Tano Pinengneng no Kawas a Minengneng to Komaenay to Epah a Demak

MAEDENG misalimlaay kiso to sapafeli ni Yihofa tisowanan a masakenakenaay a sapatelong, maedeng miakoˈiday kiso Cingranan pafeli tisowanan to pasalatay noka piharateng, ngaˈayay a misaˈosi to sasamaan a rihaked tonini a sapatelong. Mikitini Fangcalay Cudad, o epah hananay i, o cecay a sapatelong no Kawas kitanan. Sowal no sinael: “O sakalipahak no tamdaw a matawa ko pitahka, maedeng a palipahak to tamdaw a malawla ko epah.” (Patnakay 10:19; ˈOlic 104:15) Nikawrira, mafanaˈay kiso alatek itini kakomaen to epah o roma tamdaw cowa ka pakaˈimer. O roma sa i, itini cowa ka lecad a kitiraan no hekal, cowa ka lecad a serangawan, pakayni kakomaen to epah cowa ka lecad ko pinengneng. Ano hatiraay i, o maanan ko papadama to Krisciyang itini kakomaen to epah mataneng ko pisaˈosi hani?

Ano icowaayto ko kitiraan ita, anca o manan ko kalomahadan ita a serangawan, ano tano pinengneng no Kawas ko pinengneng ita to demak, misaˈosi, o mamalifok ko tahadaˈocay a epoc.

Mahapinangayto iso alatek ˈalomanay tamdaw marariday a komaen to epah, adihayay ko miˈowakan. O roma tamdaw komaen to epah i, pakayniay sapisayaraw to roray, o roma tamdaw i, tano epahay miwalawal to cariraw. Itini i roma a pala, haliepahay o tadamaanay a tamdaw, tada o faˈinayan sanay ko pinengneng nangra.

Nikawrira, o Krisciyang wa ngaˈay mikitini sidaˈitay a Misangaˈay a Tatapangan milifok to citanengay a sakayat. Tinakoen, patalipaˈelalay ci Yihofa kitanan o pakinaliay a komaen to epah kaadayayan ko teloc. Taneng 23:29-​35 somowalay to tatiihay a waywayan no malasangay a tamdaw, ato pairaan no malasangay a pina a pasangaray.a Ci Taniil itiniay i Iwropa, o malohemay malitengay no kasakopang, milomal cingra to kaˈorip no niyah i ˈayaw no malo Krisciyang, sanay: “Isaˈayaw marariday kako adihay ko miˈowakan a epah, telocto adihayay ko mararaway a misaˈosian, tahalifaayho to adihayay kasomadan a demak. Kararomanto ko itiyaayho a nokaˈorip, ano maharateng koniya demak tada masomaday kako.”

O Krisciyang sasamaan misaka dademak to pasalatay noka piharateng citaneng ko pisaˈosi, ho eca ka pakinali a komaen to epah a paira to pasangaray hani? Hapakayraan i, papikayaten ko pinengneng no Kawas to harateng ato waywayan ita.

Dotoc i, lengoen ita samaanay ko sowal no Fangcalay Cudad pakayni to komaenay to epah, halo minengneng to pina lalangian to sakakomaenaw to epah ko tamdaw.

PALINIAN NO FANGCALAY CUDAD

Cowa pirikec ko Fangcalay Cudad to tamdaw matatodong ko kakomaen to epah. Soˈlinay haw i, sowal no Fangcalay Cudad komaen to epah o sakarihaked sanay. Tinakoen, maˈosiay ita itini Fangcalay Cudad: “Dada, kahemek a komaen to hemay, kalipahak a komaen to epah iso.” (Patnakay 9:7) Nolatekay komaenay ci Yis to epah, romaroma madimadiay midokoay ci Yihofaan a tamdaw mahaenay ko demak.​—Matay 26:27-​29; Luka 7:34; 1 Timoti 5:23.

Roma i, ihkalay ko sowal no Fangcalay Cudad, o matatodongay ko kakomaen to epah ato malasangay no epah cowa ka hecad. Patodicekay ko sowal no Fangcalay Cudad ‘aka malasang no epah,’ sanayho ko sowal ‘o malasangay no epah i . . . cowa ko mamicada to Hongti Kitakit no Kawas.’ (Ifiso 5:18; 1 Korinto 6:10) Itiniay mahapinang, tada mirikecay ci Yihofa to pakinaliay komaen to epah ato malasangay no epah a waywayan. Aka mapawan, ano misaˈosi kita tonini demak i, aka doedoen ko serangawan no niyah, ao mamidofdof to sakayat no Kawas.

