Isaías
2 Isaías, Amoz ñi fotüm, pei chem ñi rupayal Judá ca Jerusalén mu:
2 Afaelchi antü meu,
ti mahuida cheu ñi mülen Chau Jehová ñi ruca
doi alüpüraleai caquelu mahuida mu ca cüme anücünungeai.
Cafei doi alüpüraleai caquelu huincul mu,
üye mu puucüleaingün com pu troquiñche.
3 Fentren troquiñche amuai ca feipiaingün:
“Amuiñ, pürapuiñ Chau Jehová ñi huincul mu,
Jacob ñi Ngünechen tañi ruca mu.
Quisu quimeltuaiñmu tañi rüpü,
fei iñchiñ miyahuaiñ chumngechi ñi ayünieel”.
Sion mu tripayai ti ley,*
Jerusalén mu tripayai Chau Jehová ñi dungun.
Araucünuafingün tañi fütraque cuchillo
ca rosehuecünuafingün tañi huaiqui.*
Pu troquiñche hueluquentu hueichaulayaingün*
ca quimhuetulayaingün chumngechi ñi quehuayal.
5 Ahuem, Jacob ñi pu che, amuiñ,
miyahuaiñ Chau Jehová ñi pelon mu.
6 Eimi quisucünufimi tami pu che, Jacob ñi pu cüpanche.
Inanierpuingün fentren huimtun tripahue antü püle cüpalu,
conqueingün calcu dungu mu pu Filistea che reque,
pu ca cüpanche ñi pu yall* pütrüleingün quisu engün meu.
7 Tañi mapu apolei plata ca oro mu,*
tañi falinque fillem afquelai.
Tañi mapu apolei cahuellu mu,
tañi carretela* engün raquifalngelai.
8 Tañi mapu apolei falinochi dios meu.
Poyequefingün chem tañi adentucünufiel,
ñi deumael engün tañi cuhu mu.
9 Femngechi pu huentru pochongnagqueingün,* yehuentucuuqueingün,
fei rulpacünulayafimi ñi femün engün.
10 Chau Jehová ñi illcun* llicafali
ca tañi nehuen afmatufali.
Feimu conpumün fütra cura mu
ca ellcaumün* trufür mapu mu.
11 Pu mallma che pochongnacümafi tañi lonco
ca pu checauquelu yehuelcangeaingün.*
Chau Jehová müten püramyengeai feichi antü.
12 Feita Chau Jehová ñi antü, quisu Ñidolcülei pu hueichafe mu.
Chaftuafi com tati mallma chengelu ca checahun-ngelu,
com engün chaftuafi, ülmen chengelu ca ülmen chengenolu rume.
13 Chaftuafi com pu cedro anümca Líbano mu, feiti alüpüralelu ca püramngelu.
Chaftuafi com pu coyam* Basán mu.
14 Chaftuafi com fütraque mahuida
ca alüpürachi huincul.
15 Chaftuafi com alüpürachi ruca ca com nehuen-ngechi cura malal.
16 Chaftuafi com pu farcu Tarsis mu
ca com pu falinque farcu.
17 Ti mallma huentru pochongnacümngeai
ca ti checahun-ngechi huentru yehuelcangeai.*
Chau Jehová müten püramyengeai feichi antü.
18 Com pu falinochi dios ngehuetulayai.
19 Chau Jehová ñi illcun llicafali
ca tañi nehuen afmatufali.
Fei huitrapürayai ñi nengümcayafiel ti mapu ca ñi llicalcacheal.
Fei tati pu che conai fütraque cura ñi lolo mu
ca ti mapu ñi rüngan meu.
20 Feichi antü pu huentru nüafingün tañi falinochi dios deumangelu plata ca oro mu,
deumarquefingün ñi pochongnagal fei engün ñi adquiñ mu.
Fei ütrüftucuafingün cheu ñi mülen pu musaraña* ca ti pu murcielago.
21 Jehová ñi illcun llicafali
ca tañi nehuen afmatufali.
Fei huitrapürayai ñi nengümcayafiel ti mapu ca ñi llicalcacheal.
Fei tati pu che conai fütraque cura ñi lolo mu
ca ellcahuaingün rangi fütraque cura mu.
22 Tamün cümelcaleal, maneluuhuelayaimün ti pecan huentru mu,
quisu duamniei ñi neyüal tañi mongeleal.
¿Chumngelu am* falintungepeafui?