Bem Lek Me Lek Ufialek Obokọt Irọ Inyi Esa Owu Esi Uwu Gwun̄ Mè Ekakeekge

Keke orọ obobem lek? Inu obokọt irọ inyi esa eji esi uwu ugwun̄ mokọt ibọkọ irek mè ekakeekge. Ọmọ orọ, rọ inu geelek omokọtbe irọ sa bem lek mgbọ keyi ufuna omokọt ikaan̄ igwagwa onwọnwọn ichit mè ire mbet inu okup ikeya ibọkọ irek. Sa me irọrọ ikeya, okijeen̄ ibe ke okaan̄ ulibi me lek ugwem mè ikan Jioba onyibe ofolek eje.—Ikwaan̄ 15:28, 29.

Keke ke obokọt irọ isasa ibem lek?

• Beek uriaak mè sa me ugbalachieen̄ ge ntumu-mfieek kwun̄ tap me emen durable power of attorney (DPA) card (orere, ikpa eje).a Ebi ikakaan̄ ntap-me-mun̄ mekọt ibọkọ DPA card yi me ubọk ogwu okikpọ chieen̄ me lek ikpa me ntitiin̄ kiban̄ mè ibọkọ si Identity Card (ic) inyi asasa nsabọn kiban̄

• Ire owu ire ogwu enenwaan̄ oninin̄ owot, be ebi ugane ntitiin̄ kwun̄ enyi owu ikpa ekigwen Information for Expectant Mothers (S-401). Ikpa yi motap ubọk inyi owu okọt orọ ata ntumu-mfieek ofolek ufialek obokọt inan̄a isibi me mgbọ onin̄be owot mè mgbọ oboman gwun̄

• Ire okaan̄ orukan̄ eyi igwagwa kan̄ okaan̄be mgbaan̄ me lek eje mè iyaka ire eyi oborọ inyi okweek me uwu gwun̄, sa ata mgbọ look ebi ugane ntitiin̄ kwun̄ mè tumu inyi ebi uwu ugwun̄ ya ibe ke omoma ibe ogwu ebi Ata-Ikọ Jioba eberia inu inikpọ owu

Ike owa ke ebi ugane ntitiin̄ ebekọt isa itap ubọk? Ema mekọt itap ubọk inyi owu ufuna okọt oge ntumu-mfieek kwun̄ me DPA card kwun̄. Ire, ebi ugane ntitiin̄ kpeberọ ntumu-mfieek ofolek igwagwa inyi owu mè iyaka ire itumu inyi owu inu ema ekeekbe osilek inu echi eji ge ge metumube ifieek inyi lek kiji. (Rom 14:12; Gal 6:5) Osikpa inyi ebi ugane ntitiin̄ kwun̄ ibe ke okaan̄ orukan̄ eyi obokọt irọ inyi etumu ibe mè obọkọ eje, ema megwat lek ilook Hospital Liaison Committee (HLC).

Ike owa ke HLC ebekọt isa itap ubọk? Ebi ikisi ikwaan̄ me Hospital Liaison Committee (HLC) ire ebi ekpukpobe ibe eketap ubọk enyi ebi ofia ebeke mè ebi ikan me agan̄ kiji inyi ema ekọt egobo etet inu eji echieekbe ofolek ibọbọkọ eje. Ema mekọt igọọk ogwu ofia ebeke kwun̄ ikpa ubọk igwa-ene eyi kpogọbọ isasa eje irọ mkpọ. Ire ikup ufiak, ema mekọt itap ubọk iweek ogwu ofia ebeke obokọt igwa owu igọọk me lek ntumu-mfieek kwun̄ ofolek eje.

IKPỌ FIDIO UBỌK OBORỌ NTUMU-MFIEEK OFOLEK ISASA EJE IRỌ MKPỌ OSIKIKAAN̄ IGWAGWA, MÈ IFỌỌK IDODO CHI:

• Keke ke okween̄ me emen fidio ya eyi obotap ubọk inyi owu okọt obem lek me lek ufialek mè iyaka ire orukan̄ eyi oboweek ibe etap owu eje me lek?

  Your answer