INU NKWEEN̄ 26
Keke Orọ Ijo Inu mè Ukwook Okibọkọ Irek?
Ijo inu isibọkọ irek, ebi ene ekimalek ido ibe, “keke oro?” Ibele eji ejit enenen ibe ke Baibul inyi eji ata ufọọk-otu isa inyi idodo ya!
1. Ike owa ke Setan osa ijo inu inu me linyọn̄ yi?
Setan, orere, Yọk ikpaka ibot inyi Awaji. Setan ikiweek ikpukpulu ebi ofifi ife, eya orọ irọbe inyi Adam mè Îfu egọọk ọmọ ekpaka ibot. Setan irọ eyi sa me ikakan̄ ataak inyi Îfu. (Ibebene 3:1-5) Irọ ibe Îfu ikikeek ibe ke Jioba ikilet ata mkpọ me lek kan̄. Usem Setan isibi ibe ke ebilene mekaan̄ ubelejit mè ire ema ekpaka ibot inyi Awaji. Setan okan̄ adasi ataak sa me itutumu inyi Îfu ibe ke ikpobokwu. Eya orọ Baibul ogwenbe Setan “ogwu ataak.”—Jọn 8:44.
2. Keke ke Adam mè Îfu egobo irọrọ?
Jioba inyi Adam mè Îfu owuwa ata mkpọ. Itumu inyi ema ibe mè erie otutuuk mfut uti okup me uko Iden ilọ me lek ge gaalek. (Ibebene 2:15-17) Ire, ema etutumu ifieek irerie mfut uti ya. Îfu ogbegbeme “usini me lek mfut uti ya irie.” Mgbọ Îfu onyibe Adam mfut ya, Adam “obọbọkọ irie.” (Ibebene 3:6) Ema ene iba ekpakpaka ibot inyi Awaji. Mije ibe ke Adam mè Îfu esoso ifuk, ema ebekirọrọ inu otatat mgbọ geelek. Ire, sa me igegen ibak ikpaka ibot inyi Awaji, ema mirọ ijo inu mè ijit mkpulu eyi Awaji. Ntumu-mfieek kiban̄ isa uga ukwook ijet ema.—Ibebene 3:16-19.
3. Ike owa ke ntumu-mfieek Adam mè Îfu erọbe osa ikaan̄ mgbaan̄ me lek kiji?
Mgbọ Adam mè Îfu ekpakabe ibot, ema ekakana ebi ijo, mè irọ inyi otutuuk nsabọn kiban̄ ekana ebi ijo. Ofolek Adam, Baibul ibe: “Ijo inu ìnan̄a me lek ene ge inin̄ linyọn̄. Mkpa onanan̄a me lek ijo inu ya înin̄ si linyọn̄. Ikeya ke mkpa osa inu inyi otutuuk ebilene.”—Ebi Rom 5:12.
Eji ekibọkọ ukwook mije owuwa inu. Usini mgbọ, eji ekibọkọ ukwook mije ijo ntumu-mfieek eji erọbe. Usini mgbọ, eji mekọt ibọkọ ukwook mije ijo ntumu-mfieek ebi ofifi ife erọbe. Usini mgbọ si, eji mekọt ikibọkọ ukwook mije eji ekupbe me ere ikatatge me mgbọ ikatatge.—Fuk Ogwu Etip 9:11.
KWEEN̄ GBAALEK
Kween̄ mkpọ orọrọ eji kpebefieek Awaji ikọ me lek ijo inu mè ukwook okibọkọ irek me inyọn̄ ijọn̄ yi me chereyi mè ubọk ikikup ọmọ me lek eji esikibọkọ ukwook.
4. Ogwu ebefieek ikọ me lek ukwook kiji
Owuwa ebi ene ekikeek ibe ke ire Awaji okikpulu linyọn̄ yi. Ire ikeya ni? Fit FIDIO yi.
Fuk Jemis 1: 13 mè Jọn Eyi Adasi 5:19, mè igbaan̄ ikpa idodo yi:
Ire Awaji ke ebefieek ikọ me lek ukwook mè ijo inu okibọkọ irek ni?
5. Kpọ inu mkpulu Setan osan̄abe isibi
Fuk Ibebene 3:1-6, mè igbaan̄ ikpa idodo chi:
Kpasi ataak ke Setan okan̄?—Kpọ agba eyi 4 mè 5.
