Ire Obem Lek Ikakaan̄ Ntap-Me-Mun̄ Ni?

Owu okween̄ owuwa mkpọ ofolek Jioba inan̄a me lek nkween̄mkpọ Baibul kwun̄. Owu ora irọ usini unwene inyi oluk ogọọk inu okikween̄. Ire, mokọt ikaan̄ usini mkpọ okitet owu ikaan̄ ibe okasa lek kwun̄ inyi Jioba mè ikaan̄ ntap-me-mun̄. Inu nkween̄ yi mokpa usini mkpọ okigban usini ene ibe ekakaan̄ ntap-me-mun̄ mè ubọk obosa itim igak inu cha.

1. Ike owa ke obosa iriọọn̄ Baibul ire, sabum onokaan̄ ntap-me-mun̄?

Inyi okaan̄ ntap-me-mun̄, ikup ufiak ibe oriọọn̄ atikọ ofolek Awaji ojaan̄. (Timọti Eyi Adasi 2:4) Eyi ikasibi ibe ke omoriọọn̄ otutuuk ufọọk-otu isa inyi ndo-ikọ geelek ofolek Baibul sabum onokaan̄ ntap-me-mun̄. Ikerere ebi eyi Karais ebi ikakaan̄ ntap-me-mun̄ me owuwa acha ekikwekween̄ mkpọ si. (Ebi Kọlọsi 1:9, 10) Ire, ikup ufiak ibe oriọọn̄ okpan okpan ijejeen̄ Baibul. Ebi ugane ntitiin̄ metap ubọk inyi owu oriọọn̄ mè ire okaan̄ iriọọn̄-inu ogbegbe isasa ikaan̄ ntap-me-mun̄.

2. Keke ore usini inu oborọ sabum onokaan̄ ntap-me-mun̄?

Sabum onokaan̄ ntap-me-mun̄, omodasi “ìgwu ìkom, mè ìgọọk Awaji.” (Fuk Ikwaan̄ 3:19.) Eyi isibi ibe ke obofefieek ejit me lek ijo inu geelek orọbe mè ibeek Jioba ibe itele inyi owu. Owu mojit si ijo eru mè itumu ifieek ikekiluk ugwem me oniin̄ obokineme Awaji. Isọkọ me lek, omobene ikigọọk inu nkween̄mkpọ ntitiin̄ mè ikigọọk ntitiin̄ ikilook ata etip.

3. Keke orọ okpobotele ibe ukpook itet owu ikaan̄?

Usini ene ekifieek owot ibe ke ema kpebekọt irọ use ema echieekbe Jioba iso. Atikọ ibe ke usini mgbọ eji mekọt irọ ilọ, ikerere ebirieen̄ mè ebibaan̄ igbegbe utoon̄-ejit etumube mkpọ ofolek me emen Baibul mirọ ilọ. Ire, Jioba iriọọn̄ ibe ke ebi ikitọbọ ebum inyi ọmọ kpeso ifuk. (Fuk Okwa Itọn̄ 103:13, 14.) Ikibebele ejit osikirọ eyi efuuk kwun̄ obokọt! Motap ubọk inyi owu si. Me atikọ, Jioba ichieek eji use ibe ke “kpunu inu geege òbokọt iche eji isan̄a me lek imumechieen̄ [kan̄].”—Fuk Ebi Rom 8:38, 39.

KWEEN̄ GBAALEK

4. Sa inyi oriọọn̄ Jioba ojaan̄

Ike owa ke obosa iriọọn̄ Jioba ire sabum onokaan̄ ntap-me-mun̄ ni? Omoriọọn̄ ọmo ijaan̄ ire lek oboma ọmọ mè ikirọ mkpọ obokibele ọmọ ejit. Fit FIDIO yi inyi omun̄ ubọk ebi ikikween̄ Baibul me otutuuk linyọn̄ yi esabe irọ ikeya. Mè igbaan̄ ikpa idodo yi ogọgọọk.

FIDIO: Inu Oborọ Inyi Okọt Omin Osoon̄ Ikakaan̄ Ntap-Me-Mun̄ (3:56)

• Me emen fidio ya, keke otap ubọk inyi usini ene eneen̄ lek enyi ikakaan̄ ntap-me-mun̄?

Fuk Ebi Rom 12:2, mè igbaan̄ ikpa idodo chi:

• Ire okaan̄ cheche geege ofolek mkpọ Baibul okijeen̄ mè iyaka ire mè ire mkpọ Ebi Ata-Ikọ Jioba ekijeen̄ ire atikọ ni?

• Ire ikeya, keke ke oborọ ofolek?

5. Tim gak mkpọ echi obokọt igban owu ibe okakaan̄ ntap-me-mun̄

Mgbọ geelek eji esitumu ifieek isasa lek kiji inyi Jioba mè ikaan̄ ntap-me-mun̄, otutuuk kiji ekikakaan̄ ufialek. Inyi omun̄ inu njeen̄ ge, fit FIDIO yi, mè igbaan̄ ikpa idodo chi ogọgọọk.

