1 Crónicas
21 Fei Satanás* eluhui ñi caiñetuafiel pu Israel che ca ngüchaltucufi ta David tañi raquiafiel pu Israel che. 2 Feimu David feipifi ta Joab ca pu loncolelu ti pu che mu: “Amumün, raquiafimün pu Israel che mülelu Beer-Seba puulu ta Dan mu. Fei hula feipimuan tañi quimal tunten* che mülei”. 3 Huelu Joab feipieyu: “¡Chau Jehová fempe ñi 100 rupa alün-ngerpual tañi pu che! Tañi ñidol, lonco ülmen, com engün deu cüdahuelqueimu, ¿felei no am ñidol? ¿Chumal ayünieimi femngechi femal? ¿Chumngelu* culpaconafui pu Israel che eimi tami duam mu?”.
4 Huelu tati lonco ülmen pilai ñi allcütuafiel ta Joab. Fei Joab huall püle amui Israel mapu mu ca huiñotui Jerusalén meu. 5 Fei hula Joab feipifi ta David tunten che ñi raquiel. Com Israel mu mülefuingün 1 millon 100 mil huentru yenielu fütra cuchillo ca Judá niefui 470 mil huentru yenielu fütra cuchillo. 6 Huelu Joab rume huesa troquifi ñi femün ti lonco ülmen, feimu raquingelai Leví ca Benjamín troquiñche.
7 Tüfa rume huesa duamelfi Chau Ngünechen, feimu castigafi ta Israel. 8 David feipifi ta Chau Ngünechen: “Femün mu tüfa rume culpan.* Feula, füreneen, perdonayafimi tami cüdaufe ñi culpan. Quiñe huedhued reque femün”. 9 Fei hula Chau Jehová nütramcafi ta Gad. Tüfachi huentru cüdahuelquefi ta David ca pequefui afmatun dungu. Fei feipingei: 10 “Amunge, feipiafimi ta David: ‘Tüfa ñi feipin Chau Jehová: “Tüfachi cüla dungu mu iñche femayu quiñe, ¿chuchi doi ayüfimi?”’”. 11 Feimu Gad pemefi ta David ca feipifi: “Tüfa ñi feipin Chau Jehová: ‘Dullinge: 12 cüla tripantu ñi müleal filla. Cüla cüyen tami huehuaeteu tami pu caiñe ca tami hueichayaeteu* fütra cuchillo mu. Cam cüla antü tami cutrancayaeteu ca tami castigayaeteu Chau Jehová fütra cuchillo mu. Müleai huesa cutran mapu mu ca Chau Jehová ñi cüme püllü langümafi fentren che Israel mapu mu’. Feula raquiduamnge ca feipien chem dungu feipiafiñ tañi huercüeteu”. 13 David feipifi ta Gad: “Tüfa rume hueñancüleneu. Huelu füreneen, elulayafimi* tañi castigayaeteu pu che, Chau Jehová mai ta castigayaeneu. Fei rume cutranpiuqueyechequei”.
14 Feimu Chau Jehová huercülelfi quiñe huesa cutran pu Israel che. Lai 70 mil Israel che. 15 Cafei Chau Ngünechen huercüi quiñe cüme püllü ñi apümcayafiel Jerusalén. Huelu Chau Jehová pefilu müten ti cüme püllü apümcamequefilu ti huaria, rume huesa duami* feichi huesa dungu mu. Fei feipifi ti cüme püllü apümcamequelu: “¡Fentecünunge! Nacümnge* tami cuhu”. Chau Jehová ñi cüme püllü püllelefui cheu pünongequei quetran, tüfa mülefui Ornán ñi mapu mu, tüfa ti jebuseo che.
16 David püraquintulu, huenu püle pefi Chau Jehová ñi cüme püllü. Nüniei ti fütra cuchillo ca fampuhulniefi ta Jerusalén huaria. David ca tati pu loncolelu sacu tacun tucuniefui, huelu feica müten pochongnagingün,* fei mapu mu puhuli tañi ange engün. 17 David feipifi ta Chau Ngünechen: “Iñche feipin nga ñi raquingeal pu che, ¿felei no am? Iñche ta culpan,* iñche ta huesa femün. Huelu, ¿chumingün tüfachi pu che?* Ahuem, tañi Chau Ngünechen Jehová, füreneen, eimi castigayaen iñche ca tañi chau ñi familia, huelu cüpal-layafimi tüfachi huesa dungu tami pu che”.
18 Feimu Chau Jehová ñi cüme püllü nütramcafi ta Gad. Feipingei ñi feipiafiel ta David ñi amual ca ñi deumalelafiel quiñe altar ta Chau Jehová. Mülefui ñi deumayal ti altar cheu pünongequei quetran, tüfa mülefui Ornán ñi mapu mu, tüfa ti jebuseo che. 19 Fei David amui, chumngechi tañi feipieteu Gad. Tüfachi huentru dungui Chau Jehová ñi üi mu. 20 Fei hula Ornán huiñoquintui ca pefi ti cüme püllü. Ca tañi 4 fotüm tañi compañeteu ellcahuingün.* Ornán pünocachillamequefui. 21 David amulu cheu ñi mülen Ornán, Ornán adquintui. Fei pefilu, feica müten tripai cheu ñi pünongequen quetran ca pochongnagi David ñi adquiñ mu, fei mapu meu puhuli tañi ange. 22 Fei hula David feipifi ta Ornán: “Fendelelen* ti mapu cheu pünoqueimi quetran. Fei mu deumalelafiñ quiñe altar ta Chau Jehová. Tunte ñi falin ti mapu fendelelen, femngechi cutrancahuelayai pu che”. 23 Huelu Ornán feipifi ta David: “Eimingepe. Tañi ñidol, lonco ülmen, femaimi chem rume tami ayünieel.* Eluayu mansun tami lüpümal chalintucun,* eluayu trafla* tami cütraltual ca ti cachilla tami hulal fün chalintucun. Com eluayu”.
24 Huelu ti lonco ülmen David feipifi ta Ornán: “Lloulayan, iñche culliayu tunte falin tami mapu. Iñche ngen-ngelayan tami nieel tañi eluafiel ta Chau Jehová, cafei hul-layan lüpümngeelchi chalintucun, fei ñi cullinon”. 25 Feimu David cullifi ta Ornán 7 kilo* oro* ti mapu mu. 26 Tiye mu David deumalelfi quiñe altar ta Chau Jehová. Elufi lüpümngeelchi chalintucun ca chalintucun quiñentrür ingequelu. Cafei llellipufi Chau Jehová, fei Chau Dios huenu mu huercüi cütral huente ti altar mu, cheu ñi mülen lüpümngeelchi chalintucun. 27 Fei Chau Jehová huercüfi ti cüme püllü ñi huiño tucual tañi fütra cuchillo cheu tañi yeniequen. 28 David ngüneduami Chau Jehová tañi allcütueteu cheu pünongequei quetran, tüfa mülefui Ornán ñi mapu mu, tüfa ti jebuseo che. Fei David amulei ñi hulün chalintucun tiye mu. 29 Feichi antü mu ti yamfal mülehue* mülelu Gabaón mu mülerquei Chau Jehová ñi ngillatuhue tolto ruca* deumalu Moisés huellin mapu mu,* ca mülerquei ti altar cheu ñi lüpümngequen chalintucun. 30 Huelu David rume llicalefui pefilu ti fütra cuchillo ñi nieel Chau Jehová ñi cüme püllü, feimu pepi amulafui tiye mu tañi ngillatuafiel ta Chau Ngünechen.