Judas ñi carta

1 Iñche ta Judas, Jesucristo ñi cüdaufe, Santiago ñi peñi. Huirintuculelfiñ feichi pu che Chau Ngünechen ñi dullieteu ca piuqueyeteu ca incaniengelu ñi quiñeucüleal Jesucristo engu:

2 Ngillatuquefiñ ta Chau Ngünechen tamün doi cutranpiuqueyeaeteu, tamün tüngduamelaeteu* ca piuqueyeaeteu.

3 Poyen pu peñi ca poyen pu lamngen, ellaca mu ayülefun tamün huirintuculeluhuafiel tati montuluhun dungu taiñ nieel iñchiñ. Huelu ca dungu duamtufiñ tamün huirintuculeluhuafiel. Llellipuhuayiñ: nehuentulemün tamün incanieafiel tamün feyentun ta Chau Dios mu. Feitachi feyentun quiñe rupa müten* elungei ta Chau Ngünechen ñi pu che.* 4 ¿Chumngelu* huirintuculeluhuiyiñ tüfa? Ngüneduamlaimün rume, eimün meu reyüconcülei* quiñeque huentru yamquenofilu engün* ta Chau Ngünechen. Tüfachi pu huentru huelucünuquei taiñ Chau Dios ñi fütra cutranpiuqueyechen, fei huesa femqueingün, yehuequelaingün rume.* Cafei famentuquefingün taiñ quiñen Ñidol Jesucristo ngencülelu iñchiñ meu. Fütra cuifi Chau Ngünechen ñi huirintucuel feipicünui tañi condenangeal femngechi che.

5 Eimün cüme quimnieimün, huelu cüpa feipihuiyiñ tamün loncontucual tüfachi nütram: Egipto mapu meu Chau Jehová* montulfi tañi pu che, huelu apümcafi feichi pu che feyentuhuenolu. 6 Cafei quiñeque cüme püllü elcünuingün ñi cüdau huenu meu cheu tañi müleafel, femngechi culpaingün.* Feimu Chau Dios fütra dumiñ mu trarintucuniefi engün rumel meu. Fei puule ti fütra antü condenangeai engün. 7 Ca femngechi, Sodoma, Gomorra ca tati püllelechi huaria mülechi pu che eluhuingün ñi pod cudumuhual* ca femürpuingün ñi huesa illutunieel. Tüfachi pu huaria apümcangei ñi mülehuetunoal,* femngechi condenangei engün. Tüfa pengelqueiñmu ñi cuñihun-ngen inanoal tüfachi dungu.

8 Huelu feichi pu huentru eimün meu mülelu re huesaque dungu raquiduamquei, ünufal dungu femquei engün, yamquelafi ñi pu ngünenieteu, fei dunguyequefi tati pu che Chau Dios tañi saquinieel. 9 Fei Miguel, ti loncolechi cüme püllü,* trafdunguhui Huecüfü engu Moisés ñi cuerpo mu,* huelu Miguel ramtucadungulafi huesa pin mu, doi mai “Jehová* ta ramtucadunguaimu” pifi. 10 Huelu feiti pu huentru rüf adümquelafi Ngünechen ñi dungu, feimu dunguyequefi engün. Culliñ reque felei engün, raquiduamquelai. Cafei com tañi femqueel mu inayentuñmaquefi ñi chumngen pu culliñ, femngechi mai doi huesañmauquei engün.

11 ¡Aungei tüfa engün! Caín ñi femün inaniefi, cafei eluhuingün ñi inayal Balaam ñi huelulcahun ayünielu cai tañi cullitungeal engün. Caiñetudunguquei engün Coré reque, feimu ca femngechi apümcangeai engün. 12 Tüfachi pu huentru reyüconcülei* eimün meu misahun mu.* Femngechi felei engün: miñche co ellcalechi cura, yehuequenochi camañ quisu müten duamuuquelu ñi iyal, tromü hulquenolu mahun ñi pimuyahuleteu ti cürüf, anümca hulquenolu fün tañi medin antü mu, rume ancülelu* ca ngedunentungelu.* 13 Cafei tüfachi pu huentru illculechi reu* lafquen reque felei, entuquei ñi ünufal dungu engün tañi yehuelcayafeteu. Cafei ñamquiyauchi huangülen reque felei, elcünungei ñi rumel müleal ti doi fütra dumiñ meu.

14 Enoc, ti regle tuhun-ngelu Adán meu ca feipicünui tüfachi pu huentru meu. Feipi: “Chau Jehová* cüpalei ca compañnieyu fentren huaranca tañi pu cümeque püllü. 15 Ramtucadungupafi com tati pu che ca huldungupai tañi huesa femün com tati pu culpafe* yamquenofilu ta Chau Dios. Tüfa engün fill huesaque dungu femquei ca huesa dunguyequefi ta Chau Dios, feimu ramtucadungungeai engün”.

16 Tüfachi pu huentru fillpiyauquei ñi huesa duamcülen tañi mongen meu ca inaniequeingün ñi huesa illutuqueel müten. Mallma dungu tripaquei tañi hun mu, ca quisu ñi cümelcahual müten saquiquefi engün ta caquelu che.

17 Huelu eimün, poyen pu peñi ca pu lamngen, tuculpamün* ñi feipicünuel taiñ Ñidol Jesucristo ñi pu apostol.* 18 Quisu engün feipiquefeimünmeu: “Afaelchi antü mu, quiñeque che ayentuafi tati cümeque dungu ca inayai engün ñi huesa illutun müten”. 19 Tüfachi pu huentru püntülcaquefi* ta che, cafei culliñ reque femquei engün ca llouquelaingün Chau Ngünechen ñi nehuen. 20 Huelu eimün, poyen pu peñi ca pu lamngen, yafüluucülemün tamün cüme feyentulen ta Chau Dios mu, cafei Chau Dios ñi nehuen adcünupe tamün llellipun. 21 Femngechi cümeque femün inanieaimün, fei Chau Ngünechen piuqueyeaimünmeu, petu maneluucülelu eimün taiñ Ñidol Jesús ñi cutranpiuqueyechen meu, fei tamün llohual rumel mongen. 22 Cafei, cutranpiuqueyenieafimün tati pu nehuencülenolu tañi feyentun, 23 montulfimün tañi apümcangenoal engün.* Cafei cutranpiuqueyenieafimün ta caquelu che. Huelu cuñiutuucülemün tamün podümnoaeteu fei engün tañi culpan.* Üdeñmayafimün ñi culpan engün.*

24 Chau Ngünechen quelluafeimünmeu tamün culpanoal.* Ca femcünuafeimünmeu tamün lif chengeal ca tamün ayüucüleal quisu tañi afmatufal adquiñ meu. 25 Taiñ quiñen Ngünechen montuleiñmeu taiñ Ñidol Jesucristo ñi duam mu. Taiñ Fütra Chau Ngünechen ngünenielu itrocom dungu, afquentu felequei tañi llohual püramyen ca pepiluhun. Femngechi felepe fachantü ca rumel meu. Felepe mai.