Daniel
4 Pu caldeo che huiñoldungufi tati lonco ülmen arameo quehun mu: “¡Ahuem ñidol, rumel mongelenge! Feipimuiñ chem tami peuman, fei iñchiñ feipihuaiñ chem pifel ti peuma”. 5 Tati lonco ülmen huiñoldungufi tati pu caldeo: “Tüfa tañi dulliel: eimün feipimunoli chem tañi peuman ca chem pifel, catrücañmangeaimün tamün cuerpo ca tamün ruca tripatripatuhuengetuai. 6 Huelu feipumuli chem tañi peuman ca chem pifel, fentren regalo ta eluhuayiñ, fürenehuayiñ ca fütra püramyengeaimün. Feimu, feipimuchi tati peuma ca ñi chem pifel”. 11 Eimi tami feipimufiel rume cüdaungei taiñ femal. Ngelai inei no rume tami pengelelaeteu tüfa, pu dios müten femafui. Fei engün rangi pu che mu mülelaingün”. 21 [...] pu rey müntuñmafi tañi reycülehuenoal ca elcünuquefi pu rey [...] 25 Arioc pürümquechi yefi Daniel tati lonco ülmen mu, fei feipifi: “Pefiñ quiñe huentru Judá mapu mu cüpalngelu, tüfa feipiaimu chem pifel tami peuma”. 26 Fei tati lonco ülmen feipifi ta Daniel, Beltsasar pingequefulu: “¿Rüfcünu feipiafen chem tañi peuman ca tañi chem pifel?”. 28 Huelu huenu meu mülei quiñe Ngünechen pengelquelu ellcalechi dungu. Fei ta quimeleimu eimi, ñidol Nabucodonosor, chem tañi rupayal afaelchi antü meu. Tüfa tami peuma ca tami peel petu tami cudulen cahuitu mu: 31 “Ahuem, eimi rey, petu adquintulefulu eimi, perumefimi quiñe fütra adentun. Feitachi adentun alüpürafui ca rume huilüfcülefui, huitralefui eimi tami adquiñ mu ca llicafalfui. 32 Tati adentun ñi lonco deumangefui cüme oro mu. Tañi rücu ca tañi lipang plata mu deumangefui. Tañi pütra ca tañi chang cobre mu deumangefui. 33 Tañi matra pañillhue mu deumangefui, ca tañi namun pichin pañillhue mu ca pichin fotra mu. 34 Eimi adquintuimi fei quiñe cura trafolngerpui, cuhu meu no, ca trenfi ti adentun ñi namun reyüconcülelu pañillhue fotra engu, ca atemcünufi. 35 Feimu ti pañillhue, fotra, cobre, plata ca oro com trür trafocangei. Pinu reque feletui elngelu lila meu hualüng antü meu. Fei tati cürüf yetueyu, ngehuelai chem no rume. Huelu tati cura hulelfilu tati adentun, quiñe fütra huinculngetui, fei apolfi com ti mapu. 39 Huelu mülehuetunolmi eimi, huefpayai cangelu gobierno, doicülelayai eimi mu. Ca huefpayai cangelu gobierno cülangealu, cofre mu trürcülei ca com Mapu ta ngünenieai. 41 Tati namun ca tati changüll namun tami peel reyülei fotra engu pañillhue, ca femngechi feiti gobierno hudaleai. Huelu quiñe troquiñ ti gobierno mu nieai nehuen pañillhue reque. Chumngechi tami peel reyüleai fotra engu pañillhue mu. 42 Ca tati changüll namun reyülefui fotra ca pañillhue engu, ca femngechi ti gobierno quiñeque dungu mu nieai nehuen ca quiñeque mu nielayai. 43 Feichi pañillhue tami peel quiñe mu mülei tati fotra engu, huelu cüme pünaquelai. Ca femngechi tati troquiñche doi nehuen-ngelu quiñe mu müleai tati pu che mu, huelu quiñeucülelayai engün. 44 Feichi pu lonco ülmen ñi antü meu, Ngünechen huenu mu mülelu elcünuai quiñe ngünenien, chumcaunorume apümcangelayai. Ca tüfachi ngünenien elcünungelayai caque troquiñche mu. Atemcayafi ca apümcayafi com tüfachi caquelu pu ngünenien, ca quisu müten chumcaunorume aflayai. 45 Femngechi felerpuai tami peel. Tati fütra huincul mu nüleftripai quiñe cura, huelu quiñe che no rume chumlaeyeu tañi ütrüfnagal. Feitachi cura atemcafi tati pañillhue, ti cobre, ti fotra, ti plata ca tati oro. Chau Ngünechen pengelelfi tati lonco ülmen chem ñi rupayal cüpalechi antü mu. Tami peuma rüf feleai ca femtripayai chumngechi tañi feipingeel”. 47 Tati lonco ülmen feipifi ta Daniel: “Eimün tamün Ngünechen mai doicülei caquelu pu dios meu, Ñidolcülei com pu loncolelu meu ca pengelquei ellcalechi dungu. Feimu eimi pepi pengelelen ti ellcalechi dungu”.