Ikpakpa Mkpọ Ofolek Ama Ubọọn̄ Awaji Eyi Osibi Esese Me Akọp Mè Onyan̄ Ge

Jisọs ilook “ata etip ofolek Mkpulu eyi Awaji.” (Luk 4:43) Ijeen̄ ebi ene si ibe ebeek uriaak ofolek Mkpulu ya. (Mat 6:9, 10) Me emen Akọp mè Onyan̄ Ge, eji metap efuuk eyi osisibi esese isa ilook ata etip ofolek Ama Ubọọn̄ Awaji. (Mat 24:14) Neen̄ mgbọ kwun̄ jaan̄ inyi okọt ogọọk osi ikwaan̄ yi. Otutuuk ebi ibegbọ oniin̄ eyi mgbidim mgbọ me emen onyan̄ ya mekọt igobo inyinyi mbubak mgbọ 30 mè iyaka ire 50.

Tap efuuk mun̄ ibe ke owu ogọọk owuwa ene ikpa ere Baibul okikpa mkpọ ofolek Ama Ubọọn̄ Awaji. Osikigobo ere Baibul obosa irọ mkpọ, kaan̄ uwu uriaak ebi ikigban̄ owu me ejit. Ire ene ijeen̄ ulọk me adasi ogwen, nyi ọmọ The Watchtower No. 2 2020. Kafiat mgbọ mè igwugwu ikom isi lek ogwu ojejeen̄ ulọk ya, mè sa ikpa ge me lek echi okup me Okop Mkpọ Ikwaan̄ kiji sa gọọk ọmọ bene nkween̄mkpọ Baibul. Sọnja mgbọ, Awaji mosa Ama Ubọọn̄ kan̄ ifiat otutuuk ebi mkpulu ikikeke ikeme ọmọ. (Dan 2:44; 1 Kọr 15:24, 25) Eya orọ, kè eji esa irek keyi eyi osisibi esese ejeen̄ Jioba ibe ke eji ekup me agan̄ kan̄ melek Ama Ubọọn̄ kan̄!