Isaías
7 Acaz ñi chau feita Jotán, ca tañi lacu* feita Uzías. Quisu lonco ülmencülelu Judá mu, Rezín ca Pécah lefcontufingu ta Jerusalén, huelu quisu pepi nülafi.* Rezín feita Siria ñi lonco ülmen ca Pécah feita Remalías ñi fotüm, Israel ñi lonco ülmen. 2 Fei David ñi pu cüpanche feipingei: “Siria quiñehui Efraín engu taiñ hueichayaeteu”.*
Fei trücohui* ñi piuque ta Acaz ca tañi pu che. Müllmüllingün chumngechi nengümcauquei fütraque anümca cürüf mu.
3 Fei Chau Jehová feipifi ta Isaías: “Füreneen, eimi ca tami fotüm Sear-Jasub* pingelu trafmefimu ta Acaz ina huitrunco püle. Feiti huitrunco puhui cheu ngülümngequei co huechuñ püle, ca mülei ti rüpü puulu cheu cüchaquei tacun pu che. 4 Feipifinge: ‘Cuñiutucuucülenge, tüngcülenge.* Pellquelayaimi ca llicalayafimi* tüfachi epu fitrulechi mamüll,* ñi rume illculen* Rezín, Siria ñi lonco ülmen, ca Remalías ñi fotüm. 5 Siria, Efraín ca Remalías ñi fotüm quintumequeingün chumngechi tami lefcontuaeteu. Feipirqueingün: 6 “Lefcontumeafiyiñ ta Judá, teifücayafiyiñ* ca nüafiyiñ.* Lonco ülmencünuafiyiñ Tabeel ñi fotüm”.
7 Tüfa ñi feipin ti Doi Fütra Ñidol Jehová:
“Tüfa cüme tripalayai,
rupalayai tati.
8 Damasco feita Siria ñi doi falin huaria,*
Rezín feita Damasco ñi lonco ülmen.
Efraín com apümcangeai 65 tripantu mu müten,
fei troquiñchengehuelayai.
9 Samaria feita Efraín ñi doi falin huaria,*
Remalías ñi fotüm feita Samaria ñi lonco ülmen.
Nehuencülenole tamün feyentun,
tamün troquiñche nehuen-ngelayai”’”.
10 Chau Jehová ca feipifi ta Acaz: 11 “Feipifinge tami Chau Dios Jehová ñi femal quiñe afmatun dungu. Cheu rume rupayafui, quiñe alüconcülechi mülehue ti Rüngan reque,* cam quiñe alüpüralechi mülehue ti huenu reque”. 12 Huelu Acaz feipi: “Femlayan, quintucaduamlayafiñ* ta Chau Jehová”.
13 Fei Isaías feipi: “Eimün, David ñi pu cüpanche, fürenemuchi, allcütumün. Deu afduamchequeimün. ¿Tuduamquelaimün am? ¿Ca cüpa afduammequefimün am ta Chau Dios? 14 Feimu llemai Chau Jehová pengelaimünmeu tüfachi afmatun dungu. Ti üllcha domo niepüñeñai, choyüai quiñe püñeñ, Emmanuel* pingeai. 15 Quim famentufile* huesaque dungu ca quim dullile cümeque dungu, feichi mu imequeai mantequilla ca miel.* 16 Ti pichi huentru petu quim famentunofile huesaque dungu ca petu quim dullinole cümeque dungu, com huellicünungetuai ñi mapu feiti epu lonco ülmen tami llicaniefiel. 17 Chau Jehová cutrancahun dungu cüpalai eimi mu, tami troquiñche ca tami chau ñi pu che mu, quisu huercüafi ta Asiria ñi lonco ülmen. Mülequelafui femngechi cutrancahun feichi Efraín püntütripalu* Judá mu.
18 Feichi antü Chau Jehová huiqueñai,* femngechi mütrümafi* pu pülü mülelu alü camapulechi huitrunco tripalu Nilo leufü mu Egipto meu. Ca mütrümafi pu abeja* mülelu Asiria mapu meu. 19 Cüpayaingün, mülenagpayaingün lilcülechi laf mapu meu,* rangiñ fütraque cura meu, chacai mu* ca cheu ñi pütocoquen pu culliñ.
20 Asiria ñi lonco ülmen fei tati cupilfe, cüpai Leufü* mapu püle, Acaz incatueyu. Feichi antü tüfachi huentru mu Chau Jehová cupilmayafi com ñi cal lonco, ñi cal chang ca tañi payun.
21 Feichi antü quiñe huentru montulafi quiñe pichi huaca ca epu ufisa. 22 Fentren lichi müleai, feimu ti huentru iyafi mantequilla. Com pu mülehuealu feiti mapu mu iyafingün mantequilla ca miel.
23 Feichi antü cheu ñi mülequefel 1.000 ofadentu falilu 1.000 troquiñ plata, re chacai müleai ca huesa cachu müten. 24 Pu huentru amule üyeu, yenieaingün arco ca flecha, ti mapu apoleai chacai ca huesa cachu mu. 25 Llicayaimi ñi mülen chacai ca huesa cachu, feimu fülconlayaimi* feiti huincul mu dapillngequefulu azadon mu. Üye mu re toro ütayai, pu ufisa pünocayai”.