O roma tamdaw miharateng, adihay ko mikaenan a epah cowa ko mamalasang kako sanay. Nikawrira, tada katalawan ko mahaenay a pakayraan. Ihkalay a somowal ko Fangcalay Cudad, o tamdaw ano ‘pakinali a miˈowak to epah,’ latek o caciraraw ko demak, mipalak to nika lalaˈed no niyah aci Yihofa. (Titus 2:3 ato roma pihongyak; Taneng 20:1) Parikecay ci Yis, ‘pakinaliay miˈowak to epah’ mamiconged to tamdaw micomod i faelohay hekal no Kawas. (Luka 21:34-​36) Ano hatiraay i, toha sakaecaaw ira ko pasangar to nika komaen to epah, sasamaan ko pidemak no Krisciyang hani?

KINSAAN KO KEMOD NO FALOCOˈ ATO NANAMAN NO NIYAH

Pakayni komaenay to epah, o tamdaw ano niyah aca a nanaman no serangawan ko miharatengan tada masakatalawanto. Itini noka komaen ato nipinanom, mamisaˈicel ko Krisciyang midoedo to kahemekan ni Yihofa a pakayraan a misaˈosi, ngaˈ o matanengay. Palimoˈotay ko Fangcalay Cudad kitanan: “O nika komaen, o nipinanom, ato nipidemak namo to maamaan i, kao sapahemek to Kawas a maemin.” (1 Korinto 10:31) Haratengen ko ilaenoay a salicay ato milingatay a safalod no Fangcalay Cudad.

Komaen kako to epah i, sapinaolaw to ˈalomanay han? Sowal no Kasadakan 23:2 sanay: ‘Aka ka pikihatiya to ˈalomanay midemak to tatiihay.’ Patalipaˈelalay ci Yihofa to Israil tamdaw, aka mihakelong toya kapiliˈan Ningra a tamdaw. O sapatalipaˈelal to aniniay Krisciyang konini. Pakayni kakomaen to epah, ano sapitooraw aca ita to harateng no tao a midemak, mamisafelit to palinian ni Yihofa alatek, mamalahdawto ko kalawidang Cingranan.​—Loma 12:2.

Komaen kako to epah o sapasengiaw to tada idahiyay kako han? Itini romaroma serangawan, mararid komaen to epah adihay ko miˈowakan o marariday a maˈaraw, awaay ko maanan nonini sanay ko piharateng no tamdaw. (1 Pitiro 4:3) Kawra sinanoten ko 1 Korinto 16:13 sanay ko sowal: ‘Ka palal ko falocoˈ namo, tanekteken itini pihakelongan, sano faˈinaˈinayen, sakiemelen ko demak.’ Ano hatiraay i, komaen to epah papadama to tamdaw malo kiemelay a tanektek han? Cowa. Masafelitay, o epah mipalakay to inaneng a misimsim ato ˈicel a dademak, miapaay to tamdaw. Mankora, pakinali ko kakomaen to epah cowa ko idahiyay, ao malonayay. Mahaen o sowal ni Isaya 28:7, masinawar ko rakat to nika lasang misawarawara ko hawang, mararawto ko pisaˈosi.

Kita ano sakairaaw ko soˈliˈlinay a ˈicel, mamitadiˈec ci Yihofaan, ‘padadotoc a talipaˈelal, tanekteken itini pihakelongan.’ (ˈOlic 18:32) Sapakadangaraw tonini, papadadotoc kita a talipaˈelal, hanaca kiemelen ko pidemak, liyasen ko kihcod mamipalak to kalalaˈed ita ci Yihofaan a demak. Itiniho i fafekang no sera ci Yis i, patalahkalay to mahaenay a ˈicel, mankora tada misakangodoay ko ˈalomanay tamdaw cingranan, o soˈliˈlinay a faˈinayan cingra, o tanoktokay timoloay a tamdaw saan ko pinengneng cingranan.

Pakayniay kako i komaen to epah a milimek to pasangaray han? Cecay mitiliday to ˈOlic itini sakayat ni Yihofa sanay ko sowal: ‘Yo adihay ko rawraw ato rarom no falocoˈ ako i, mihinom Kiso [Yihofa] i takowanan, sakarihaday ko falocoˈ ako.’ (ˈOlic 94:19) Ano adihayay ko cariraw iso, aka pakayni kakomaen to epah mifasaw to cariraw, ao papasayra ci Yihofaan micangacang to sahinom. Ngangaˈay kiso micerid mitolon ci Yihofaan. Roma i, mahapinangay no ˈalomanay salikaka, pasayra i matenesay a widang i kasakopang micangacang to sapaini taˈangayay ko sapadama. Soˈlinay haw i, pakaynien i kaadihay ko mikaenan epah a misiˈayaw to pasangar sa i, ˈarawhan milowanay aca to ˈicel, awaayto ko ˈicel midemak to matatodongay a demak. (Hosiya 4:11) Ifafekang masowalay ci Taniil sanay: “Isaˈayaw ano adihay ko cariraw ato kakeseman no falocoˈ ako, komaenay kako to epah mifasaw to cariraw. Kawra matongalay ko pasangaray, malahdawayho ko widang ato tariˈang no niyah.” Ikor samaanay ko demak ni Taniil hani? Sanay cingra: “Mahapinangay ako o soˈlinay misaalian ako i, ci Yihofa, cowa ko epah. Pakayni pitiˈer to sapadama ni Yihofa, maremoayto ako ko pasangaray no niyah.” Haratengen, soˈlin pasangar ko kaˈorip ita, to cerid itiniay i tatihi ita ci Yihofa padama ato mihinom kitanan.​—Filipi 4:6, 7; 1 Pitiro 5:7.