FIDIO: Ima Ekaan̄be Me Lek Jioba Morọ Inyi Etim Egak Ufialek (5:22)

• Me emen fidio ya, ufialek echi owa ke Narangerel obotim igak inyi ikọt itọbọ ebum inyi Jioba?

• Ike owa ke ima ikaan̄be me lek Jioba osa itap ubọk inyi ọmọ ikọt itim igak ufialek cha?

Fuk Urọk 29:25 mè Timọti Eyi Òso Iba 1:7, mè igbaan̄ ikpa idodo yi:

• Keke okinyi eji unye-ejit isasa itim igak ufialek?

6. Toon̄ ejit me lek ntap-ubọk Jioba

Jioba motap ubọk inyi owu orọ inyi ejit kan̄ ikibele, Fit FIDIO yi, mè igbaan̄ ikpa idodo chi ogọgọọk.

FIDIO: Jioba Motap Ubọk Inyi Owu (2:50)

• Me emen fidio ya, keke orọ ogwu okikween̄ Baibul ge ikaweek ikakaan̄ ntap-me-mun̄?

• Keke ke ikween̄ eyi otatap ubọk inyi ọmọ ibe irọ me utoon̄-ejit kan̄ me lek Jioba inye?

Fuk Asaya 41:10, 13, mè igbaan̄ ikpa idodo yi:

• Keke orọ obokaan̄ utoon̄-ejit ibe ke omokọt irọ iso use ochieekbe me mgbọ osabe lek kwun̄ inyi Jioba?

7. Rọ inyi ima okaan̄be me lek Jioba ikimin

Ike okikeek ubọk Jioba osabe ima owu ire, ikeya si ke obokitọn̄ ọmọ mè ikiweek itọtọbọ ebum inyi ọmọ ire mgbọ geelek. Fuk Okwa Itọn̄ 40:5, mè igbaan̄ ikpa idodo yi:

• Ugbana Jioba echi owa ke oboma itọtọn̄ ọmọ ofolek?

Ogwu nriran Jerimaya ima Jioba mè usem kan̄, mè ichubọk ijeen̄ ibe ke ibele ejit me lek irek ikaan̄be ikekichieek erieen̄ Jioba. Ibe: “Ikọ [kwun̄] onenire unwọọn̄ mè ubelejit eyi ejit n̄a, mije, emi ǹkichieek erieen̄ kwun̄, jei Jioba Awaji Ogwukaan̄ Inyọn̄ mè Ijọn̄.” (Jerimaya 15:16) Fọọk idodo chi:

• Keke orọ irebe irek ilile irere ge me lek Ebi Ata-Ikọ Jioba?

• Ire oweek ikakaan̄ ntap-me-mun̄ kubọk ge me lek Ebi Ata-Ikọ Jioba ni?

• Ire ikaan̄ inu geege okikput owu ibe okakaan̄ ntap-me-mun̄ ni?

• Keke ke okeek ibe ke oborọ inyi okọt omin osoon̄ ikakaan̄ ntap-me-mun̄?

ME MGBIDIM

Sa me ntap-ubọk Jioba, omokọt itim igak ufialek geelek okigban owu ibe okakaan̄ ntap-me-mun̄.

Idodo

• Ike owa ke obosa iriọọn̄ Baibul ire sabum onokaan̄ ntap-me-mun̄?

• Unwene echi owa ke oborọ sabum onokaan̄ ntap-me-mun̄?

• Keke orọ okpobochieek ibe ukpook ikput owu ibe okakaan̄ ntap-me-mun̄?

WEEK

Fuk mkpọ obobieen̄ owu ibe otumu ofieek ikakaan̄ ntap-me-mun̄.

“Are You Ready to Get Baptized?” (The Watchtower, March 2020)

Kween̄ ubọk obokọt isa itim igak usini ufialek obokọt itet owu ikaan̄ ibe okakaan̄ ntap-me-mun̄.

“What Prevents Me From Getting Baptized?” (The Watchtower, March 2019)

Kpọ ubọk ogwu enerieen̄ ge okọt isa itim igak ufialek echi okigban ọmọ ibe ikakaan̄ ntap-me-mun̄.

‘Keke Orọ Okaweek Ikakaan̄ Ntap-Me-Mun̄?’ (1:10)

Me adasi mgbọ, ogwu enerieen̄ ge ekigwen Ataa ikaweek ikakaan̄ ntap-me-mun̄. Kpọ mkpọ obobieen̄ ọmọ ibe irọ ntumu-mfieek okukup ufiak yi.

Ire Ugbana Chi Ichubọk Igbe Emi Ni? (7:21)