Números

25 Pu Israel che mülelu Sitim mu, eluhuingün ñi conal pod cudumuhun mu pu Moab domo engün. 2 Pu domo mangelfingün tati pu che ñi eluafiel chalintucun* tañi pu dios. Fei pu che eluhuingün ñi iyal ca ñi pochongnagal* tañi pu dios ñi adquiñ mu. 3 Fei pu Israel che eluhuingün ñi poyeafiel Baal Peor mu. Fei Chau Jehová illcutufi* pu Israel che. 4 Chau Jehová feipifi ta Moisés: “Nüfinge com pu loncolelu tüfachi pu che mu ca pültrücünufinge engün Chau Jehová ñi adquiñ mu com ti pu che tañi peaeteu.* Femngechi Chau Jehová illcutuhuelayafi* pu Israel che”. 5 Fei Moisés feipifi pu juez Israel mu: “Caque quiñeque eimün mülei tamün langümafiel com feitichi pu huentru eluulu ñi poyeafiel Baal Peor mu”.

6 Feimeu müten cüpai quiñe Israel huentru quiñe Madián domo engu, yenierquefi cheu ñi mülen tañi pu peñi. Moisés ca com pu Israel che penierqueyu. Pu Israel che petu ngümamequerqueingün itrotripa ti trahunhue tolto ruca mu.* 7 Finehás, Eleazar ñi fotüm, ti sacerdote Aarón ñi lacu, pefilu tüfa, matu müten huitrapürai, fei nüfi quiñe huaiqui.* 8 Inaye conpui ti tolto ruca mu. Fei tañi huaiqui mu chüngartucufi ti Israel huentru ca ti domo tañi huillihue püle. Feica müten cutrancangehuelai pu Israel che. 9 Tüfachi cutrancahun meu 24.000 che laingün.

10 Fei Chau Jehová feipifi ta Moisés: 11 “Illcutuhuelafiñ* pu Israel che Finehás ñi duam mu, Eleazar ñi fotüm, ti sacerdote Aarón ñi lacu. Iñche müten poyemuchi piquefiñ pu Israel che. Huelu apümcalafiñ engün, Finehás elunofilu cai tati pu che ñi poyeafiel caquelu dios, iñche müten. 12 Fei feipifinge iñche eldungucünuafiñ, femngechi pengelan tañi fürenefiel. 13 Tüfachi eldungu mu quisu ca tañi pu cüpanche sacerdotengeaingün fentreñma mu. Quisu eluulai ñi poyengeal cangelu dios, quisu tañi Dios müten. Ca femcünui ñi perdonañmangeal pu Israel che ñi culpan”.*

14 Ti Israel huentru langümngelu ti Madián domo engu, Zimrí pingei, Salu ñi fotüm, tüfa loncolei pu Simeón che ñi pu familia meu. 15 Ti Madián domo ñi langümngeel, Cozbí pingei, Zur ñi ñahue, tüfa loncolei quiñe troquiñche Madián mu.

16 Fei hula Chau Jehová feipifi ta Moisés: 17 “Hueichayafimün* pu Madián che ca apümcayafimün. 18 Cüpaleleimünmeu cutrancahun, tañi ñihua chengen mu engün ngüchaltucueimünmeu tamün culpayal* feichi dungu nüucülelu Peor mu. Famtucueimünmeu culpan mu Cozbí ñi duam meu, tañi chau loncolei Madián mu. Feichi domo langümngei ti antü tamün cutrancangen feichi dungu nüucülelu Peor mu”.