¿Chiuu waa cwiteiˈjndeii ñˈoomya ˈnaaⁿˈ Biblia jaa?

1. ¿Chiuu tsˈiaaⁿˈ na Tyˈo̱o̱tsˈom macaⁿnaˈ na ntsoom ˈnaⁿ na nlˈaa?

Tsotya̱a̱ya Jiowa, Tyˈo̱o̱tsˈom na sˈaa jaa jndo̱ˈti tsˈoom nchiiti jaa. Mati wiˈ tsˈoom ndoˈ ñjom tsˈoom jaa. Tjaaˈnaⁿ sˈaaⁿ jaa na ncˈo̱o̱ⁿ xjeⁿ ˈnaaⁿya (Jeremías 10:23). Chaˈxjeⁿ yocanchˈu, macaⁿnaˈ na lotyena nlue ˈnaⁿ na nlˈana, maluaaˈ jaa, macaⁿnaˈ na Tyˈo̱o̱tsˈom ntso ˈnaⁿ na nlˈaa (Isaías 48:17, 18). Ñˈoomya ˈnaaⁿˈ Biblia, joʼ cwii ˈnaⁿ na Tyˈo̱o̱tsˈom machˈee naya jaa. Catseiˈnaⁿˈ 2 Timoteo 3:16.

Ljeii ˈnaaⁿˈ Jiowa na matsa̱ˈntjom, cwitˈmo̱o̱ⁿnaˈ chiuu waa nntaˈndo̱o̱ˈa na yati najeˈ ndoˈ xuee na quiandyo nntioˈnaaⁿñê jaa na macanda̱. Ee na jom sˈaaⁿ jaa, ñequio na xcweeˈ nˈo̱o̱ⁿya nlˈaa ˈnaⁿ na jom nntsoom. Catseiˈnaⁿˈ Salmo 19:7, 11 ndoˈ Apocalipsis 4:11.

2. ¿Chiuu waa mateijndeii ñˈoom ˈndyoo Tyˈo̱o̱tsˈom jaa?

Ñˈoomya na tooˈ naquiiˈ Biblia cwiteiˈjndeiinaˈ na nlaˈno̱o̱ⁿˈa ˈnaⁿ na nlˈaa quiana waa cwii nnom na cwiwiˈno̱o̱ⁿ, sa̱a̱ ljeii na matsa̱ˈntjom cwiluendyeyunaˈ ˈnaⁿ na nlˈaa (Deuteronomio 22:8). Joˈ chii macaⁿnaˈ na calaˈtiuuya cha na nliuya ˈnaⁿ na lˈue tsˈom Tyˈo̱o̱tsˈom na nlˈaa (Proverbios 2:10-12). Biblia matsonaˈ na Tyˈo̱o̱tsˈom tquia na tando̱o̱ˈa. Ñˈoomwaa mateijndeiinaˈ jaa, quiana cwilˈaa tsˈiaaⁿ, quiana mˈaaⁿ waa wˈaa oo xeeⁿ na nnluiiˈa, macaⁿnaˈ na nlˈaaya cwenta na tando̱o̱ˈa. Catseiˈnaⁿˈ Hechos 17:28.

3. ¿Cwaaⁿ we ñˈoom na tˈmaⁿti na tso Jesús?

Jesús tsoom we ñˈoom na tˈmaⁿti. Ñˈoom najndyee matsonaˈ: na cataˈjnaaⁿya Tyˈo̱o̱tsˈom, cˈo̱o̱ⁿ na wiˈ nˈo̱o̱ⁿya jom ndoˈ tyeⁿ candiˈntjo̱o̱ⁿya nnoom. Cˈo̱o̱ⁿya cwenta ñˈoomwaa quiana ntˈua̱a̱ya cwii ñomtiuu (Proverbios 3:6). Nnˈaⁿ na luaaˈ cwilˈa nncˈomna na ya ñˈoomna ñequio Tyˈo̱o̱tsˈom ndoˈ ntaˈndoˈna na neiⁿnco nˈomna na macanda̱. Catseiˈnaⁿˈ Mateo 22:36-38.

