Ama Ubọọn̄ Awaji ire Keke?

INU BAIBUL OTUMUBE IRE

“Awaji okup me inyọn̄ môsan̄a ama ubọọn̄ ge isibi eyi kpebekọt ijijaka.”—Danien 2:44, Ikpa Mbuban.

“Mije, miman gwun̄ inyi eji, mînyi eji gwun̄ enerieen̄ ge; mkpulu ibotoon̄ ọmọ me oguga.”—Asaya 9:6.

INU BAIBUL OTUMUBE MKPỌ ISIBIBE INYI OWU

• Mkpulu eyi ikakaan̄ge ijo geege me emen, eyi monyibe owu oruru.—Asaya 48:17, 18.

• Me emen aya inyọn̄ okinu, ugwem ososo me ubelejit mokup.—Ichichili 21:3, 4.

IRE EJI MEKỌT ICHIEEK IBE KE INU BAIBUL OTUMUBE IRE ATIKỌ NI?

Iin̄, mije, ibot inu iba kechi:

• Jisọs ijeen̄ inu Ama Ubọọn̄ Awaji oborọ isa inyi ene. Jisọs ijeen̄ ebi udun̄ kan̄ ibe ekebeek ibe Ama Ubọọn̄ Awaji inu me nkeek kan̄ irọ iso me inyọn̄ ijọn̄. (Matiyu 6:9, 10) Jisọs ikpọmbu ubọk ebesa ifọọk otu uriaak ya.

  Mgbọ Jisọs okupbe me inyọn̄ ijọn̄, inyi ebi urafiọọn̄ okitaka inorie, igwa ebi orukan̄ me ijomo ebi ikwukwu! (Matiyu 15:29-38; Jọn̄ 11:38-44) Kubọk ire Ogwu Ubọọn̄ obokpulu me Ama Ubọọn̄ Awaji okinu, inu irọbe me mgbọ ikupbe me inyọn̄ ijọn̄ okijeen̄ inu Ama Ubọọn̄ oborọ me isi.—Ichichili 11:15.

• Oke inu okirọ me linyọn̄ yi, ikibieen inye ibe ke Ama Ubọọn̄ Awaji monun̄ son̄tiik lek mgbọ. Jisọs iben̄ nriran ibe ke me mun̄ akon, una inorie me sikisik-ijọn̄ mokup me owuwa ere. Sọntiik mgbọ morakabe, Ama Ubọọn̄ Awaji mosa esuuk inu me inyọn̄ ijọn̄.—Matiyu 24:3, 7.

  Eji mekimu inu cha okirọ. Eya orọ eji mekọt itoon̄ ejit ibe ke sọntiik mgbọ Ama Ubọọn̄ Awaji mosan̄a otutuuk ufialek inyọn̄ yi isan̄a kpai.