Isaías
6 Feichi tripantu lalu ti lonco ülmen Uzías, pefiñ ta Chau Jehová anülelu quiñe rume alüpürachi ülmen huancu mu. Fente ñi alü puhun tañi tacun, apolfi com ti ngillatuhue ruca. 2 Huente quisu mu mülei serafin* huitralelu, caque quiñe engün cayu müpü niei. Epu müpü mu tacuniefingün quisuque ñi ange, cangelu epu müpü mu tacuniefingün quisuque ñi namun ca epu müpü mu müpüyahuingün.*
3 Nehuentu dungun mu hueluquentu feipihuingün:
“Lifngei, lifngei, lifngei Chau Jehová Ñidolcülelu pu hueichafe mu.*
Com ti mapu apolei tañi afmatufalchi pelon mu”.
4 Fente tañi nehuentu dungun engün, nengümcahui ti puerta ñi marco, ti ruca apolerpui fitrun mu.*
5 Fei feipin: “¡Aungean!
¡¿Rüfcünu lapelayan?!
Iñche culpafe chengen,* tañi feipin lifngelai.
Cheu ñi mülen iñche, tati pu che ñi feipin ca lifngelai.
Tañi nge mu pefiñ ti Lonco Ülmen, Chau Jehová Ñidolcülelu pu hueichafe mu”.
6 Fei quiñe serafin müpüyaulu fülcontupaeneu.* Tañi cuhu mu yeniei quiñe üicülechi ailen, quiñe tenaza mu enturquefi altar mu.* 7 Fei fampuhuli ti ailen iñche tañi hun mu, feipi:
“¡Tüfei! Tüfa topantucufi tami mellfü hun.
8 Fei allcün Chau Jehová ñi dungun, feipi: “¿Inei am huercüafun? ¿Inei am tayu huerquen-ngeai?”.* Fei feipin: “¡Tüfa tañi mülen! ¡Huercüen iñche!”.
9 Fei huiñoldungui:* “Amunge, feipifinge tüfachi pu che:
‘Allcütumequelmün rume,
loncontuculayafimün.
Adquintumequelmün rume,
quimürpulayaimün’.
10 Yafü piuquecünufinge tüfachi pu che,
tacuñmafinge tañi pilun engün
ca cerracünuñmafinge tañi nge.
Femngechi pelolayaingün tañi nge mu,
allcülayaingün tañi pilun mu,
ngüneduamlayaingün tañi piuque mu
ca huiñotulayaingün Chau Dios mu tañi tremolngetual”.*
11 Iñche ramtufiñ: “Ahuem, Chau Jehová, ¿tunteñmayai tüfa?”. Quisu huiñoldungui:
“Femngechi feleai teifünagle hula ti huaria, mülehuenole che üye mu
ca ruca mu no rume,
huesalcalele ca huelliletule ti mapu.
12 Femngechi feleai Chau Jehová camapu yetufile hula tati pu huentru
ca epe com ti mapu huelliletule.
13 Huelu ti mapu mu petu müleai quiñe pichi troquiñche,* fei huiño lüpümngeai. Ti mutrung reque feleai mülehuelu catrüngen mu quiñe fütra anümca cam quiñe coyam chi.* Quiñe yamfal* choyün* tripayai feitichi mutrung mu”.