Números

19 Chau Jehová huiño dungufi Moisés ca Aarón, feipifi engu: 2 “Tüfa tati ley dungu Chau Jehová ñi huercüel: ‘Feipiafimi pu Israel che ñi cüpalal quiñe quelü huaca tremolelu, encañngenolu* ca turpu tuculelngenolu yucu. 3 Mülei ñi elungeal tati sacerdote Eleazar, fei entuafi huecun cheu ñi mülenon che ca langümngeai quisu tañi adquiñ meu. 4 Fei ti sacerdote Eleazar ifontucuafi* tañi changüll cuhu pichin mollfüñ meu, regle rupa pütefcayafi* tati trahunhue tolto ruca* ñi conhue püle. 5 Quisu ñi adquiñ mu lüpümngeai ti huaca. Lüpümngeai ti trülque, ti ilo, ti mollfüñ ca tati me. 6 Ti sacerdote nüai cedro mamüll, hisopo anümca* ca quelü füu, fei ütrüftucuafi cütral mu cheu ñi lüpümmequengen ti huaca. 7 Fei ti sacerdote cüchayafi tañi tacun ca müñetuai co mu, fei hula huiño conafui cheu ñi toltoucülen* pu che. Huelu ti sacerdote lifcülelayai nagantüle hula.

8 Ti huentru lüpümfilu ti huaca, cüchayafi tañi tacun co meu ca müñetuai. Lifcülelayai nagantüle hula.

9 Quiñe lifcülechi huentru ñimituafi* tati huaca ñi trufquen. Fei tucuafi huecun cheu ñi mülenon che quiñe lif mülehue mu. Pu Israel che guardacünuafingün ñi pepicangeal ti co ñi liftuam.Ti huaca fei quiñe chalintucun* culpan dungu mu.* 10 Tati ñimitulu ti huaca ñi trufquen cüchayai ñi tacun, fei lifcülelayai nagantüle hula.

Tüfachi ley dungu elcünungei ñi amulerpual. Ti pu Israel che ca tati pu ca cüpanche mülelu fei engün meu mülei ñi inayafiel. 11 Inei rume nünütufile quiñe la,* lifcülelayai regle antü. 12 Puule ti cüla antü, mülei tañi liftuhual feitichi co meu, femngechi ti regle antü meu lifcületuai. Huelu liftuunole ti cüla antü meu, lifcületulayai puule ti regle antü. 13 Inei rume nünütufile quiñe la,* huelu liftuunole, podümafi Chau Jehová ñi ngillatuhue tolto ruca, feimu mülei tañi langümngeal Israel mu. Pütefcangerquelai ti co ñi liftuam, feimu amulerquei ñi lifcülenon.

14 Quiñe huentru lale quiñe tolto ruca mu, tüfachi ley dungu mülei ñi inangeal: chem che rume mülelu ponhuitu ti tolto ruca mu cam inei rume conle, lifcülelayai regle antü mu. 15 Cafei chem nülalechi metahue rume huente mu nienolu tapa,* lifcülelayai. 16 Inei rume mülelu lelfün mu nünütufile quiñe che langümngelu fütra cuchillo mu, quiñe la, quiñe che ñi foro cam cheu ñi rüngalcülen quiñe la, regle antü lifcülelayai. 17 Ñi liftungeal ti che lifcülenolu, entungeai pichin trufquen feitichi lüpümngeelchi chalintucun culpan dungu mu,* fei quiñe metahue mu tucungeai feitichi trufquen ca tuculelngeai co tripalu huitrunco mu. 18 Quiñe huentru lifcülelu pichin nüai hisopo anümca, ifontucuafi* ti co mu, fei pütefcayafi ti tolto ruca, tati fillque metahue ca com ti pu che ñi mülen üye mu. Cafei pütefcayafi ti che nünütufilu ti huentru langümngelu, ti foro, ti la cam cheu ñi rüngalcülen quiñe la. 19 Puule ti cüla antü ca ti regle antü, ti lifcülechi che pütefcayafi feitichi co mu tati lifcülenolu, fei ti regle antü meu lifcületuai tañi culpan mu.* Fei hula ti lifcülenolu cüchayafi tañi tacun co mu ca müñetuai, fei lifcülelayai nagantüle hula.

20 Ti lifcülenochi huentru liftuunolu, podümfi Chau Jehová ñi yamfal mülehue,* feimu mülei tañi langümngeal ti troquiñche mu. Pütefcangerquelai ti co ñi liftuam, feimu lifcülelai.

21 Tüfachi ley dungu elcünungei ñi amulerpual pu Israel che mu: feiti che pütefcafilu ti co ñi liftuam mülei ñi cüchayafiel tañi tacun ca ti che ñi nünütufiel ti co ñi liftuam, lifcülelayai nagantüle hula. 22 Ti lifcülenochi huentru chem rume nünütufile, lifcülelayai. Fei inei rume nünütufile feitichi chemcün,* lifcülelayai nagantüle hula’”.