihofa, ira ko pakasoˈlinay a falocoˈ wangaˈ. Ci Apraham aci Tafiti o mahaenay, ano kitato i, o mamihaen ko demak.
O PAKASOˈLINAY FALOCOˈ ATO DEMAK IRAAY KO MAANAN A KALALITING?
8-9. Pakayni to sowal ni Pawlo aci Yakop, o romaroma tamdaw iraay ko maanan mararaway a pinengneng? Hano ira ko mahaenay a pinengneng nangra hani?
8 Pinaayto a hahekalan, pakayni to kalaliting no pakasoˈlinay falocoˈ ato demak, o cowa ka lecad a Kakeridan no Pidoyongan padadotocay malacongis cangra. O romaroma misasingsiay pasowalay, ano pakasoˈlinho ci Yis Kristoan mamalidongto ko ˈorip. Alatek matengilay iso ko sowal nangra: “Pakasoˈlin ci Yisan a malidong” sanay. Misaka dademakan nangra ko sowal ni Pawlo: ‘O tamdaw “cowa ka pakayni i waywayan” ngaˈayayto “malo o moecelay han no Kawas.” ’ (Loma 4:6) Kawra, o sowal no romaroma misasingsiay: “Ngaˈayay kiso pakayni i waywayan malidong ko ˈorip.” Tatodong i, milihay kiso mitoor to sowal no kiyokay a midemak, o ngangaˈayto malidong ko ˈorip sanay. Alatek misaka dademakan nangra ko sowal no Yakop 2:24: ‘O tamdaw malo o moecelay han i, o pakayniay i demak, cowa ko pakayni aca i pakasoˈlinay falocoˈ.’
9 Samanen cowa ka hecahecad ko pitadtad, o romaroma mikakingkiway to Fangcalay Cudad a tamdaw pakayni sasamaan ko tamdaw milifok to pihayda no Kawas, cowa ka hecad ko pinengneng ni Pawlo aci Yakop sanay. Sowal no roma misasingsiay, harateng ni Pawlo o tamdaw cowa ko pakayniay pitiˈer to midemakan, ao pakayniay pakasoˈlinay falocoˈ mapangangan no Kawas to moecelay a tamdaw, kawra harateng ni Yakop sapilifokaw to pihayda no Kawas, kalimlaan ko midemakan. Sowal no cecay singsi no kiyokay sanay: “Cowa ka cipinang ci Yakop, hano misaˈicel ko sowal ni Pawlo cowa ko midemakan ko mitiˈeran no tamdaw, ao pakasoˈlinay falocoˈ ko mitiˈeran malo o moecelay.” Nikawrira, mitilid ci Pawlo aci Yakop toniya sowal sahtoay o mikayatan no Kawas. (2 Timoti 3:16) Mihaenay, o sowal ni Pawlo aci Yakop hato masasongtolay a nengnengen, maedeng iraay ko matatodongay a pitadtad. Soˈlinay i, o pinengneng aca ita to fafekangay ato ilaenoay lalakaw o mamafanaˈto.
Misaˈicelay ko sowal ni Pawlo to Yutaya Krisciyang, ngaˈay malo o moecelay tamdaw, o pakayniay i pakasoˈlinay falocoˈ, cowa ko pakayniay i pidofdof to rikec a waywayan (Nengnengen ko saka 10 fatac)b
10. O misowalan ni Pawlo a ‘waywayan’ o maanan ko mitoroˈan hani? (Loma 3:21, 28) (Nengnengen ko coka.)
10 O nisowalan ni Pawlo itini i Loma saka 3 ato 4 fedengan a ‘waywayan’ i, o maanan ko mitoroˈan hani? Sakakaay i, ‘midofdofay to rikec a waywayan,’ onini a rikec oya sapafeli ni Yihofa to Israil tamdaw i Sinay Lotok a rikec ni Mosi. (ˈOsien ko Loma 3:21, 28.) Mitilid ci Pawlo to Loma cudad i, ano nengnengen harateng no romaroma Yutaya Krisciyang o mamidofdofho to Rikec ni Mosi sanay. Mihaenay, tano tinakoan ni Apraham ci Pawlo a mitadtad, o cecay tamdaw malo o moecelay han no Kawas a minengneng, o pakayniay i pakasoˈlinay falocoˈ, cowa ko pakayniay i ‘pidofdof to rikec a waywayan.’ Mafanaˈ tonini tada pakalalokay kitanan! Papakasoˈlin kita, o ngangaˈay kita malo o moecelay han no Kawas a minengneng. Ano pakasoˈlinay kita to Kawas aci Kristoan i, salikor o ngangaˈay kita milifok to pihayda no Kawas.
