Isaías
9 Huelu dumiñcülelayai cuifi reque mülelu cutrancahun ti mapu mu ca illamcangelu Zabulón ñi mapu ca Neftalí ñi mapu. Fei hula quisu* femcünuai ñi püramyengeal feitichi mapu, tüfa tati rüpü amulelu ina lafquen, Jordán mapu ca Galilea cheu ñi mülen ca cüpanche.
2 Tati pu che ñi miyauquefel dumiñ meu
pei quiñe fütra pelon.
Tati pu che mülelu mapu mu rume dumiñmalefui,
huelu alofi quiñe pelon fei engün meu.
3 Femcünuimi ñi alün-ngeal ti troquiñche,
femcünuimi ñi rume ayüucüleal engün.
Rume ayüuqueingün tami adquiñ mu
chumngechi ñi ayüuquen pu che cosecha meu
ca chumngechi ñi ayüuquen pu hudamfilu falinque fillem tañi nüfiel hueichan mu.*
4 Trafolcafimi ti yucu ñi yenieel engün,
ti fara mülelu tañi furi mu ca ti retrü ñi nieel pu loncolelu cüdau mu.
Femngechi ca femürqueimi feichi antü hueungelu ta Madián.
5 Pu soltau petu trecayaulu tañi bota mu nengümcaquefingün ti mapu,
tañi tacun mollfüñmalei.
Fei com tüfa, mamüll reque üyümafi ti cütral.
6 Quiñe pichi huentru choyüngei iñchiñngealu,
Chau Dios elueiñmu quiñe fotüm.
Quisu nieai autoridad tañi ngünenieal.
Üitungeai Rume Cüme Ngülamtufe, Nehuen-ngechi Dios, Rumel Chaungelu, Principe Hulquelu Tüngün.*
7 David tañi ülmen huancu ca tañi ngünenien mu,
aflayai ti tüngün,
ca tañi ngünenieel com püle puhuai.
Femngechi cüme anücünungeai
ca amuleai nor dungu mu,
fantepu ca rumel mu.
Chau Jehová, tati Ñidolcülelu pu hueichafe mu, rüf femai tüfa.
8 Chau Jehová feipifi ta Jacob ñi cutrancangeal,
tañi feipin huechutripayai Israel meu.
9 Com pu che quimai tüfachi dungu,
Efraín ca tati pu Samaria che.
Checahun mu ca yamquenon mu* feipiqueingün:
10 “Trananagi ladrillo,
huelu huiño deumatuaiñ cura mu.
Catrüngei sicomoro anümca,
huelu anümcayaiñ cedro”.
11 Chau Jehová cüpalafi Rezín ñi pu caiñe ñi hueichayafiel Israel,
femcünuai tati pu caiñe ñi lefcontuaeteu.
12 Siria cüpayai tripahue antü püle ca pu Filistea che conhue antü püle.*
Nülayafingün tañi hun, fei lümüafingün ta Israel.
Rupan mu com tüfa, tünglai tañi illcun,*
doi mai fampuhulniefi ñi cuhu tañi cutrancacheal.
13 Ti pu che huiñotulai tañi cutrancamequeteu mu,
quintulafingün ta Chau Jehová Ñidolcülelu pu hueichafe mu.
14 Quiñe antü mu müten Chau Jehová catrüñmayafi ta Israel
15 Ti lonco fei tati pu yamfalchi loncolelu,
ca ti cülen fei tati pu huerquen coilaque dungu quimeltuquelu.
16 Pu adniefilu tati pu che femcünuqueingün ñi ñamquiyahual
ca tati pu adniengelu hueluraquiduamelngequeingün.
17 Feimu Chau Jehová ayüucülelayai fei engün ñi pu huechequeche meu
ca cutranpiuqueyelayafi tañi pu cuñifall* ca pu lantu domo.
Com engün huesa chengeingün, chaftuniefingün ta Chau Dios
ca fill huesa pimequeingün.
Rupan mu com tüfa, tünglai tañi illcun,
doi mai fampuhulniefi ñi cuhu tañi cutrancacheal.
18 Huesaque femün cütral reque leuleucülei,*
lüpümmequefi troltro ca huesa cachu.
Üyümafi mahuidantu
ca fitrupürayai* tromü reque.
19 Ñi illculen mu Chau Jehová Ñidolcülelu pu hueichafe mu
üyümfi cütral tüfachi mapu mu.
Fei tati pu che mamüll reque feleai ñi üyümafiel ti cütral.
Inei no rume cutranpiuqueyechelayai, quisu tañi peñi no rume cutranpiuqueyelayafi.
20 Quiñe catrünentuafi ilo man püle,
huelu ngüñülehueai.
Cangelu ilotuafi huele püle,
huelu huedalayai.
Caque quiñeque engu ilotuafi quisu ñi lipang.
21 Manasés lümüafi ta Efraín,
ca Efraín lümüafi ta Manasés.
Mür chaftuafingu ta Judá.
Rupan mu com tüfa, tünglai tañi illcun,
doi mai fampuhulniefi ñi cuhu tañi cutrancacheal.