TAᴺˈ 13

¿ʼNiiⁿ ʼnaⁿ nncjaaweeʼ tsʼom Tyʼo̱o̱tsʼom na jaa nlʼaaya?

Tintsaʼ ʼnaⁿ na jndooʼ Tyʼo̱o̱tsʼom (1 Corintios 6:9, 10)

ʼNaⁿ na jndooʼ Tyʼo̱o̱tsʼom: na nntyʼueeya, na nndyeeya, na nleilʼueeʼndyo tscojnoom wʼii, na nlaʼntjaʼndyo, na nlaʼtʼmaaⁿʼndyo ntyʼo̱o̱

Xeⁿ na wiʼnʼo̱o̱ⁿya Tyʼo̱o̱tsʼom, xocalʼaaya ʼnaⁿ na ticjaweeʼ tsʼom.

Jom tilʼue tsʼoom na nntyʼueeya, na nndyeeya meiⁿ na nleilʼueeʼndyo tscojnoom wʼii ndoʼ ntʼomcheⁿ ʼnaⁿ na matseijomnaʼ.

Jndooʼ Tyʼo̱o̱tsʼom na cwii yuscu nncwjiʼ jnda, ndoʼ na naⁿnom mʼaaⁿna ñʼeⁿ ntyjenom ndoʼ na yolcu mʼaaⁿna ñʼeⁿ ntyjelcu, ndoʼ na tsʼaⁿ nntseicueʼ xʼiaaʼ. Mati ticjaweeʼ tsʼoom nnʼaⁿ na neiiⁿ sʼom ndoʼ nnʼaⁿ neiiⁿ ntiaʼ.

Tilʼue tsʼoom na jaa nlaʼtʼmaaⁿʼndyo ntyʼo̱o̱ meiⁿ na nlʼaa tsʼiaaⁿ caluaʼ.

Nnʼaⁿ na cwilʼa chaʼtso jnaⁿ nmeiⁿ tixotandoʼna nnom Tyuaa quiana nntsʼaanaʼ neiⁿncooʼ juunaʼ.

Calʼaaya ʼnaⁿ na ya ñequio ntʼomcheⁿ nnʼaⁿ (Mateo 7:12)

ʼNaⁿ na nncjaweeʼ tsʼom Tyʼo̱o̱tsʼom: na calʼaaya na yannʼaⁿndyo, calʼaaya ʼnaⁿ na matyʼiomyanaʼ ndoʼ na calaʼtʼmaaⁿ nʼo̱o̱ⁿya ncʼiaaya

Cjaweeʼ tsʼom Jiowa na calʼaaya jndyaaʼ na caluiiʼndyoʼ chaʼxjeⁿ nqueⁿ.

ʼU macaⁿnaʼ nntsaʼ na yatsʼaⁿndyuʼ ndoʼ nntsaʼ na tintycwiiʼ. Luaa matseiʼmo̱o̱ⁿʼ na wiʼ tsʼomʼ.

Calʼaaya chaʼtso xjeⁿ ʼnaⁿ na matyʼiomyanaʼ.

Catseitʼman tsʼomʼ ncʼiaaʼ.

We nnʼaⁿ na cwitjeiʼyuuʼndye cantyja ʼnaaⁿʼ Jiowa cwitʼmo̱o̱ⁿna nnom cwii tsʼaⁿ ñequio Biblia

Catseineiⁿʼ nda̱a̱ ntʼomcheⁿ nnʼaⁿ cantyja ʼnaaⁿʼ Tyʼo̱o̱tsʼom (Isaías 43:10).