Ubọk Obokọt Isa Mfufet Ikpa Ibene Ukpatu

Karake Okpa Onyan̄ me 2018, adasi isi Ikpa Nkween̄mkpọ Ugwem mè Ikwaan̄ Kiji ikiben ubọk ibene ukpatu. Mikitap eji efuuk me owot ibe egwuun̄ chieen̄ me lek igọgọọk ebi ene ikpa usem kpan̄asi ebekpọkpọk ikinyi ema ikpa kiji. Isasa itap ubọk inyi ebi ikilook ata etip, mikijeen̄ ubọk ebekọt isa Baibul gaalek ibene ukpatu me fidio ubọk ibene ukpatu. Ire eyi isibi ibe ke eji kpebekisa ikpa kiji irọ mkpọ me mgbọ eji ekilook ata etip inan̄a me uwu ire uwu ni? In̄-in̄, ikare ikeya. Kubọk inu njeen̄, isasa mfufet ikpa ibene ukpatu ire oniin̄ ge okitet mun̄. Eji mekọt isa mfufet ikpa geelek ibene usem ikeyi:

1. Do idodo okaan̄ esese esese ufọọk-otu mekọtbe igobo okup me isi mfufet ikpa ya.

2. Jeen̄ ufọọk-otu Baibul onyibe me inyọn̄ òso isi ikpa iba. Ire mgbọ ikup, fuk mè kpa usini inu okup me emen mfufet ikpa ya.

3. Nyi ogwukaan̄ uwu ya mfufet ikpa ya, mè tap efuuk me owot kan̄ ibe isan̄a mgbọ isibi ifuk eyi osisik.

4. Sabum obofo, jeen̄ idodo okup me ere egebe “Keek Inu Ofolek,” mè neen̄ iyayaka inu inisa Baibul ifọọk idodo ya ofifi mgbọ.

Osikpọk inu, kpa ufọọk-otu idodo ya mè juuk ofifi idodo tele eyi enyi mekpabe ofifi mgbọ. Omokọt igobo idodo ge me webusaiti kiji mè iyaka ire me ikpa okup me udun̄ mfufet ikpa ya. Me mgbọ ogbegbe, nyi mè kpa broshọ Ata Etip Onan̄a Me Ubọk Awaji! mè iyaka ire ofifi ikpa ekisa ikween̄ Baibul okup me Okop Mkpọ Ikwaan̄.