Isaías
49 Allcütumuchi eimün, pu mülelu huapi meu.
Ngüneduamniemün, pu alü camapulechi troquiñche.
Chau Jehová mütrümeneu* petu ñi choyüngenon iñche.
Üitueneu petu ñi mülen tañi ñuque ñi pütra meu.
Yungechi flecha reque femcünueneu,
ellcacünueneu* cheu ñi yeniequen tañi flecha.
3 Feipieneu: “Ahuem, Israel, eimi iñche tañi cüdaufe.
Eimi meu pengelan ñi afmatufalngen”.
4 Huelu iñche ta feipin: “Refalta* rume cüdahun.
Ngünam apümcafiñ ñi nehuen falinochi dungu meu.
Huelu, rüfcünu, Chau Jehová juzgamequeneu.
Tañi Chau Dios mu cüpai ñi cullitu”.
5 Chau Jehová deumaeneu tañi ñuque ñi pütra mu quisu tañi cüdaufengeal.
Tüfa hula feipieneu ñi cüpaltuafiel ta Jacob,
fei ñi trahuluhual Israel engu.
Chau Jehová ñi adquiñ mu püramyengean.
Tañi Chau Dios nehuentucuaeneu.
6 Fei feipi: “Eimi iñche tañi cüdaufe,
fei huiño cüme eltuafimi Jacob ñi pu troquiñche
ca cüpaltuafimi Israel ñi mülehuechi pu che.
Huelu feica müten no, cafei peloncünueyu reque pu troquiñche mu,
femngechi ñi puhual tañi montuluhun cheu ñi afpun ti mapu”.
7 Chau Jehová, Israel ñi Lifngechi Ngünechen, tati ngillanentufilu ta Israel, dungufi tati illamcangelu, ñi üdeeteu ti troquiñche, tati cüdahuelquefilu pu ngünenielu. Feipifi:
“Pu lonco ülmen peaingün ca huitrapürayaingün.
Pu principe pochongnagaingün*
Chau Jehová ñi duam mu, tati manelfalngelu,
Israel ñi Lifngechi Ngünechen, tami dullieteu”.
8 Tüfa ñi feipin Chau Jehová:
“Fürenechen antü mu huiñoldungueyu.*
Montuluhun antü mu quellueyu.
Cuñiutucunieyu, fei elcünueyu quiñe eldungun reque tati pu che mu.
Femngechi tami cüme elcünutuafiel ti mapu.
Fei huiño nütuafingün ñi llohuelchi mapu feula ñi huesalcalen.*
9 Feipiafimi pu presu: ‘Tripamün’.
Ca tati pu dumiñmalelu feipiafimi: ‘Peufaluumün’.
Peaingün iyael ina rüpü mu,
ca müleai cachu ina pichique rüpü cheu ñi rupaquen fentren che.
10 Ngüñülelayaingün ca huihulayaingün,
Huesalcalayayu ti fütra are ca pañi antü no rume.
Tati cutranpiuqueyechequelu adnieayu engün
ca yeayu hufco püle.*
11 Rüpücünuafiñ com tañi pu huincul,
ca tañi alürupachi rüpü püramngeai.
12 ¡Tüfei! Pu che rume camapu cüpalei.
Quiñeque cüpaleingün norte püle* ca conhue antü püle,
caquelu cüpaleingün Sinim mapu mu”.
13 Ayühunquechi huirarnge, huenu, ca ayüunge, mapu.
Huirarpe pu huincul, ayühunquechi huirarpe.
Chau Jehová yafültucufi tañi pu che
Ca cutranpiuqueyefi tañi pu che cutrantupiuquelelu.
14 Huelu Sion feipiconcülei:
“Chau Jehová quisucünueneu, Chau Jehová ngoimanentueneu”.*
15 Quiñe domo, ¿ngoimanentupeafui mai tañi pichiche?
Cam, ¿cutranpiuqueyelayafui ñi püñeñ quisu tañi choyüfiel?
Tüfachi pu domo ngoimanentufule rume, iñche chumcaunorume ngoimanentulayayu.
16 ¡Tüfei! Tañi pülai cuhu mu huirintucufiñ tami üi.
Ngüneduamnieñmaeyu tami fütraque cura malal.
17 Tami pu püñeñ matu huiñoaingün.
Feiti tami teifücaeteu ca apümcaeteu, püntütripayaingün* eimi mu.
18 Püraquintunge, huall püle adquintunge.
Com trahuluumequeingün.
Cüpaleingün eimi mu.
Chau Jehová feipi: “Iñche tañi mongen mu feipicünuayu,
llancatu reque püneafimi engün,
quiñe novia reque adelcacünuhuaimi fei engün meu.
19 Tami mülehue apümcangefui, quisucünungefui ca tami mapu teifücalefui.
Huelu feula rume pichin-ngeai tati pu che mülelu üyeu,
ca tami apümcaeteu rume camapu müleaingün.
20 Pu püñeñ choyüngelu lalu hula tami pu püñeñ feipiaimu:
‘Tüfachi mülehue rume pichin-ngei ta iñche mu.
Huichucünuñmaen cheu tañi müleal’.
21 Tami piuque mu feipiaimi:
‘Iñche ñamümfiñ tañi pu püñeñ, pepi ñiepüñeñquelan,
camapu yengen ca presulen.
Fei, ¿inei am ñi pu püñeñ tüfa tañi lloufiel?
¿Inei am tremümeyu engün?
¡Tüfei! Iñche quisulehuefun,
fei ¿cheu chi tripaingün?’”.
22 Tati Doi Fütra Ñidol Jehová feipi:
“¡Ngüneduamnge! Huitrañpüraman tañi cuhu, femngechi ñi peaeteu fillque troquiñche
ca elcünuan quiñe orcon ñi peaeteu tati pu che.
Fei meta cüpalafingün tami pu huentru püñeñ
ca meñcu cüpalafingün tami pu domo püñeñ.
23 Pu lonco ülmen cuñiutucuaimu,
ca tañi pu princesa cüdahuelaimu.*
Mapu mu puhulaingün ñi lonco tami adquiñ meu,
ca cülmayafingün ti trufür tami namun meu.
Fei quimaimi iñche ta Chau Jehová.
Com pu maneluucülelu iñche mu turpu yehuelcangelayaingün”.
24 Ti nehuen-ngechi hueichafe,* ¿müntuñmangepeafui mai* tañi pu presu?
¿Montulngepeafui mai pu che ñi presuyefiel ti huesalcachequelu?
25 Tüfa ñi feipin Chau Jehová:
“Felei llemai, ti nehuen-ngechi hueichafe müntuñmangeai tañi pu presu.
Ca montulngeai tati pu che ñi presuyefiel ti huesalcachequelu.
Iñche chaftuafiñ tami pu chaftumequeteu
ca montulafiñ tami pu püñeñ.
26 Tami pu huesalcamequeteu femcünuan ñi ilotuafiel quisu tañi ilo.
Tañi mollfüñ cochü pulcu troquiafingün, fei ngollicahuaingün.
Femngechi com tati pu che quimürpuaingün iñche ta Chau Jehová,
tami Montulqueteu, tami Ngillanentueteu,
Jacob ñi nehuen-ngechi Ngünechen”.