Ike owa ke usem Setan okijeen̄ ibe ke Awaji ikilet ata mkpọ me lek ebilene ni?
Igọọk me lek usem Setan, ire ebilene miweek Jioba kubọk Ogwu Mkpulu kiban̄ inyi ema ekaan̄ ubelejit ni?
Fuk Ogwu Etip 8:9, mè igbaan̄ ikpa idodo yi:
Eyi ikare Jioba okikpulu linyọn̄ yi me mgbọ keyi, keke okibọkọ irek?
Adam mè Îfu esoso ifuk mè iluk me Paradais. Ire, ema migban̄ utọn̄ me lek Setan mè ikpaka ibot inyi Jioba
Eyi ema ekpakabe ibot isan̄a, linyọn̄ yi ojojot me lek ijo inu, ukwook, mè mkpa
Jioba motap uyaka me lek ijo inu, ukwook, mè mkpa. Ebilene meyaka iso ifuk mè iluk me Paradais
6. Jioba ikikpọ eji chieen̄ me lek me mgbọ eji ekibọkọ ukwook
Ire Awaji ikekikpọ eji chieen̄ me lek eji esikibọkọ ukwook ni? Kpọ inu Ogwu Ubọọn̄ Debit mè ogwu otuchieen̄ Pita egebe. Fuk Okwa Itọn̄ 31:7 mè Pita Eyi Adasi 5:7, mè igbaan̄ ikpa idodo yi:
Ike owa ke ikikup owu me lek irọriọọn̄ ibe ke Jioba ikekimun̄ mè ikikpọ eji chieen̄ me lek me mgbọ eji ekibọkọ ukwook?
7. Awaji motap uyaka me lek otutuuk ukwook ebilene
Fuk Asaya 65:17 mè Ichichili 21:3, 4, mè igbaan̄ ikpa idodo yi:
Keke orọ ikikat owu ejit irọriọọn̄ ibe ke Jioba mosan̄a otutuuk ufialek ebilene ekije itibi?
Ire oriọọn̄ ni?
Mgbọ Setan okan̄be adasi ataak, ikan̄ ataak ya itoon̄ Jioba. Orere, irọ ibe ebi ene ekemun̄ Jioba kubọk ijo Ogwu Mkpulu. Jioba isi isan̄a otutuuk ukwook ebilene isan̄a me mgbọ okup me isi, motuku erieen̄ kan̄ itana. Eyi isibi ibe ke ọmọ mojeen̄ ibe ke mkpulu kan̄ onwọn ichit. Itutuku erieen̄ Jioba itana ore inu okukup ufiak ichit me inyọn̄ mè ijọn̄.—Matiyu 6:9, 10.
USINI ENE EKIBE: “Ukwook ire nkeek Awaji isa inyi eji.”
Keke ore nkeek kwun̄?
ME MGBIDIM
Ire Setan, orere, Yọk melek Adam mè Îfu ke ebefieek ikọ me lek ijo inu okibọkọ irek me linyọn̄ yi. Jioba ikikpọkpọ eji chieen̄ me lek me mgbọ eji ekibọkọ ukwook, morọ mkpọ si sọnja mgbọ isasa isan̄a isan̄a.
Idodo
Kpasi ataak ke Setan okan̄ inyi Îfu?
Ike owa ke mkpaka-ibot Adam mè Îfu osa ikaan̄ mgbaan̄ me lek otutuuk kiji?
Ike owa ke eji esa iriọọn̄ ibe ke Jioba ikikpọkpọ eji chieen̄ me lek mgbọ eji ekibọkọ ukwook?
WEEK
Kween̄ mkpọ Baibul obe ijo inu orebe.
Fuk gbaalek inu ofolek rumurumun̄ eyi Setan ogwu orere Yọk osan̄abe isibi me uko Iden.
“Why Does God Allow Suffering?” (The Watchtower, January 1, 2014)
Wọlọ kpọ ufọọk-otu okinyi ene ukarajit isa inyi idodo ge oyọyọt.
“Why Did the Holocaust Happen? Why Didn’t God Stop It?” (Web article)
Kpọ inu ogwu enerieen̄ ge okween̄be ofolek ukwook ikimun̄ ikana ọmọ.