Ñˈoom na jnda̱ we mateijndeiinaˈ na ya cˈo̱o̱ⁿ ñequio ntˈomcheⁿ nnˈaⁿ (1 Corintios 13:4-7). Quiana luaaˈ cwilˈaa cwitsantyjo̱o̱ chaˈxjeⁿ na machˈee Tyˈo̱o̱tsˈom ñequio nnˈaⁿ. Catseiˈnaⁿˈ Mateo 7:12 ndoˈ 22:39, 40.

4. ¿Chiuu waa cwiteiˈjndeii ljeii ˈnaaⁿˈ Tyˈo̱o̱tsˈom jaa?

Ljeii ˈnaaⁿˈ Tyˈo̱o̱tsˈom cwiteiˈjndeiinaˈ nnˈaⁿ wˈaa na tjoomˈ nncˈomna ndoˈ wiˈ nˈomna ncˈiaana (Colosenses 3:12-14). Mati mawañoomˈnaˈ nnˈaⁿ na jnda̱ tmaⁿˈco, ee cwii ljeii matsonaˈ na tjoomˈ nncˈomna na macanda̱. Catseiˈnaⁿˈ Génesis 2:24.

Xeeⁿ na nlaˈcanda̱a̱ ljeii ˈnaaⁿˈ Jiowa na matsa̱ˈntjom nnteijndeiinaˈ na ya nncˈo̱o̱ⁿ ndoˈ neiⁿnco nˈo̱o̱ⁿya. Chaˈxjeⁿ, jndye nnˈaⁿ cwilˈuee naⁿtjom na tintqueeⁿ ndoˈ cwilˈa ˈnaⁿ na ya (Proverbios 10:4, 26; Hebreos 13:18). Mati, ñˈoom ˈndyoo Tyˈo̱o̱tsˈom maˈmo̱ⁿnaˈ na caljoya nˈo̱o̱ⁿya xeeⁿ na waa na nlcwaaˈa ndoˈ liaaya. Najndyeeti calˈua̱a̱ na nljoya ñˈoom jaa ñequio Tyˈo̱o̱tsˈom nchii na nquiomti ˈnaaⁿya. Catseiˈnaⁿˈ Mateo 6:24, 25, 33 ndoˈ 1 Timoteo 6:8-10.

Ljeii ˈnaaⁿˈ Tyˈo̱o̱tsˈom mati cwiteiˈjndeiinaˈ na nncˈo̱o̱ⁿ na yaa; chaˈxjeⁿ ljeii na matso na tiya ndii tsˈaⁿ, mawañoomˈnaˈ jaa ñequio ntycu ndoˈ nata̱ˈ (Proverbios 14:30; 22:24, 25; 23:20). Mayuuˈ, Jiowa mañenquiaaⁿ na ya ncwa̱a̱ chjoowiˈ nta sa̱a̱ nchii na ndii tsˈaⁿ (Salmo 104:15; 1 Corintios 6:10). Ljeii ˈnaaⁿˈ Tyˈo̱o̱tsˈom cwiteiˈjndeiinaˈ jaa, na ljuˈ nncˈo̱o̱ⁿ ndoˈ nlˈaa cwenta ñomtiuu ˈnaaⁿya (Salmo 119:97-100). Sa̱a̱ nnˈaⁿ na mayuuˈcheⁿ na cwilaˈjomndye ñequio Cristo nchii cwilaˈcanda̱na cweˈ ee na waa ˈnaⁿ na ntyjaaˈ nˈomna, xeeⁿ nchii ee na ñeˈcalaˈtˈmaaⁿˈndyena Jiowa. Catseiˈnaⁿˈ Mateo 5:14-16.