Isaías
46 Ti dios Bel ca ti dios Nebo quiñe che reque pochongnagqueingu.*
Tañi pu adentun* yenieyu pu culliñ tañi furi mu, feitichi pu culliñ yequelu fanechi chemcün.*
Feitichi adentun itrofillem reque feleingün, rume fanei ürcülechi culliñ ñi furi mu.
2 Feitichi epu dios trür pochongnagingu,
pepi montulquelafingu chem ñi yenieel* pu culliñ.
Fei engu llemai presuyeniengeingu cañpüle.
3 “Allcütumuchi, ahuem, Jacob ñi pu cüpanche ca tati mülehuechi pu che Israel troquiñche mu.
Ellaca mu müten yeniehuiyiñ ca cuñiutucuniehuiyiñ chumngechi ñi femquefiel ti ñuque tañi pichiche.
4 Füchalmi rume, iñche femngechi felean müten.
Lingarcülele* tami lonco, quellunieayu.
Yenieayu, quelluayu ca montulayu, rumel femngechi femquen.
5 ¿Inei engu am trürümmuafun? Cam, ¿inei iñche reque felei piafuimün?
¿Inei am trürcülei iñche mu cam iñche quechilei* piafuimün?
6 Quiñeque che ngünamcaquei ti oro* ñi yenieel tañi carpa mu,
pesa mu fanefanetuquefingün tañi plata.
Quintuqueingün quiñe che cüdauquelu pañillhue mu,* fei deumaquei quiñe dios feitichi oro ca plata mu.
Fei pochongnagqueingün ca eluuqueingün ñi poyeafiel.
7 Meñcuyeniefingün
ca elcünuquefingün cheu tañi müleam.
Fei mu mülequei. Nengümuuquelai.
Llellipungequei, huelu huiñoldunguquelai.*
Pepi montulchequelai cutrancahun mu.
8 Loncontucunieafimün tüfa ca nehuen piuquecünuumün.
Eimün, pu culpafe,* piuquentucunieafimün.
9 Loncontuniefimün fütra cuifi rupachi dungu.*
Iñche ta Chau Dios, ngelai cangelu.
Iñche ta Chau Dios, inei no rume trürlai iñche mu.
10 Ellaca mu müten feipicünuquen ñi chum tripayal ti dungu.
Ca fütra cuifi mu feipicünun chem ñi petu rupanon.
Feipiquen: ‘Iñche ñi dulliel* felecayai müten.
Feman chem rume ñi ayünieel’.
11 Alü camapu mu, tripahue antü püle,
mütrümafiñ* quiñe üñüm* ilotuquelu,
tati huentru huechunentualu iñche tañi dulliel.*
Feipicünun, fei feman.
Femngechicünuan pin, fei huechunentuafiñ.
13 Püllelei ñi pengelal tañi nor dungu,
camapulelai.
Alüñmalayan ñi cüpalal montuluhun.
Montulafiñ ta Sion ca eluafiñ tañi afmatufalngeal ta Israel”.