Isaías
65 “Eluhun ñi quintuaeteu tañi pu ramtuquenoeteu.
Eluhun ñi peaeteu tañi pu quintuquenoeteu.
Quiñe troquiñche ñi püramyeñmanoeteu tañi üi feipifiñ: ‘¡Tüfa mu mülen! ¡Tüfa mu mülen!’.
2 Com antü ünifpüramnien ñi cuhu ñi llohuafiel quiñe troquiñche trencül piuquengelu,*
tati pu miyaulu huesa rüpü mu,
inanieingün quisuque ñi raquiduam.
3 Feichi troquiñche illculcaniequeneu,* yehuequelai rume.
Adelcalechi lelfün mu hulqueingün chalintucun* ca huente ladrillo mu hulqueingün fitrun* chalintucun.
5 Feipiqueingün: ‘Mülecange cheu tami mülen. Fülcontupaquenoeli.*
Iñche doi lif chengen eimi mu’ piqueingün.
Tañi yu mu fitrun reque feleingün, cütral reque com antü üicülelu.
6 Tañi adquiñ mu huirintuculei,
tüngcülelayan,*
huiñoleltuafiñ ñi femün,
com huiñoleltuafiñ ñi femün
7 fei engün ñi culpan mu* ca tañi cuifique che ñi culpan mu” pi Chau Jehová.
“Hulingün fitrun chalintucun mahuida mu,
ca illculcaeneu engün huincul mu,
feimu hunelu meu com eluafiñ ti cullitu ñi llohuafel engün”.
8 Tüfa ñi feipin Chau Jehová:
“Quiñe che pefile ofad ñi entual hue pulcu,
feipiquei: ‘Huesalcalayafimi, petu serfilei tati’.
Ca femngechi femafiñ tañi pu cüdaufe,
com apümcalayafiñ engün.
9 Elcünuan Jacob mu ñi tripayal cüpanche,
ca femcünuan Judá ñi ngen-ngeal tañi mahuida mu.
Tañi pu dullinche ngen-ngeaingün feitichi mapu mu,
ca tañi pu cüdaufe müleaingün tiye mu.
10 Sarón mu müleai fentren cachu ñi ütayal pu ufisa,
ca Acor laf mapu meu* ürcütuai ñi pu huaca
tañi pu che ñi quintumequeteu.
Pepicalelquefimün ti mesa tati dios hulquelu cüme suerte.
Ca apolelquefimün ti copa pulcu mu tati dios feipicünuquelu chem ñi rupayal.
12 Feimu elcünuan tamün langümngeal fütra cuchillo mu.
Com eimün pochongnagaimün* tamün langümngeal.
Mütrümlu* iñche, eimün huiñoldungumulan.*
Dungulu iñche, eimün allcütumulan.
Femmequeimün chem tañi huesa troquifiel,
dullimün chem tañi ayünofiel”.
13 Feimu llemai, tüfa ñi feipin tati Doi Fütra Ñidol Jehová:
“¡Tüfei! Iñche tañi pu cüdaufe iyaingün, huelu eimün ngüñüleaimün.
¡Tüfei! Iñche tañi pu cüdaufe pütocoaingün, huelu eimün huihuleaimün.
¡Tüfei! Iñche tañi pu cüdaufe ayüucüleaingün, huelu eimün yehuen dungu mu rupayaimün.
14 ¡Tüfei! Iñche tañi pu cüdaufe fente ñi cüme duamcülen ñi piuque ayühun mu huiraraingün,
huelu eimün fente tamün cutrantupiuquelen huiraraimün,
ca ngümayaimün fente tamün hueñancülen.
15 Eimün huesa üi elcünuaimün, fei tañi pu dullinche malisian dungu reque püneafingün.
Tati Fütra Ñidol Jehová com langümaimünmeu,
ca üi mu mütrümafi tañi pu cüdaufe.
16 Femngechi inei rume mapu meu ayülele ñi cümelcangeal,
tati manelfalchi Chau Dios cümelcayayu.
Inei rume mapu mu eldungucünule,
femai tati manelfalchi Chau Dios ñi duam mu.
Tati cuifique hueñancün dungu ngoimanentungeai,*
ellcaleai tañi adquiñ meu.
17 ¡Tüfei! Hue huenu ca hue mapu deumayan.*
Ñi rupan cuifi mu raquiduamtucungehuelayai,
piuquentucungehuelayai rume.
18 Feimu tañi deumayal mu rumel ayüucülemün ca pürapapiuquelemün.
Deumayafiñ Jerusalén, feimu rume ayüucüleaimün.
Iñche ñi femquefiel quisu tañi pu che pürapapiuquelaimünmeu.
19 Ayühuan Jerusalén mu ca pürapapiuquelean tañi pu che meu.
Allcün-ngelayai üye mu ngümacahun ca huirarün hueñancün mu.
20 Üye mu mülelayai pichiche mongelealu quiñeque antü müten.
Pu füchaqueche lalayai petu ñi huechurpunon com tañi mongen.
Inei rume lale 100 tripantu mu, hueche troquingeai.
Ti culpafe* malisiangeai 100 tripantu niele rume.*
21 Deumarucayaingün, fei mülenagaingün.
Anümaingün ofad, fei iñmuaingün ñi fün.
22 Deumarucalayaingün ca che ñi müleam,
anümlayaingün ca che ñi iñmual.
Tunte ñi mongelen quiñe fütra anümca ca femngechi mongeleai tañi pu che,
ca tañi pu dullinche ayühuaingün tañi femelchi cüdau mu.
Fei engün ca tañi pu cüpanche
coneltuleingün ti troquiñche mu Chau Jehová ñi cümelcafiel.
24 Petu tañi mütrümnon engün, iñche huiñoldunguafiñ.
Petu tañi dungumequen engün, iñche allcütuafiñ.
25 Ti auca trehua* ca ti pichi ufisa quiñentrür iyaingu.
Tati trapial pinutuai toro reque.
Ti filu trufür iyai.
Iñche tañi lif huincul meu huesalcalayaingün ca apümcalayaingün chem no rume” feipi Chau Jehová.