Ire Obem Lek Itatap Ikpa Inyi Okọt Osi Uwu Ikpa Okukup Inyi Ebi Ikilook Ata Etip Ama Ubọọn̄ (School for Kingdom Evangelizers) Ni?

Ire òso akọp acha iba mè ita sare akọp acha gweregwen mè go mè ire si ogwu okigbọ oniin̄ ojot mgbọ ni? Ire okaan̄ unye-akpalek, ire omokọt isi ikwaan̄ me ere ufiak ominbe ni? Ire ire ibe ke ufọọk-otu kwun̄ ire iin̄, ire owuuk lek ikeek mkpọ ofolek itatap ikpa inyi okot osi Uwu Ikpa Okukup Inyi Ebi Ikilook Ata Etip Ama Ubọọn̄ ni? Karake ebenebe uwu ikpa yi, obop obop ebi olom mè nwa, melek bọn ute irieen̄ mè ibaan̄ ikukup agaga mitap ikpa. Ire, eji echubọk iweek bọn ute irieen̄, ebi ikup agaga. Beek Jioba ibe irọ inyi ulọk okaan̄be irọrọ inu okineme ogọt mè igọgọọk akpat ukot Gwun̄ kan̄ ikimin. (Itọn̄ 40:8; Mat 20:28; Iburu 10:7) Mè kpọ nu mè ire okaan̄ akpan ikwaan̄ echi obokpọ chieen̄ me lek me ototun̄ ukan̄ kwun̄, mè ere ikwaan̄ kwun̄ mè iyaka ire okaan̄ urieek eyi okakpe. Ire ire ikeya, ire omokọt irọ usini unwene inyi okọt omin osoon̄ ni?

Irek ikwaan̄ echi owa ke owuwa ebi isisi uwu ikpa yi ekaan̄ eyi ema ebọkọbe kpokpo isan̄a? Miria usini ene isi ere ekitumu ofifi ida usem, usini ene ire ebi ikisa cart ilook ata etip me ere uwa-ene, eyi osibi esese. Miria usini ene ibe esi ekpọ ntitiin̄ me useen̄ ebi sekut, usini mikana ebi sekut mè iyaka ire ebi eriabe isi ofifi ido ibe esi elook ata etip. Ike okigwu nkeek ikom me lek inu echi obokọt irọ me ikwaan̄ kè Jioba, kaan̄ mbet lek eru ogwu nriran Asaya okaan̄be me mgbọ itumube ibe: “Kpọ emi gwu! Ria emi!”—Asaya 6:8.

IKPỌ FIDIO EBI ERIABE IBE ESI ELOOK ATA ETIP ME OFIFI ERE, MÈ IFỌỌK IDODO CHI:

• 

  Ike owa ke ekisa igobo ebi ekiria isi ofifi ere ibe esi elook ata etip?

• 

  Kpasi ata ikwaan̄ ke ebi bọn ute chi ekirọ?

• 

  Keke ore usini ugbana ebi ene ekinwọọn̄ me ikwaan̄ yi?