Isaías
8 Chau Jehová feipieneu: “Nüfinge quiñe fütra trafla, fei quiñe punzon mu huirintucunge fei mu: ‘Maher-Salal-Has-Baz’.* 2 Epu manelfalngechi che peai chem ñi huirintucungeel, fei ayülen quisu engu ñi huirintucuafiel chem tañi peel. Tüfa tati sacerdote Urías ca Zacarías, Jeberekías ñi fotüm”.
3 Fei cuduyu tañi domo iñchiu,* Chau Ngünechen ñi huerquen-ngelu. Niepüñeñi, fei choyüfi quiñe huentru püñeñ. Chau Jehová feipieneu: “Üituculelfinge Maher-Salal-Has-Baz. 4 Ti pichi huentru petu quim feipinole ‘chau’ ca ‘ñuque’, nüñmangeai Damasco ca Samaria ñi falinque fillem, fei yelelngeai ta Asiria ñi lonco ülmen”.
5 Chau Jehová ca huiño dungueneu, feipi:
6 “Tüfachi pu che famentufingün* Siloé* ñi tüngcülechi co
ca ayühuelqueyu engün Rezín ca Remalías ñi fotüm.
7 Feimu Chau Jehová huercüafi Asiria ñi lonco ülmen ca com tañi troquiñ hueichafe*
tañi lefcontuafiel engün.
Ti Leufü* ñi co reque feleaingün,
Tüfa alün-ngei ca nehuen-ngei,
apolquefi ñi huitrunco
ca mangiñmaquefi ina leufü.
8 Fei lefcontuafi ta Judá,
mangiñmayafi reque, rumeai fei mu, fei puhuai pel püle.
¡Ahuem, Emmanuel!*
9 Eimün, pu troquiñche, huesalcamün, huelu apümcangeaimün.
¡Allcütumün, com eimün, pu camapu cüpalu!
¡Pepicaumün tamün hueichayal, huelu apümcangeaimün!
¡Pepicaumün tamün hueichayal, huelu apümcangeaimün!
10 ¡Raquiduamaimün tamün chumal, huelu huechutripalayai!
¡Chem rume feipiafuimün, huelu cüme tripalayai!
¡Chau Dios iñchiñ mu mülei!*
11 Chau Jehová ñi nehuen-ngechi cuhu huente iñche mu mülei, fei feipieneu ñi inayentunoafiel chumngechi ñi miyahun tüfachi pu che. Feipieneu:
12 “Pu che feipile ‘Cüpa huesalcangeiñ’, eimün feipilayaimün ‘Cüpa huesalcangeiñ’.
Llicanielayafimün chem ñi llicaniefiel engün,
müllmüllcülelayaimün tüfachi dungu mu.
13 Chau Jehová Ñidolcülei pu hueichafe mu...,
quisu mai lifngelu troquiafimün,
quisu llemai rume yamnieafimün*
ca quisu ñi duam mu mülei tamün müllmüllcüleal”.
14 Quisu quiñe yamfal mülehue reque feleai,
huelu cafei quiñe cura reque feleai ñi trananagal
Israel ñi epu troquiñ ngünenielu,
quiñe fütra cura reque ñi mutrural.
Quiñe huachi ca quiñe llasu reque feleai
ñi nüngeal pu Jerusalén che.
15 Fentren engün mutruraingün, trananagaingün ca huesalcalehueaingün.
Nülcüconaingün huachi mu, fei nüngeaingün.
16 Racümcünufinge* ti chumpol chillca* cheu ñi huirintucungeel tañi dungu.
Sellacünufinge ti ley* nüucülelu tañi pu inaniequeteu meu.
17 Com piuque mu üngümcülean* ñi chumal Chau Jehová, maneluucülean fei mu. Quisu cañpüle adquintuniei ñi lelinoafiel Jacob ñi pu cüpanche.
18 ¡Tüfei! Iñche ca tañi pu yall ñi elueteu Chau Jehová feleiñ pengelün dungu reque ca afmatun dungu reque cüpalu Chau Jehová mu. Quisu Ñidolcülei pu hueichafe mu ca mülei Sion huincul mu.
19 Feipingeafuimün chi: “Quelluen piafimün pu ramtuquefilu pu la cam pu pelontuchequelu ñi cafcü dunguqueel* ca ñi adümfalngenon tañi feipin”. Huelu mongelechi che ngelai ñi ramtuafiel pu la ñi quelluaeteu. Doi mai mülei ñi ramtuafiel tañi Chau Dios. 20 Mülei ñi inaduamafiel ti ley ca chem ñi huirintucungeel ti chumpol chillca meu.
Fei engün ñi dungun nüucülenole tüfachi feipin meu, nielayaingün pelon. 21 Caque quiñeque engün cutrancaucülen ca ngüñülen mu rupayaingün tati mapu meu. Ngüñüleai ca illculeai,* adquintupürayai, fei malisiayafi tañi lonco ülmen ca tañi Chau Dios. 22 Fei hula adquintuafi ti mapu, fei peai ñi mülen hueñancün ca dumiñ, huesaque rupan ca fentren trucur, ngelai maneluhun ca pelon.