Isaías
42 ¡Tüfei! ¡Tüfa iñche tañi cüdaufe, quelluntucumequefiñ!
¡Iñche dullicünufiñ! ¡Tüfa iñche tañi ayühuelqueteu!
Elufiñ tañi nehuen,
fei cüpalai nor dungu fillque troquiñche mu.
2 Huirarlayai, nehuentu dungulayai,
eluulayai ñi allcüngeal tañi dungun rüpü püle.
3 Huatrocalayafi* ti rüngi huesalcalelu.
Chongümlayafi ti mecha müte üicülenolu.
Quisu cüpalai rüf nor dungu.
4 Ngañhuadlayai ca afeluulayai. Cüpalai nor dungu mapu meu.
Tati pu che mülelu huapi mu üngümcüleingün* tañi ley dungu.*
5 Tüfa ñi feipin Chau Ngünechen Jehová,*
tati Deumafilu ti huenu, tati Afmatufalchi Dios ñi ünifcünufiel* ti huenu.
Quisu deumafi* ti mapu ca com ñi hulquen.
Eluquefi neyen pu mülelu mapu mu,
ca pu miyaulu mapu mu eluquefi nehuen ñi mongeleal.
6 “Iñche, Chau Jehová, mütrümeyu* tañi femal nor dungu,
nünieñmaeyu tami cuhu.
Cuñiutucuayu ca femcünuayu quiñe eldungun reque tati pu che mu,
quiñe pelon reque fillque troquiñche mu.
7 Fei nülañmayafimi pu trauma ñi nge,
entuafimi ti presu tati lolo mu,
ca carcel mu entuafimi pu anülelu dumiñ meu.
8 Iñche Chau Jehová. Tüfa tañi üi tati.
Iñche yamfalngen, fei inei no rume elulayafiñ ñi femngechi yamngeal.*
Iñche poyefalngen, fei elulayafiñ ñi poyengeal adentun.*
9 ¡Tüfei! Tati hunenque dungu deu rupai.
Tüfa hula feipihuaiñ hueque dungu,
petu ñi rupanon feipileluhuaiñ ta eimün”.
10 Ülcantulelfimün ta Chau Jehová quiñe hue ül.
Ülcantun mu püramyefimün, eimün pu alü camapulelu,
eimün, pu miyaulu lafquen püle ca com ñi mülen fei mu,
pu huapi ca ti pu che ñi mülen fei mu.
11 Tati huellin mapu* ca tañi fillque huaria nehuentu dungupe,
ca fempe pu rucantu cheu ñi mülen Quedar.
Ayühun mu huirarpe tati pu che mülelu tati fütra cura mu,
huirarpe engün huechuñ huincul meu.
12 Com engün mülei ñi yamnieafiel ta Chau Jehová,
ca mülei ñi püramyeafiel huapi mu.
13 Chau Jehová quiñe nehuen-ngechi hueichafe reque* tripayai ñi hueichayal.
Rume eluucüleai quiñe hueichan huentru reque.
Huirarai, felei, entuai ñi huirarün quiñe huentru reque amualu ñi hueichayal.
Quimfalcünuai ñi doi nehuen-ngen tañi pu caiñe mu.
14 Quisu feipi: “Ñücüfcülequen* alüñma mu.
Dungulan, quisutu catrütuhun.
Eyütuan, pifaran* ca catrüconmequeai ñi neyen
quiñe domo reque petu choyümequelu.
15 Apümcayafiñ huincul ca mahuida,
ancümüñmayafiñ com tañi anümca.
Huapicünuafiñ leufü
ca ancümafiñ menoco nielu fentren alüquechi cachu.
16 Adnieafiñ pu pelonolu quiñe rüpü mu ñi quimnoel engün.
Femcünuan ñi pünoal engün quimnoelchi rüpü mu.
Fei engün ñi adquiñ mu peloncünuafiñ ti dumiñ
ca cüme elcünutuafiñ ti lelfün lafcülenolu.
Tüfa feman fei engün mu, quisucünulayafiñ”.
17 Tati pu maneluucülelu adentun mu
quechanentungeaingün ca rume yehuelcangeaingün.
Fei engün ti pañillhue adentun* feipiquefingün “Eimün iñchiñ taiñ pu dios”.
18 Eimün pu pilu, allcütumün.
Eimün pu trauma, adquintumün, fei ngüneduamfimün.
19 ¿Inei am traumangei tañi cüdaufe reque?*
Ca, ¿inei fente pilungei iñche tañi huerquen reque?
¿Inei fente traumangei tati cümelcangelu reque?
¿Inei fente traumangei Chau Jehová ñi cüdaufe reque?
20 Epe fill pequeimi, huelu inaduamquelafimi.
Nülalei tami pilun, huelu allcüquelaimi.
21 Tañi nor chengen mu,
Chau Jehová ayüuquei ñi pengelal ñi afmatufalngen ca ñi yamfalngen ti ley.*
22 Huelu tüfachi troquiñche malocontungei ca müntuñmangei* tañi nieel.
Com engün cerrantucuucülei lolo mu ca ellcaucüleingün* carcel mu.
Montulngelaingün malocontungen mu.
Cañpüle yengeingün, huelu inei no rume feipilai “Huiño cüpalngetupe engün”.
23 ¿Inei eimün mu allcüai tüfa?
¿Inei ngüneduamafi ca allcütuai raquiduamün mu chem ñi rupayal cüpalechi antü mu?
24 ¿Inei hultucufi ta Jacob quiñe falin chemcün reque* ñi nüngeal?
¿Inei hultucufi ta Israel pu malocontuquelu mu?
¿Jehová no am? Quisu mu culpaingün.*
Pilaingün ñi miyahual tañi rüpü mu
ca cüpa inalafingün tañi ley.*
25 Feimu rume illcutuniefi engün*
ca cutrancafi engün fütra hueichan mu.
Ti fütra hueichan apümcafi com tañi hualloñmanieteu,* huelu feyentulaingün.
Lüpümtucuniengeingün, huelu duamcülelaingün.