¿Cwaaⁿ ñˈoom na ya waa cwentaaya?

1. ¿Cwaaⁿ ñˈoom na ya mañequiaa Tyˈo̱o̱tsˈom nda̱a̱ya?

Tyˈo̱o̱tsˈom wiˈ tsˈoom chaˈtsondye nnˈaⁿ, joˈ na sˈaaⁿ Tyuaa ndoˈ chaˈtso ˈnaⁿ na niom nacjooˈnaˈ. Ndoˈ lˈue tsˈoom na nnˈaⁿ nncˈomna na neiⁿnco nˈomna. Tajndye xuee ndoˈ nntseityuiiˈñˈeeⁿ ˈnaⁿ na cwilˈa na cwintyˈiaaya nawiˈ, cha na nnˈaⁿ na mˈaⁿ chaˈwaa ntyjaaˈ tsjoomnancue yati nncˈomna xuee na quiandyo. Catseiˈnaⁿˈ Jeremías 29:11.

Naⁿmaⁿnˈiaaⁿ tileicanda̱a̱ nquindyo̱ˈna na mˈaⁿ nnˈaⁿ na cwitaˈwiˈ ncˈiaa, ntycu ndoˈ na cwiwje nnˈaⁿ. Sa̱a̱ waa cwii ñˈoom na ya: Tajndye xuee, Tyˈo̱o̱tsˈom nnquindyo̱ chaˈtso naⁿmaⁿnˈiaaⁿ ndoˈ nlqueeⁿ Jnaaⁿ Jesús na nntsa̱ˈntjom nnom tsjoomnancue. Quiajoˈ nnˈaⁿ tsjoomˈm jeeⁿ ya nncˈomna ndoˈ tiwiina. Catseiˈnaⁿˈ Isaías 25:8; 33:24, ndoˈ Daniel 2:44.

2. ¿Chiuu tsˈiaaⁿˈ na jeeⁿ cajnda na ndya̱a̱ya ñˈoom na ya meiiⁿ?

Cha na nntycwii nawiˈ, Tyˈo̱o̱tsˈom nntseicatsuu chaˈtso nnˈaⁿ na wiˈndye na mˈaⁿ nnom Tyuaa (Sofonías 2:3). ¿Cwaaⁿ nntsˈaaⁿ na luaaˈ? Biblia jnda̱ ñetsonaˈ cantyja ˈnaaⁿˈ nawiˈ na cwintyˈiaaya najeˈ, ˈnaaⁿmeiiⁿ cwitˈmo̱o̱ⁿnaˈ na jnda̱ teindyooˈ nntseicatsuu Tyˈo̱o̱tsˈom. Catseiˈnaⁿˈ 2 Timoteo 3:1-5.

3. Quiajoˈ, ¿ljoˈ ˈnaⁿ macaⁿnaˈ na nlˈaa?

Macaⁿnaˈ na nlaˈnaaⁿ Biblia cha na nntaˈjnaaⁿˈyaaya Tyˈo̱o̱tsˈom, juunaˈ matseijomnaˈ chaˈxjeⁿ cwii carta na cwii tsotyetsˈaⁿ na yatsˈaⁿñe, majñoom na mˈaⁿ ntseinaaⁿ. Biblia matsonaˈ chiuu waa nnda̱a̱ nncˈo̱o̱ⁿ na neiⁿnco nˈo̱o̱ⁿya najeˈ ndoˈ ljoˈ ˈnaⁿ macaⁿnaˈ na nlˈaa, cha na nntoˈño̱o̱ⁿya na nntando̱o̱ˈa na macanda̱. Nchii chaˈtso nnˈaⁿ nncjaaweeˈ nˈomna na nntseiˈnaⁿˈ Biblia. Sa̱a̱ tiˈndiiˈ na matseiˈnaⁿˈ, ee jndyeti naya na nncoñomˈ. Catseiˈnaⁿˈ Proverbios 29:25 ndoˈ Apocalipsis 14:6, 7.