Isaías
27 Feichi antü Chau Jehová püneafi tañi yungechi fütra cuchillo llicafalngelu,
fei lefcontuafi tati Leviatán,* tüfa tati filu huinolquiyauquelu*
ca trompeucülen amulelu.*
Chau Dios langümafi tati fütra filu lafquen mu mülelu.
2 Feichi antü ülcantulelafimün tati domo:*
“¡Ti anüm ofad hulquelu pulcu!
3 Iñche, Jehová, cuñiutucuquefiñ.
Hutruconiequefiñ.*
Antü ca pun cuñiutucuniequefiñ,
femngechi tañi huesalcangenoal.
4 Iñche illculelan.*
Feimu, ¿inei eluhuafui ñi ngantucuafiel chacai* ca huesa cachu iñche tañi anüm ofad meu? Femle, iñche quehuayafiñ.
Pünocayafiñ ca lüpümafiñ com feiti huesaque cachu.
5 Doi mai, feiti che cüpape iñche mu ñi cuñiutucungeal.
Cüpape tayu cümelcautual,
cümelcautuayu, cüpape”.
6 Cüpalechi antü, Jacob folilnagai,
Israel rayütuai ca choyüai,
apolafingün tüfachi mapu tañi fün meu.
7 Israel, ¿rüf duamniepei mai ñi fente cupafcangeal?
¿Chumngelu cai* Israel femngechi langümngeai?
8 Llicafalchi huirarün mu yafcahuaimi quisu eimu, fei huemünentuafimi.*
Nehuen mu pimunentuafimi feichi antü mülele puelche cürüf.
9 Femngechi perdonañmangeai Jacob tañi culpan,
fei tüfa rupayai entuñmangele tañi culpan:*
rüngümcülechi caliza cura reque,
Chau Dios femngechicünuafi tati altar ñi cura.
Ngehuelayai poyengequeelchi orcon mamüll* ca chem altar no rume cheu ñi lüpümngequen incienso.*
10 Nehuen-ngechi huaria huellilehueai,
ti lelfün cachu huellileai, quisucünungeai huellin mapu reque.*
Üye mu ti pichi culliñ ütayai ca tranacünuhuai,
ca iyafi ti anümca ñi rou.*
11 Ancüle tañi pichique rou,
cüpayai domo tañi catrünentuafiel,
fei cütraltuafingün.
Tüfachi pu che nielaingün adümuhun.
Feimu tañi deumaeteu cutranpiuqueyelayayu,
tañi femcünueteu fürenelayayu engün.
12 Ahuem, pu Israel che, chumngechi mütroungequei anümca ñi ñimitungeal* ñi fün, ca femngechi Chau Jehová hueluque ñimituaimünmeu com eimün fill püle puhulngelu, pu mülelu Éufrates leufü püle puulu ta Egipto ñi huitrunco mu.* 13 Feichi antü dungulngeai quiñe fütra cullcull, fei pu lalatumequelu Asiria mapu meu ca pu puhulngelu Egipto mu cüpayaingün, pochongnagaingün* Chau Jehová ñi adquiñ meu, Jerusalén ñi lif huincul mu.