Isaías
56 Tüfa ñi feipin Chau Jehová:
“Inaniefimün ti norngelu, nor dungu femaimün.
Fülcülepai* ñi montulcheal
ca pengelcünuan ñi norngen.
2 Ayühun niei ti huentru femquelu tüfa,
ca ti huentru ñi fotüm cüme nüucülelu tüfachi dungu mu.
3 Ti ca cüpanche poyefilu ta Chau Jehová ngelai ñi feipial:
‘Chau Jehová, ¿püntünentupelayaeneu* tañi troquiñche mu?’.
Ca ti huentru hulquenolu yall* ngelai ñi feipial: ‘¡Tüfei! Iñche ta quiñe ancülechi anümca’”.
4 Tüfa ñi feipin Chau Jehová:
“Pu hulquenolu yall yamniefile tañi ürcütun antü,
cüpa femle iñche ñi ayünieel
ca elcünunofile engün tañi eldungu,
5 fei ponhuitu tañi ruca mu eluafiñ cheu tañi müleal ca loncontucunieafiñ tañi üi,
tüfa doi cümei ta nieal fotüm ca ñahue.
Rumel huirintucunieafiñ tañi üi engün,
turpu aflayai.
6 Tati pu ca cüpanche poyefile ta Chau Jehová, femngechi ñi serfiafiel,
piuqueyeafiel Jehová ñi üi
ca ñi cüdahuelafiel,
yamniefile engün ti ürcütun antü, pecancanofile,
ca elcünunofile engün iñche tañi eldungu,
7 fei cüpalafiñ engün iñche tañi lif huincul mu,
rume ayühuelafiñ engün tañi ngillatuhue ruca mu.
Tañi altar mu lloumayafiñ ñi lüpümngeelchi chalintucun engün* ca ñi caquelu chalintucun.
Tañi ruca, ngillatuhue rucangeai ñi cüpayal com pu che”.
8 Ti Doi Fütra Ñidol Jehová trahulmequei pu Israel che fill püle mülelu. Fei feipi:
“Deu trahulfiñ quiñeque che, tüfa hula cüpalafiñ caquelu”.
9 Ipamün, com eimün, pu auca culliñ* lelfün mu mülelu,
com eimün, pu auca culliñ mahuidantu mu mülelu.
10 Pu soltau* traumaleingün, uhuamlaingün rume.
Quetro trehuangeingün, pepi huancüquelaingün rume.
Pifarpifarngeingün ca tranaleingün. Ayüqueingün ñi umautual müten.
11 Ilca* trehuangeingün,
tuduamquelaingün.
Quimnochi camañfengeingün.
Quisuque cañpüle amuingün.
Com engün ayüquei ñi huehual plata ngünencan mu. Feipiqueingün:
12 “Cüpamün, apuen, yemean pulcu.
Putuaiñ, ngollicahuaiñ.
Hule femaiñ fachantü reque, ¡doi cümecünuaiñ llemai!”.