Isaías
58 “¡Com tami nehuen mu huirarnge, ñücüfcülequilnge!
Cullcull reque huirarpüramnge.
Tañi pu che quimfalcünulelfinge ñi feyentunon engün,
Jacob ñi pu cüpanche quimfalcünulelfinge tañi culpan engün.*
2 Fill antü quintumequeneu engün,
cüpa quimiyiñ tami ayünieel piqueingün.
Quiñe troquiñche nor dungu femquelu
ca elcünunofilu tañi Chau Dios ñi ley troquiuqueingün.
Rume ayünielu ñi fülmanieafiel ta Chau Dios troquiuqueingün,
fei feipiqueneu engün tañi nor juzgayal:
3 ‘Ngüñüluhun mu iñchiñ, ¿chumngelu* puquintumuquelaiñ?
Illamcahun mu iñchiñ, ¿chumngelu ngüneduammuquelaiñ?’ piqueingün.
Feichi antü ngüñüluuqueimün, huelu quisutu duamuuqueimün müten
ca cutrancaquefimün tamün pu cüdaufe.
4 Ngüñüluhun mu* eimün, mülei quehuan ca yafcahun,
ahucan mu cupafcaqueimün cuhu mu.
Ngüñüluhulmün chumngechi tamün femmequen, ¿huenu mu puhuai ñi dungun pipeafuimün mai?
5 ¿Femngechi ayüquepen mai tamün ngüñüluhual?
¿Quiñe antü tamün illamcahual,
tamün pochongnagal* lonco quiñe rüme reque*
ca tamün cuduleal huente sacu ca trüfquen meu?
¿Femngechi ngüñüluhun dungu ayüquepei mai ta Chau Jehová?
6 Felelai. Doi mai tüfachi ngüñüluhun dungu ayüquen:
entufinge ti cadena cutrancachequelu,
entutrapelfinge ti yucu,
neicümcünufinge pu ahucangelu,
rangiñ mu huatrofinge* com yucu,
7 pu ngüñülelu misahuelfinge tami cofque,
tami ruca mu lloufinge pu pofre ca pu nienolu ruca,
tuculelfinge tacun tati pu nienolu
ca furintuculayafimi tami pu pariente.
8 Femülmi, tami pelon alofai hunün mu reque
ca müchai müten tremotuaimi.*
Tami nor dungu huneleai eimi mu
ca Chau Jehová ñi pelon cuñiutucuaimu furi püle.
9 Fei hula mütrümaimi,* Chau Jehová huiñoldunguai.*
Huiraraimi tami quellungeal, fei feipiai: ‘¡Tüfa mu mülen!’.
Entufinge ti yucu,
huitraniequefilnge* tami changüll cuhu, malisiadunguquilnge.
10 Chem ayüqueimi tami nieal elufinge pu ngüñülelu
ca tuduamelfinge pu cutrancaucülelu chem rume tañi duamnieel engün.
Femülmi, dumiñ mu rume alofai tami pelon,
ca tami dumiñ rangiantü reque feleai.
11 Chau Jehová rumel adnieaimu
ca tuduamelaimu ancülechi mapu mu rume.
Nehuentucuaimu,
fei quiñe adelcalechi lof reque feleaimi cüme hutrucolelu,*
quiñe huitrunco reque turpu ancüquenolu.
12 Eimi tami duam mu huiño deumangetuai ti cuifi mu teifücalelu,
ca cüme elcünutuafimi cheu ñi anülemum pu huaria cuifique che ñi antü meu.
Femngechi feipingeaimi: ti che cüme elcünutuquefilu teifücalechi cura malal*
ca cümecünutuquefilu ti rüpü ñi müleal pu che tañi inafül püle.
13 Yamniefinge* ti ürcütun antü,* fei ngüneunge tami quisutu duamuunoal tañi yamfal antü mu.
Ayühun dungu troquifinge ti ürcütun antü, Chau Jehová ñi yamfal antü, tami rume falintuafiel.
Ca yamniefinge, huelu quisu duamuuquilnge ca ngünam dungu feipiquilnge.
14 Femülmi, Chau Jehová ñi duam mu rume ayüucüleaimi.
Fei eluayu tami ngünenieafiel huincul.
Ca eluayu tami iyal* chem ñi hulqueel Jacob ñi mapu, tami cuifi tuhunche,
Chau Jehová feipicünulu am”.