¿Chiuu tjeiʼyuunaʼ ee na jndyena ñʼoom na tso Satanás?

Adán ñequio Eva tja̱na ee na jlaʼquieʼ nʼomna nnom Tyʼo̱o̱tsʼom (Génesis 3:6, 23; 2 Corintios 11:3)

Seiyuʼ Eva ñʼoom na tso catsuu ndoʼ joʼ chii tqueeⁿ ta̱a̱ʼ tsʼoom na ticwanaaⁿ na ntqueeⁿ. Jnda̱ chii tquiaaⁿ ta̱ʼñeeⁿ nnom saaʼaⁿ ndoʼ mati jom tqueeⁿ juunaʼ.

Jeeⁿcheⁿ tiya na luaa lʼana: cwii jnaⁿnaʼ. Joʼ chii tjeiʼ Tyʼo̱o̱tsʼom Adán ñequio Eva naquiiʼ ntjomʼñeeⁿ.

Jeeⁿcheⁿ jndyaaʼ ñetandoʼtina ndoʼ mati ndana. Jndyocati xuee tquieendyena ndoʼ tja̱na. Tîcʼoona cañoomʼluee ndoʼ meiⁿcwii cwiicheⁿ joo. Mana tsuundyena.

Lʼoo matseicwaqueiⁿnaʼ joona tsʼo ndoʼ meiⁿcwii ʼnaⁿ tixocanda̱a̱ nlʼana (Génesis 3:19)

Chaʼtso jaa cwiluiindyo tsjaaⁿ ʼnaaⁿʼ Adán ñequio Eva. Joʼ chii mati jaa cwicwja̱a̱. Lʼoo xocanda̱a̱ ntyʼiaana meiⁿ xocanda̱a̱ nndyena ndoʼ meiⁿcwii ʼnaⁿ tixocanda̱a̱ nlʼana (Eclesiastés 9:5, 10).

Jiowa tîlʼue tsʼoom na nⁿʼan ncwjena. Tajndye xuee ndoʼ nñequiaaⁿ na nntandoʼxco nnʼaⁿ na jnda̱ tja̱. Ndoʼ xenna nndyena ʼnaⁿ na matsoom tijom cwjena. Nntaʼndoʼna na macanda̱.