Isaías
5 Ülcantulelafiñ tañi poyen,
ti ül nütramcai tañi poyen mu ca ñi ofadentu.
Tañi poyen nierquei ñi ofadentu quiñe cüme lil mapu meu.
2 Rüngafi ti mapu ca entuñmafi com ti cura.
Anümfi quiñe doi cüme anümca ofad,
deumai quiñe alüpürachi ruca rangi ti ofadentu meu,
fei cura mu deumai cheu ñi cütrüngeam ofad.
Fei üngümcülerquefui* ñi huefpayal cümeque ofad,
huelu re huesaque ofad huli.
3 Feimu feipi: “Eimün pu mülelu Jerusalén mu ca pu huentru Judá mu,
juzgayaimün ñi rupan iñche ca tañi ofadentu.
4 ¿Ca chem chumafun ñi cümelcaleal ñi ofadentu?
Deu com femün.
Maneluucülefun ñi hulal cümeque ofad,
huelu ¿chumngelu* re huesaque ofad huli?
5 Tüfa hula feipihuaiñ
chem femafiñ tañi ofadentu:
entuñmayafiñ ti malal,
fei lüpümtucungeai.
Teifücayafiñ ñi cura malal,
fei pünocangeai.
6 Femcünuan ñi huelliletual ti mapu,
dapillngelayai ca cüdaungelayai azadon mu.
Apoleai chacai mu* ca huesa cachu mu.
Feipicünuafiñ pu tromü ñi nacümnoafiel mahun fei mu.
7 Pu Israel che fei tati ofadentu ñi nieel Chau Jehová Ñidolcülelu pu hueichafe mu,*
pu Judá huentru fei tati anümcangeelchi mapu quisu ñi piuqueyefiel.
Quisu maneluucülefui ñi müleal nor dungu,
huelu mülerpui re norngenochi dungu müten.
Maneluucülefui ñi müleal cümeque dungu,
huelu mülerpui eyütun”.
8 ¡Aungeai feiti pu che nüniefilu fentren ruca
ca tati pu nüniefilu fentren lelfün!
¡Chem no rume elcünulelquelafingün caquelu che,
fei engün müten müleingün feiti mapu mu!
9 Allcüfiñ ta Chau Jehová Ñidolcülelu pu hueichafe mu,
feipicünui fentren fütraque ruca cüme adngelu
llicafalngeai ñi chumlehuetun
ca huelliletuai.
10 Meli hectarea mu nielu ofadentu entungeai 22 litro* pulcu müten.
Ngan-ngeai 160 kilo fün,* huelu püramngeai 16 kilo* müten.
11 ¡Aungeai tati pu huitraquelu pulihuen mu ñi putual!
Pun mu amulequeingün pofolcaeliyu hula ti pulcu.
12 Tañi fiesta mu engün mülei arpa, dungulhue* nielu cuerda,
pandero, flauta ca pulcu.
Huelu raquiduamquelaingün Chau Jehová ñi femün mu
ca ngüneduamquelaingün ñi cüdahun tañi cuhu mu.
13 Tañi pu che quimlaeneu,
feimu presuyengeaingün ca mapu mu,
tañi pu yamfalque huentru* rume ngüñüleaingün
ca com ti troquiñche rume huihuleai.
14 Feimu ti Rüngan* doi alürupai,
nülacünui tañi hun, quimfal-lai tunte ñi puhun.
Rüfcünu nagaingün üye mu
Jerusalén ñi yamfalque che, ñi huaqueñcülechi troquiñche ca ti pu che rume fiestaquelu.
16 Chau Jehová Ñidolcülelu pu hueichafe mu püramyengeai tañi juician dungu mu.*
Chau Ngünechen, tati Lifngelu, tañi norngen mu pengelai ñi lifngen.
17 Pu cordero tañi mapu mu reque ütayaingün.
Pu ca cüpanche iyaingün huellilechi mülehue mu cheu ñi mülequefel motrilechi culliñ.
18 ¡Aungeai pu coilatuquelu! Tañi huelulcan ca tañi culpan* trarinieyu engün reque.
Quiñe culliñ reque feleingün trarilelu quiñe carreta mu, cheu rume huingüdyengei.
19 Feipiqueingün: “Matu cüdaupe,
matu fempe taiñ peafiel.
Huechutripape ñi ayünieel* Israel ñi Lifngechi Ngünechen,
femngechi taiñ quimafiel”.
20 ¡Aungeai tati pu feipiquelu ñi huesa dungungen ti cümeque dungu ca ñi cüme dungungen ti huesaque dungu!
Pelon piquefingün ti dumiñ, ca dumiñ piquefingün ti pelon.
Cochüi piquefingün ti cotrüngelu,* ca cotrüi piquefingün ti cochülelu.
21 ¡Aungeai tati pu quimcauquelu
ca pu troquiuquelu ñi nieel cüme raquiduam!
22 ¡Aungeai pu rume putufengelu
ca pu huentru quim reyülquefilu* chem ñi ngollilcachequen!
23 ¡Aungeai feiti pu lloulu cullitu ñi culpantucunoafiel ti huesa che
ca femquenofilu nor dungu tati pu norngechi che!
24 Chumngechi ti cütral lüpümquefi ti congilhue ca ti ancülechi cachu,
ca femngechi apümcangeaingün.
Tañi folil funanagai,
tañi rayen fill püle puhuai trufür reque.
Famentufingün* Chau Jehová ñi ley,* tati Ñidolcülelu pu hueichafe mu,
ca illamcafingün ñi chem pin Israel ñi Lifngechi Ngünechen.
25 Feimu Chau Jehová rume illcutufi* tañi troquiñche,
fei fampuhulai ñi cuhu fei engün meu tañi cutrancayafiel.
Fütraque huincul müllmüllaingün,
lachi pu che pod reque felehuetuai rüpü mu.
Rupan mu com tüfa, tünglai tañi illcun,doi mai fampuhulniefi ñi cuhu tañi cutrancacheal.
26 Püramcünufi quiñe orcon ñi peaeteu camapulechi troquiñche,
huiqueñfi* ñi cüpayal engün mülelu cheu ñi afpun ti mapu.
¡Ahuem! Charcharcülen cüpaingün.*
27 Quiñe no rume cansalelai ca mutrurquelai.
Quiñe no rume cüpa umaulai cam umaucülelai rume.
28 Com tañi flecha yungumcülei
ca com tañi arco pepicaucülei ñi ütrüftuafiel flecha.
Tañi pu cahuellu ñi huili yafülechi cura reque felei,
ca tañi pu rueda* amulei fütra cürüf reque.
29 Mürülqueingün* trapial reque,
hueque trapial reque mürülqueingün.
Huarülaingün, nüafingün ti culliñ,
yetuafingün, fei inei no rume montul-layayu.
30 Feichi antü huente ti culliñ mu mürülaingün*
chumngechi raracüquei ti lafquen.
Inei rume adquintufile ti mapu, peai ñi mülen dumiñ ca hueñancün,
pelon cütu dumiñnagi mülen mu ta tromü.