¿Chiuu tsʼiaaⁿʼ na tueʼ Jesús?

Tueʼ Jesús cwentaa jaa chaʼna nnda̱a̱ nntando̱o̱ʼa na macanda̱ (Juan 3:16)

Xuee na nda̱ndyee na tueʼ Jesús, meindyee yolcu tyʼecantyʼiaana tseiʼtsuaaʼnaaⁿʼaⁿ sa̱a̱ taʼnaⁿ candiiʼ jom naquiiʼ juunaʼ. Jiowa jnda̱ seicwandoʼxco jom.

Nda̱nquia teitquiooʼñe Jesús nda̱a̱ apóstoles, nnʼaⁿ na ya ñʼoom jom.

Tyʼo̱o̱tsʼom seicwandoʼxcoom Jesús chaʼxjeⁿ cwii ángel tachii ñequio seiʼtsʼo. Nnʼaⁿ na tyʼeentyjo̱ ʼnaaⁿ ncʼe Jesús, ntyʼiaana xjeⁿ na jom tjalcweʼnnaaⁿʼaⁿ cañoomʼluee. Najeʼ cwiluiiñe cwii espíritu na tʼmaⁿ najndeii na matseixmaⁿ ndoʼ tajom cueʼ.

Tyʼo̱o̱tsʼom seicwandoʼxcoom Jesús, ndoʼ sʼaaⁿ jom tsaⁿmaⁿtsʼiaaⁿ naquiiʼ Nʼiaaⁿ ʼnaaⁿʼaⁿ (Daniel 7:13, 14)

Tueʼ Jesús chaʼna nndyaandye nnʼaⁿ na matʼuii jnaⁿ joona ndoʼ na cwiwjena (Mateo 20:28). Quialʼuaaʼ na luaa tuii, Tyʼo̱o̱tsʼom nnda̱a̱ nñequiaaⁿ na nntando̱o̱ʼa na macanda̱.

Jiowa tjeiiʼñe Jesús na nljoñe tsaⁿmaⁿtsʼiaaⁿ cañoomʼluee na nntsa̱ʼntjom nacjooʼ Tyuaa. Sa̱a̱ nchii ñenqueⁿ nntsa̱ʼntjom. Ñequio joom nntsa̱ʼntjom 144,000 nnʼaⁿ na cwilacanda̱ ñʼoom ʼndyo̱ Tyʼo̱o̱tsʼom, nntaʼndoʼna cañoomʼluee quia na nntaʼndoʼxcona. Joo naⁿmaⁿnʼiaaⁿ mʼaaⁿ na xcwe nntuʼxeⁿ, cwiluiindyena Nʼiaaⁿ ʼnaaⁿʼ Tyʼo̱o̱tsʼom (Apocalipsis 14:1-3).

Juu Nʼiaaⁿʼñeeⁿ nntsʼaa na nntseicwaquennaʼ chaʼwaa Tyuaa na neiⁿncooʼ. Nndyuee ntiaʼ, nnʼaⁿ wiʼndye, jndoʼ ndoʼ nntycwii na ntyʼiaandye nnʼaⁿ. Jeeⁿ neinco nʼom nnʼaⁿ nntsʼaanaʼ (Salmo 145:16).