Isaías
66 Tüfa ñi feipin Chau Jehová:
“Ti huenu, fei tañi ülmen huancu. Ti mapu, fei tañi pünotuhue.
Feimu, ¿cheu deumalelmuafun quiñe ruca?
¿Cheu müleafui tañi ürcütuam?”.
2 Chau Jehová feipi: “Tañi cuhu mu llemai com deumafiñ.
Femngechi com mülerpui.
Feiti che ngüneduamafiñ:
tati ñom piuquengelu, cutrantupiuquelelu ca rume yamniefilu* iñche tañi dungun.
3 Feiti langümfilu quiñe toro, langümchelu reque troquingequei.
Tati chalintucufilu quiñe ufisa, trafolmafi reque ñi topel quiñe trehua.
Tati hul-lu quiñe chalintucun,* huli reque sañhue ñi mollfüñ.
Tati chalintuculu olibano, püramyemequefilu adentun troquingequei.
Quisuque dullingün tañi rüpü,
ca ayüumaqueyu engün ünufalchi dungu.
4 Fei dullian chumngechi tañi cutrancayafiel engün.
Huercülelafiñ chem tañi llicaniefiel engün.
Mütrümlu iñche, huiñoldungungelan.*
Dungulu iñche, allcütungelan.
Femmequeingün chem tañi huesa troquifiel,
dullingün chem tañi ayünofiel”.
5 Allcütufimün Chau Jehová tañi feipin, eimün, pu rume yamniefilu tañi dungun:*
“Tañi üi ñi duam meu, tamün pu peñi üdeeimünmeu ca famentueimünmeu.* Fei feipingün: ‘¡Chau Jehová püramyengepe!’.
Fei quisu* peufaluhuai ca ayühuelaimünmeu,
huelu fei engün yehuelcangeaingün”.
6 ¡Allcün-ngei pofolcahun cüpalu tati huaria mu! ¡Chau Dios ñi ruca püle allcün-ngei!
Chau Jehová huiñolelmequefi ñi huesa femün tañi pu caiñe.
7 Petu ñi acunon chi antü ñi nieal tañi püñeñ, choyüfi.
Petu ñi cutrancaunon tañi choyüal, choyüfi quiñe huentru püñeñ.
8 ¿Allcüngequepefui mai feitichi dungu?
¿Pengequepefui mai tüfa?
¿Huefrumepeafui mai quiñe troquiñ mapu quiñe antü mu müten?
¿Huefrumepeafui mai quiñe troquiñche matu müten?
Fei Sion cutranlu müten ñi püñeñal, choyüfi tañi pu püñeñ.
9 Chau Jehová feipi: “Puhulfiñ chi antü ñi nieal tañi püñeñ, fei ¿rüfcünu eluhuafun ñi choyüngenoal?”.
Tami Chau Ngünechen feipi: “Iñche femcünun ñi choyüafiel tañi püñeñ, ¿fei rüfcünu catrütuafun tañi choyüngenoal?”.
10 Com eimün, pu piuqueyefilu ta Jerusalén, ayüumün ca pürapapiuquelemün quiñentrür quisu engu.
Com eimün, pu hueñancülelu quisu ñi duam meu, ayühuaimün quiñentrür Jerusalén engu.
11 Chumngechi quiñe ñuque moyolquefi ca tuduamelquefi tañi püñeñ, ca femngechi Jerusalén cuñiutucuaimünmeu.
Felei, eimün tuduamcüleaimün ca rume ayüucüleaimün, Jerusalén püramyengelu cai.
12 Tüfa ñi feipin Chau Jehová:
“Iñche eluafiñ tüngün,* quiñe leufü reque feleai,
ca tati fillque troquiñche ñi falinque chemcün meu püramyengeai.
Quisu moyolaimünmeu, metanieaimünmeu,
tucuaimünmeu tañi lucu mu, femngechi nengümcayaimünmeu.
13 Quiñe ñuque reque tüngduamelquefilu tañi püñeñ,
ca femngechi tüngduameluhuaiñ.
Jerusalén ñi duam meu tüngduamelngeaimün.
14 Eimün peafimün tüfachi dungu, fei ayühuelmapiuqueaimünmeu.
Hue carü cachu reque nehuencüleai tamün cuerpo.*
Tañi nehuen-ngechi cuhu Chau Jehová pengelelafi tañi pu cüdaufe,
huelu com pu che ñi adquiñ meu condenayafi tañi pu caiñe”.
15 “Chau Jehová cütral reque cüpayai,
tañi carretela fütra cürüftucu mahun reque felei.
16 Chau Jehová cutrancayafi com tati pu che cütral mu,
felei llemai, tañi fütra cuchillo mu femai.
Fentren che layai Chau Jehová ñi cuhu mu.
17 Feiti pepicaulu ca liftuulu ñi conal ti falinque lelfün mu,* ilo sañhuetuqueingün, dehu ca epe fill ünufalngelu, com engün apümcangeaingün” feipi Chau Jehová. 18 “Iñche am com quimtucunielu ñi femquen engün ca tañi raquiduam, feimu cüpayan. Trahulafiñ che fillque troquiñche mu cüpalu ca fillque quehun nielu. Cüpayaingün, fei peaingün tañi afmatufalngen”.
19 “Feman quiñe afmatun dungu, fei peafingün. Quiñeque lefmahuaingün, fei huercüafiñ engün fillque troquiñche mu. Feitichi troquiñche turpu allcüquelaingün iñche ñi dungu ca pequelaingün tañi afmatufalngen. Puhuaingün ta Tarsis, Pul ca Lud, üye mu pu che cüme pünequefingün ti arco. Ca puhuaingün ta Tubal, Javán ca alü camapulechi huapi. Fillque troquiñche mu huldunguaingün iñche tañi afmatufalngen. 20 Fei engün yelelafingün yehun reque* ta Chau Jehová, cüpalafingün com tamün pu peñi mülelu fillque troquiñche mu. Cüpalafingün iñche tañi lif huincul mu, tüfa ta Jerusalén. Cüpayaingün cahuellu mu, fütraque ca pichique carreta meu, mula ca matuyauchi camello mu. Femngeai chumngechi pu Israel che cüpalquei yehun Chau Jehová tañi ruca mu quiñe lif metahue mu” feipi Chau Jehová.
21 Chau Jehová ca feipi: “Cafei dullian quiñeque che ñi sacerdotengeal ca Leví chengeal”.
22 Cafei Chau Jehová feipi: “Ti hue huenu ca hue mapu ñi deumayafiel rumel mülecayai tañi adquiñ meu. Fei ca femngechi rumel mülecayai tamün cüpanche ca tamün üi”.
23 “Fillque hue cüyen ca fillque ürcütun antü,*
com cüpayaingün ñi pochongnagal* tañi adquiñ meu” feipi Chau Jehová
24 “Tripayaingün ca adquintuaingün pu lachi huentru tañi caiñetueteu.
Pu piru ñi mülen fei engün mu, lalayaingün.
Ti cütral ñi lüpümmequeteu, chongnaglayai.
Ünufalngeai com tati pu che mu”.