Ano latelatekay komaenay kiso to epah, tanamen tano ilaenoay a salicay mifolfol to pakayraan no niyah: Na somowalay ko paro no lomaˈ anca widang to calemcemay cangra to nanaman ako a komaen to epah han? Ano hatiraay i, somowalay konini to mapalahaday iso ko tatiihay a nanaman, kawra cowa ka hapinang no miso. Adihayay to itiyaayho ko pikaen ako to epah han? Ano hatiraay i, latek palidlid sanayto kiso misatapang pakinali a komaen to epah. Ano caka komaen kako to epah to pina romiˈad cowato ka tomeseng han? Ano hatiraay i, o mahiyanayto no epah kiso, mamikilim kiso to sapadama no ising, hongaˈ pakaremo tonini a demak.

Misimsim to pairaan no komaenay to epah a katalawan i, o roma Krisciyang misaˈosiay cowa ka piˈiniˈinip to epah. Roma i, o roma Krisciyang cowa ka komaen to epah, samanen mapiliˈay to hanek no epah. O widang iso ano misaˈosiay eca ka komaen to epah, o kakangodoen iso ko mipiliˈan ningra, aka pilikaf cingranan, mihaen i, o sakangaˈay i cingranan.

Mahapinangay iso alatek, saˈosien ko pina sakeceng o citanengay a demak. O cecay Krisciyang mamikeceng to hahakowa ko kakaenen a epah no niyah alatek, anca mikeceng to kakinapina a komaen to epah, cecay lipay kinacecay alatek, anca itini kakomaenan komaen to miming a epah. O roma tamdaw mikecengayho to manan ko kakaenen a epah, tinakoen matatodong ko mikaenan a fadisosoˈ a epah anca o pilo, kawra cowa ka komaen to ciˈicelay kacedahay a epah anca o pacacamolan a epah. Ikor no misaˈosi ko tamdaw to komaenay to epah a demak, mamadoloto mitoor a midemak. O matenesay a Krisciyang ano mihaen ko mipiliˈan, hanaca tahatolas ko pitoor to misaˈosian no niyah, cowato ko papakayni a mangodoen cingra.

Itini kakomaen to epah, oha mamisikor kita to piharateng no tao. Loma 14:21 sanay ko sowal: ‘Ano o sakapolin no salikaka iso, ano komaen to titi, komaen to epah, anca romaroma a demakan, aka pidemak ko ngaˈay.’ Sasamaanen iso a misaka dademak ko safalod nonini sinael hani? Patalahkalen ko nika olah to salikaka. Komaen kiso to epah ano tatiihen ko harateng no roma tamdaw i, toha sapatalahkalaw to olah i cingranan, makahi kiso misawad to fadangalan no niyah han? Mihaen kiso to demak paihkalay to mikangodoay to tao, patadoay to tao a miharateng, cowa ko niyah aca sakangaˈay ko misikoran.​—1 Korinto 10:24.

Roma i, patirengay ko sifo to pina milingatay to komaenay to epah a sarikec, o mamidofdof ko Krisciyang. Tinakoen, alatek misaˈosiay ko sifo to matatodongay mihecaan no komaenay to epah, alatek mikecengay to tamdaw ikor no komaen to epah cato ka ngaˈay parakat to tosiya anca misaka dademak to kikay.​—Loma 13:1-5.

Adihayay ko sapafeli ni Yihofa kitanan masakalimlaan a sapatelong. Pafeliho kitanan to tariˈang, iraay ko pasalat ita mipiliˈ sasamaan misaka dademak tonini a sapatelong, mahawpay itini kakaenen ato kakomaen to epah o niyah ko mipiliˈ. Nanay kita maemin salimlaen ko sapafeli no kakarayan Wama masakalimlaan a pasalat, misarocod citaneng ko misaˈosian, pakahemek Cingranan.