Pakalalokay ci Yakop to Krisciyang, tano ‘midemakan’ patalahkal to pakasoˈlinay falocoˈ, tinakoen ngaˈayay ko picada to tao, eca ka misakakinih (Nengnengen ko saka 11-12 fatac)c
11. O misowalan ni Yakop a ‘midemakan’ o maanan ko mitoroˈan hani?
11 O roma pakayraan i, masowalay i Yakop saka 2 fedengan a ‘midemakan,’ cowa ko misowalan ni Pawlo ‘midofdofay to rikec a waywayan,’ ao waywayan no Krisciyang i cerid no kaˈorip. O hatiniay a waywayan wa mahapinang o Krisciyang soˈlinay a pakasoˈlin to Kawas hokira. Dotoc nengnengen ita ko milengoan ni Yakop tosa a tinakoan.
12. Samaanay ci Yakop mitadtad to kalaliting no midemakan ato pakasoˈlinay falocoˈ hani?
12 Itini saka cecay tinakoan, sowal ni Yakop o Krisciyang cowa ka ngaˈay misakakinih micada to tamdaw. Masowalay ningra o cecay tamdaw ngaˈayay ko picada to cihafayay tamdaw, misakahmaway to manikaway tamdaw. Patodicekay ko sowal ni Yakop, o mahaenay tamdaw alatek iraay ko pakasoˈlin no niyah sanay, kawra ora mahecaday a midemakan ningra icowaay hani? (Yakop 2:1-5, 9) Itini saka tosa tinakoan, masowalay ni Yakop o tamdaw maˈaraw ko ‘salikaka cowa ka edeng ko rikoˈ, cangoˈotay ko kakaenen toya romiˈad,’ kawra cowa pilayaˈ to kamay a midama. Onini a tamdaw alatek iraay ko pakasoˈlin no niyah saan, kawra o pakasoˈlin ningra awaay ko midemakan a midama, o manan ko epoc hani? Mahecad to nisowalan ni Yakop, ‘awaay ko midemakan a pakasoˈlin o mapatayay,’ sanay.—Yakop 2:14-17.
13. Tano maanan tinakoan ci Yakop mitadtad, o pakasoˈlinay falocoˈ pairaen ko midemakan a midama? (Yakop 2:25, 26) (Nengnengen ko coka.)
13 Masowalayho ni Yakop ci Lahap, somowal to tano midemakan a patalahkal cingra to pakasoˈlin a ngaˈayay taˈarawan. (ˈOsien ko Yakop 2:25, 26.) Onini a ˈalafang fafahiyan tahatengilay to pakayniay ci Yihofaan a demak, hanaca mahapinangay to iraay ko sadama ni Yihofa to Israil tamdaw. (Yosuwa 2:9-11) Samaanay cingra tano midemakan patalahkal to pakasoˈlin hani? Midipotan ningra ko tatosaay tahalifaay to katalawan misolapay no Israil, telocto malecaday cingra ci Aprahaman, soˈlin cowa ko malefotay a tamdaw, o moecelay sanay ko pinengneng no Kawas. Mikitini patirengan ningra ngaˈayay taˈarawan mahapinangay ita, o pakasoˈlin no falocoˈ pairaen ko midemakan a midama.
14. O sowal ni Pawlo aci Yakop awaay ko kasasongtolan hano saan hani?
14 Komoden somowal ko i fafekangay i, ci Pawlo aci Yakop mikitiniay i cowa ka lecad a pakayraan mitadtad to pakasoˈlin no falocoˈ ato midemakan. Sapasowalaw ci Pawlo to i Yutayaay a Krisciyang, pakayniay noka pidofdof to Rikec ni Mosi a waywayan nangra, cowa ko mamilifok to pihayda ni Yihofa. O paˈicelan ni Yakop i, polong a Krisciyang o papakayni i ngaˈayay waywayan patalahkal to pakasoˈlinay falocoˈ.
Pakayniay kiso i pakasoˈlinay falocoˈ a makahi midemak to kaolahan ni Yihofa a demak han? (Nengnengen ko saka 15 fatac)
