Isaías
1 Uzías, Jotán, Acaz ca Ezequías ngünenielu Judá mu, Chau Dios quiñe afmatun dungu mu pengelelfi ta Isaías,* Amoz ñi fotüm, chem ñi rupayal Judá ca Jerusalén:
2 Ahuem, pu mülelu huenu mu, allcütumün.
Ahuem, pu mülelu mapu mu, ngüneduamcülemün.
Chau Jehová feipi:
“Tremümfiñ ca quimeltufiñ tañi pu fotüm,
huelu chaftumequeneu engün.
3 Ti toro cüme quimniefi tañi ngillaeteu,
ca ti burro quimniei inei ñi eluqueteu iyael.
Huelu pu Israel che quimnielaeneu,*
tañi troquiñche nielaingün quimün”.
4 ¡Ahuem, tüfa quiñe culpafe* troquiñche!
Tüfachi pu che pütrün culpan yenieingün.
Rume huesaque fotümngeingün huesalcaquelu.
Elcünufingün ta Chau Jehová.
Illamcafingün Israel tañi Lifngechi Ngünechen,
furintucufingün.
5 Amulei tamün chaftumequen, fei ¿cheu am ca hulelcangeafuimün?
Com tamün lonco allfülei
ca com tamün piuque cutrancülei.
6 Chem no rume tremolelai eimün meu, namun ca lonco no rume.
Tamün cuerpo* catrülei, fill püle callfülehuei ca niei allfen nülalelu...,
liftungelai, impolngelai* pañu meu ca tuculelngelai aceite.
7 Tamün mapu huellilei.
Tamün huaria cütral mu lüpümtucungei.
Tamün adquiñ mu pu ca cüpanche imequeingün com ñi hulün tamün mapu.
Tamün mapu huelliletui malocontungelu reque.
8 Elcünungei Sion ñi püñeñ quiñe ellcaupeyüm reque* mülelu ofadentu meu,
quiñe llamasa reque* mülelu cheu ñi tucungequen pepino,
quiñe huaria reque ñi hualloñmanieteu pu caiñe.
9 Chau Jehová, Ñidolcülelu pu hueichafe mu, elcünunofule quiñeque taiñ pu che ñi mongetripayal,
Sodoma reque feleafuiñ
ca trürümngeafuiñ Gomorra reque.
10 Eimün pu ngünenielu* Sodoma mu, allcütufimün Chau Jehová ñi dungun.
Eimün pu Gomorra che, ngüneduamfimün taiñ Chau Dios ñi ley.*
11 Chau Jehová feipi: “¿Chem dungu mu am cümelcaqueneu tamün hulquen fentren chalintucun?*
Afeluuqueneu tamün lüpümngeelchi chalintucun.
Afeluuqueneu tamün hulqueelchi caniru* ca tamün motrilechi culliñ ñi yihuiñ.
Ti mollfüñ tamün hueque toro, cordero ca capüra, ayühuelquelaeneu.
12 Eimün cüpaqueimün tañi adquiñ mu.
Huelu, ¿inei feipieimünmeu tamün cüpayal,
tamün pünocayafiel tañi lepün?*
13 Cüpalhuelayaimün fün chalintucun* falinolu.
Üdefiñ tamün incienso.*
Conün mu quiñe hue cüyen fiestaqueimün, inaniequeimün ti ürcütun antü* ca mütrümchequeimün ñi trahuluhual.
Huelu nüngayelqueneu tamün conquen calcu dungu mu petu tamün femmequen falinque trahun.
14 Üdefiñ tamün fiestaquen conün mu hue cüyen ca caquelu fiesta.
Quiñe fanechi chemcün reque* mülei iñche mu,
ürcülen tañi yeniefiel.
15 Huitrañpüramün mu tamün cuhu,
cañpüle adquintuquen.
Fentren rupa llellipulmün rume,
iñche allcüquelan.
Tamün cuhu apolei mollfüñ mu.
16 Müñetumün, liftuumün.
Famentufimün* tañi adquiñ mu tamün huesa femmequen.
Fentecünumün tamün huesalcamequen.
17 Quim femaimün cümeque dungu, femaimün nor dungu,
norümtufimün ti huesalcachequelu,
incañpeafimün pu cuñifall,*
incañpeafimün pu lantu domo ñi dungu”.
18 “Cüpamün, cümelcautuaiñ” pi Chau Jehová.
Quiñe quelü pañu reque felefule rume,
fülangcünungeai cal ufisa reque.
19 Eluucülelmün tamün allcütual,
iyaimün com ti cümelu ñi hulquen ti mapu.
20 Huelu pinolmün ca feyentunolmün,
ti fütra cuchillo mu langümngeaimün,
Chau Jehová cai ta feipicünulu”.
21 ¡Ahuem! Tüfachi huaria poyequefui ta Chau Dios, huelu feula pod mongen domongetui.*
Apolerquefui nor dungu meu,
cümeque dungu mülenagquefui fei mu,
huelu feula re langümchefe müten mülei.
23 Tami pu principe trencül piuquengeingün ca quiñeucülei pu hueñefe engün.
Com engün ayüquei ñi ellca cullingeal* ca quintuqueingün ñi elungeal yehun.*
Femquelafingün nor dungu tati cuñifallcülelu*
ca turpu ngüneduamquelafingün ti lantu domo ñi juician dungu.
24 Fei Chau Jehová Ñidolcülelu pu hueichafe mu,*
Israel ñi Nehuen-ngechi Chau Dios, tati Ñidol,* feipi:
“¡Fentecünumün! Famentuafiñ tañi pu caiñetuqueteu
ca huiñoleltuafiñ ñi femün tañi pu caiñe.
26 Ellaca mu reque femcünuan tami huiño nietual juez
ca ngülamtuchefe nietuaimi cuifi reque.
Fei hula Nor Huaria pingetuaimi, Huaria Püntütripaquenolu* Chau Dios mu.
27 Nor dungu mu montulngeai ta Sion,
tañi pu che huiñotualu ca montulngeai nor dungu mu.
28 Pu feyentuquenolu ca pu culpafe* com quiñentrür apümcangeaingün.
Pu elcünufilu ta Chau Jehová fentepuai tañi mongen.
29 Fei engün yehuetripayaingün tamün ayüfielchi fütraque anümca
ca eimün yehuetripayaimün tamün dullifiel adelcalechi lof.*
30 Eimün feleaimün quiñe fütra anümca reque tonfülelu ñi tapül
ca quiñe adelcalechi lof reque nienolu co.
31 Ti nehuen-ngechi huentru ancülechi cachu reque feleai,
tañi cüdau, püteftripayai* cütral reque.
Quiñentrür leuleucüleai,*
inei no rume chongümlayayu”.