Isaías
52 ¡Trepenge!* ¡Trepenge! Ahuem, Sion, yafüluunge.
Tucunge tami adelcalechi tacun, ahuem, Jerusalén, tati yamfal huaria.*
Conhuelayai eimi mu tati pu circuncidalenolu* ca ti pu lifngenolu.
2 Ahuem, Jerusalén, huitrapürange trufür mapu mu, mütrounge, fei anücünuunge.
Ahuem, Sion ñi presulechi püñeñ, ti cadena entutrapelfinge tami pel mu.
3 Tüfa ñi feipin Chau Jehová:
“Cullinon mu fendengeimün
ca cullinon mu ngillanentungeaimün”.
4 Tüfa ñi feipin tati Doi Fütra Ñidol Jehová:
“Hunelu mu tañi pu che amui Egipto mu, ca cüpanchengefuingün üyeu.
Fei hula Asiria ngünam cutrancaeyu engün”.
5 “Tüfachi dungu mu, ¿chem femafun?” pi Chau Jehová.
“Ngünam yeñmangetun tañi pu che.
Tañi pu ngünenieteu engün huirarmequei ñi huehun mu” pi Chau Jehová.
“Fill antü ngüneduamquen turpu ñi yamniengequenon tañi üi.
6 Feimu llemai, tañi pu che quimai tañi üi.
Feimu llemai, feichi antü quimaingün iñche ñi dungumequen.
¡Felei, iñche tati!”.
7 Rume adi ñi namun tati yeniequelu cümeque dungu huincul mu.
Huldungumequei tüngün.*
Huldungumequei cümeque dungu.
Huldungumequei montuluhun.
Feipimequefi ta Sion: “¡Tami Chau Dios Lonco Ülmencülerpui!”.
8 ¡Allcütunge! Tami pu soltau cuidaquelu huirarpürammequei ñi dungun.
Quiñentrür huirarmequeingün ayühun mu.
Fei engün fente cüme peafingün Chau Jehová cüme elcünutufile ta Sion.
9 Chem ñi teifücalen Jerusalén mu ayüupe ca com quiñentrür huirarpe ayühun mu.
Chau Jehová yafültucufi tañi pu che ca ngillanentufi ta Jerusalén.
10 Com pu troquiñche ñi adquiñ mu Chau Jehová pengeli ñi yamfal lipang.
Pu che com mapu mu peaingün Chau Dios ñi montulfiel tañi pu che.
11 Ahuem, eimün pu yenielu tati fillque chemcün* Chau Jehová ñi ruca mu,
¡püntütripamün,* püntütripamün, tripamün tiye mu! ¡Nünütuquefilmün tati lifcülenolu!
¡Tripamün üye mu, lifcülemün!
12 Rume llicanquechi amutulayaimün,
lefmaucülen tripalayaimün.
Chau Jehová huneleai eimün meu,
Israel ñi Chau Dios tamün furi püle cuñiutucuaimünmeu.
13 Tañi cüdaufe quimün mu miyahuai.
Elungeai falin cüdau,
püramyengeai ca rume saquingeai.
14 Tañi ange doi chuchicalehuei caquelu pu huentru mu,
ca tañi cüme ad doi cangechicünungei chem che mu rume.
Feimu fentren pu che afmatueyu.
15 Fei ca femngechi afmatulafi fentren troquiñche.
Quisu tañi adquiñ mu pu lonco ülmen ñücüfcülehueaingün.*
Peaingün chem tañi feipingenoel
ca raquiduamaingün chem tañi allcütunoel.