Isaías
41 “Ahuem, pu che huapi mu mülelu, ñücüfcülen allcütumuchi.
Pu troquiñche huiño nehuencontupe engün.
Fülconpape,* fei dungupe engün.
Eimün, pu che, fülconpamün iñche mu cheu ñi müleal juician dungu.
2 ¿Inei am cüpalfi quiñe huentru tripahue antü püle?
¿Inei am mütrümfi* tañi cüdahuelaeteu ca ñi femal nor dungu?
¿Inei am eluquefi fillque troquiñche
ca eluquefi ñi ngünenieafiel fillque lonco ülmen?
¿Inei am tañi fütra cuchillo meu trufürcünuquefi engün?
¿Inei am tañi arcu meu fill püle puhulquefi engün ancülechi pinu reque?*
3 Quisu inantucuniefi engün, amulecai müten, chem no rume catrütuquelaeyu.
Trecalei rüpü mu turpu tañi pünonofiel.
4 ¿Inei am femi tüfachi dungu?
¿Inei am ellaca mu müten mütrümmequefi tati pu che?
Iñche, Chau Jehová, ellaca mu müten Chau Dios ngen,
ca rumel mu femngechingerpuan”.
5 Pu che mülelu huapi mu pefingün, fei llicaingün.
Tati pu che mülelu cheu ñi afpun ti mapu müllmülli engün.
Trahuluhuingün ca amuleingün.
6 Caque quiñeque engün quelluquefi tañi compañ
ca feipiquefi tañi peñi: “Nehuencülenge anai”.
7 Tati artesano yafültucuquefi tati cüdauquelu pañillhue mu.*
Ca femngechi tati lafcünuquefilu pañillhue martillo mu,
yafültucuquefi tati cüpafquefilu martillo ti yunque mu.
Quisu feipiquei tati soldadura mu: “Cümelcalei”.
Fei clafantucungequei ti adentun* ñi trananagnoal.
8 “Huelu eimi, Israel, iñche tañi cüdaufe.
Eimi, Jacob, iñche dullicünueyu,
eimi ta Abrahán tañi cüpanche, iñche tañi hueni tati.
9 Cüpaltueyu cheu ñi afpun ti mapu.
Mütrümeyu doi alü camapulechi mapu meu.
Feipieyu: ‘Eimi iñche tañi cüdaufe,
dullicünueyu, famentulaeyu.*
10 Iñche afcadinieyu, feimu llicaquilnge.
Iñche tami Chau Dios, feimu fill raquiduamcülequilnge.
Iñche nehuentucuayu. Mai, iñche quelluayu.
Nünieayu tañi man cuhu mu’.*
11 ¡Ngüneduamnge! Com tami illcutunieteu* yehuelcangeaingün ca illamcangeaingün.
Com tami quehuamequeteu apümcangeaingün, mülehuelayaingün.
12 Quintuafimi tami quehuamequeteu, huelu pelayafimi.
Pu huentru tami hueichamequeteu* mülehuelayaingün, ngenolu reque troquingeaingün.
13 Iñche tami Chau Dios Jehová, nünieñmaeyu tami man cuhu.
Iñche feipiqueyu: ‘Llicaquilnge. Iñche quelluayu’.
14 Jacob, pichi piru,* llicaquilnge.
Ahuem, pu Israel che, iñche quelluhuaiñ” feipi Chau Jehová, Israel ñi Lifngechi Ngünechen, tami ngillanentueteu.
15 “¡Tüfei! Rastracünueyu,*
quiñe yungechi hue rastra ñi liftuquetranal.
Pünocayafimi fütraque mahuida, teifücayafimi
ca trufürcünuafimi pu huincul.
16 Ütrüfpüramafimi,
fei ti cürüf cañpüle yeafi.
Fütra cürüf fill püle puhulafi.
Ayüucüleaimi Chau Jehová ñi duam mu,
mallmaucülen mu dunguaimi Israel ñi Lifngechi Ngünechen mu”.
17 “Pu fillalelu ca pu pofre quintumequeingün co, huelu ngelai.
Tañi quehun ancülei fente tañi huihulen engün.
Iñche, Chau Jehová, huiñoldunguafiñ engün.*
Iñche, Israel ñi Chau Dios, elcünulayafiñ.
Femcünuafiñ ti huellilechi mapu ñi menocongerpual apolelu anümca mu,
ca ti ancülechi mapu ñi huitruncongerpual.
19 Ti huellin mapu mu* anümcünuafiñ cedro,
acacia, mirto ca pino.
Ti lafcülechi huellin mapu meu anümcünuafiñ enebro,
fresno ca cipres.
20 Femngechi com tati pu che peai, quimai,
ngüneduamai ca quimtucuai
Chau Jehová tañi cuhu mu femi tüfa,
Israel ñi Lifngechi Ngünechen deumafi”.
21 “Feipicünumün tamün dungu” feipi Chau Jehová.
“Cüme pengelcünufimün” feipi Jacob ñi Lonco Ülmen.
22 “Cüme quimfalcünufimün ti dungu ca feipimuaiñ chem ñi rupayal.
Dungumuaiñ rupachi dungu meu,
femngechi raquiduamtucunieafiyiñ ca quimtucuaiñ chumngechi ñi huechutripayal.
Cam feipimuaiñ chem dungu ñi cüpalen.
23 Feipimuaiñ chem ñi rupayal cüpalechi antü meu,
femngechi quimtucuaiñ tamün diosngen.
Mai, chem rume femafuimün, cüme dungu cam huesa dungu,
fei afmatulehueaiñ taiñ pefiel mu.
24 ¡Tüfei! Eimün ngenolu reque feleimün,
tamün femün falilai.
Inei rume poyeelmünmeu,* illamcafalngeai.
25 Norte mu* femcünun ñi peufaluhual quiñe huentru, fei cüpaleai.
Feiti cüpalelu tripahue antü püle püramyeafi tañi üi.
Quisu pünocayafi pu ngünenielu fotra reque,*
chumngechi ti cüdauquelu rag mu* pünocaquefi narfülechi fotra.
26 ¿Inei am ellaca mu müten dungui tüfachi dungu taiñ quimtucuafiel?
Cam, ¿inei cuifi mu feipi tüfachi dungu, femngechi taiñ feipial ‘rüfngei ñi feipin’?
Felei llemai, ¡inei no rume feipilai!
¡Inei no rume huldungulai!
Rüfcünu, ¡chem pilaimün rume!”.
27 Iñche hunelu feipifiñ ta Sion: “Ngüneduamnge, fau müleingün tati!”.
Ca huercüafiñ ta Jerusalén quiñe huerquen cümeque dungu miyahul-lu.
28 Amulen ñi adquintumequen, huelu inei no rume ngelai,
fei engün meu inei no rume pepi ngülamtuquelai.
Fei feipimequefiñ tañi huiñoldungual engün.
29 ¡Ngüneduamnge! Com engün falilaingün.
Chem no rume femlayafuingün.
Tañi pañillhue adentun cüpal-layafuingün chem cüme dungu no rume.