15. Sasamaan kita tano midemakan patalahkal to pakasoˈlinay a falocoˈ?
15 Cowa pasowal ci Yihofa, ano ciharatengay kita o moecelay tamdaw han Ningra minengneng i, o hahaenen ni Apraham ko demak. Soˈlinay haw i, adihayay ko hapakayraan ita pakayni midemakan a patalahkal to nika pakasoˈlin no falocoˈ. Tinakoen, ngaˈayay kita mihamham to faelohay tamdaw tayni i kasakopang, padama to mapadesay a salikaka, ato sangaˈayen ko paro no lomaˈ no niyah. Mihaen ko demak ita, mamilifok to pihayda no Kawas ato sapalemed. (Loma 15:7; 1 Timoti 5:4, 8; 1 Yohani 3:18) O roma i, ano fanekfek kita mitenak to ngaˈayay lihaf no Hongti Kitakit, o ngaˈayay pakayraan patalahkal to pakasoˈlin no falocoˈ. (1 Timoti 4:16) Kita maemin ngangaˈay pakaynien i midemakan patalahkal, pakasoˈlinay kita to mamalaˈosi ko mikiˈokan ni Yihofa, hanaca pakasoˈlin to sahtoay o sangaˈayay ko pakayraan Ningra a dademak.
MITAWMEC TO TOKEL PAPAˈICEL TO PAKASOˈLINAY FALOCOˈ
16. Iraay ko maanan a hatokel ni Apraham? Pakasoˈlinay cingra to maanan?
16 Pakayni ci Aprahaman, ngangaˈayho kita mikitini Loma saka 4 fedengan minanam to cecay kalimlaan a kimad: o tokel hananay i, tada masakalimlaan. Mikiˈokay ci Yihofa, mamalo ‘wama no adihayay kitakit’ ci Apraham, hanaca o kasafinacadan mamikitini ci Aprahaman a milifok to sapalemed. Tada fangcalay ko sapafeli ni Yihofa ci Aprahaman a hatokel! (Satapangan 12:3; 15:5; 17:4; Loma 4:17) Kawrira, 100 ko mihecaan ni Apraham, 90 ko mihecaan ni Sara i, onini a mikiˈokan no Kawas kamayan cowaho ka malaˈosi. Kitinien i pinengneng no tamdaw, ci Apraham aci Sara caayto ko mamahofoc to wawa. Pakaynien ci Aprahaman ko sowal, onini a demak tada milifetay to pakasoˈlin no falocoˈ ningra. Kawrira, ci Apraham ‘kamayan mikitini i tokel, pakasoˈlin to mamalo wama no adihayay kitakit ko niyah.’ (Loma 4:18, 19) Salikor malaˈosiayto ko mitokelan ni Apraham! Mahofocayto to halafinay talaen a faˈinayan a wawa ci Isakan.—Loma 4:20-22.
17. Hano ngaˈay kita malo o moecelay tamdaw han ni Yihofa a minengneng ato widang Ningra hani?
17 O ngangaˈay kita matira ci Aprahaman, milifok to pihayda no Kawas, o moecelay tamdaw han Ningra minengneng ato malawidang Ningra. Mankora, sanay ci Pawlo: ‘ “Malo o moecelay tamdaw” saan a sowal i, cowa ko pakayraay aca [ci Aprahaman] a tiliden. Ano ngangaˈay kita malo o moecelay tamdaw hananay, onini a sowal pakayniay kitanan ko sapitilid, samanen pakasoˈlinay kita to Kawas, pasoˈlinay to patikolanto Ningra a paˈorip ko tatapangan ita ci Yis Kristo.’ (Loma 4:23, 24) Matira ci Aprahaman, ira ko pakasoˈlinay falocoˈ ita, ato midemakan, pairaayho ko hatokel. Itini Loma saka 5 fedengan, mitongalay haca ci Pawlo somowal to hatokel no mita. Ilaenoay a lalakaw, nengnengen ita samaanay ko sowal ni Pawlo.
RADIW 106 Mala Widang ni Yihofa
a Sapilifokaw kita to pihayda ni Yihofa, malo o moecelay a tamdaw han Ningra a minengneng. Onini a lalakaw mikitiniay i mitilidan ni Pawlo aci Yakop a sinael mitadtad, hano ngaˈay kita malo o moecelay a tamdaw, ato hano ira ko pakasoˈlinay a falocoˈ ato midemakan, wangaˈ milifok to pihayda ni Yihofa.
b TATODONG NO COKA: Patalipaˈelalay ci Pawlo to Yutaya Krisciyang, o sasaaretengen i, o pakasoˈlinay falocoˈ, cowa ko ‘midofdofay to rikec a waywayan,’ o mahaenay waywayan mahawpay ko i lawac no rikoˈ mitaˈis to kandaway a kaˈered, misalisin to Mitaˈlifay Lisin, ato misikay to sakakorac a demak.
c TATODONG NO COKA: Pakalalokan ni Yakop ko Krisciyang ka pakayni i ngaˈayay waywayan patalahkal to pakasoˈlinay falocoˈ, tinakoen pasayra i manikaway a tamdaw mihadak to sapadama.