Isaías
13 Isaías, Amoz tañi fotüm, quiñe afmatun dungu mu pengelelngei ñi juiciantucungeal Babilonia:
2 “Quiñe cura huincul mu huitracünuaimün quiñe orcon ñi peaeteu ti troquiñ hueichafe.*
Mütrümafimün,* cuhu mu maichiafimün.
Femngechi conaingün pu ülmenque huentru ñi conpeyüm mu.
3 Feiti ñi dullifiel, feipifiñ chem tañi chumal engün.
Trahulfiñ tañi pu hueichafe ñi pengelal tañi fütra illcun,*
fei ayühuingün ca mallmahuingün.
4 ¡Allcümün! ¡Pütrün che mülei mahuida mu!
¡Huaqueñcüleingün quiñe fütra troquiñche reque!
¡Allcümün! ¡Trününmequei pu gobierno ca fentren che fillque mapu mu cüpalu!
Chau Jehová Ñidolcülelu pu hueichafe mu
mütrümmequefi ti troquiñ hueichafe tañi hueichayal engün.
5 Quiñe camapulechi mapu mu,
cheu ñi fentepuhun ti mapu,
Chau Jehová cüpalei ca cüpalniefi tañi hueichahue ñi pengelal tañi illculen,
femngechi ñi huesalcayafiel com ti mapu.
6 ¡Aungeaimün, Chau Jehová ñi antü fülcülepai!
Feichi antü mu ti Com Nehuen Nielu apümcayafi com ñi mülen tamün mapu meu.
7 Feimu com pu che ñi cuhu nehuen-ngehuelayai
ca com pu huentru ñi piuque llihuai* fente tañi llicalen.
8 Tati pu che trencülcülehueingün* fente tañi pellquen.*
Cutrantupiuqueleingün ca cutrantuingün
quiñe domo reque petu choyümequelu.
Hueluquentu adquintuniehuingün llicalen mu.
Tañi ange mu engün quimfalcülei ñi trücoucülen ñi piuque.*
9 Chau Jehová ñi antü fülcülepai,
cutranpiuqueyechelayai ca fütra illculen mu cüpalei.
Llicafalngeai ñi chumcünuafiel feichi mapu
ca apümcayafi pu culpafe che* tiye mu.
10 Huenu müleyechi huangülen ca trapümcüleyechi huangülen*
pelontulayai.
Tripale ti antü, dumiñcüleai
ca ti cüyen aloflayai.
11 Juiciantucuafiñ mapu müleyechi pu che ñi huesaque femün mu
ca pu huesaque che ñi culpan meu.*
Fentecünuafiñ ñi mallma piuquengen pu checahun-ngelu
ca tañi mallma piuquengen mu engün yehuelcayafiñ pu cutrancachequelu ñi ngünenien mu.
12 Lifngechi oro* pichilei, huelu doi pichincünuafiñ pecan huentru.
Ofir mu cüpachi oro pichilei, huelu doi pichincünuafiñ tati pu che.
13 Iñche, Chau Jehová Ñidolcülelu pu hueichafe mu, nengümcayafiñ ti huenu.
Puule ti antü ñi pengelal tañi rume illculen, nengümcayafiñ ti mapu.
Fei fente tañi illculen, ti mapu tripayai cheu tañi elcünungemum.
14 Quiñe gacela reque inantucungelu cam quiñe quechan ufisa reque nienolu inei tañi trapümaeteu,
ca femngechi caque quiñeque eimün huiñotuai tañi pu che meu,
caque quiñeque eimün lefmahuaimün, fei huiñotuaimün tamün mapu meu.
15 Inei rume perumeeliyu pu caiñe, huaiqui mu langümngeai.
Fütra cuchillo mu langümngeai inei rume nüngele.
16 Fei engün ñi adquiñ mu tañi pu yall* trañmangeaingün, fei catrücangeaingün.
Conturucangeaingün
ca nüntucañmangeai tañi pu domo.
17 Huercüafiñ pu Media che tañi hueichayafiel engün,
pu Media che falinolu troquifingün ti plata
ca duamtulafingün ti oro.
18 Tañi arco mu apümcayafingün pu huechequeche,
cutranduamyelayafingün pu pichiche
ca cutranpiuqueyelayafingün pichiqueche.
19 Babilonia doi afmatufalngei caquelu gobierno meu,
pu Caldea che* mallmauqueingün fente ñi cüme adngen tañi huaria.
Huelu felehuetuai Sodoma ca Gomorra reque Chau Dios ñi apümcafiel.
20 Chumcaunorume mülehuelayai che tiye mu,
rumel huelliletuai.
Quiñe Arabia che no rume tuculayai ñi tolto ruca* tiye mu.
Pu camañfe* yelayafingün ñi capüra ca ufisa tañi ürcütual.
21 Tiye mu tranacünuhuaingün auca culliñ,*
com ti ruca apoleai pequen mu.
Tiye mu müleai choique
ca auca capüra* huall püle rincücantuyahuaingün.
22 Tañi alüpürachi ruca mu auca culliñ huaqueñcüleaingün,
pu auca trehua* müleaingün tañi afmatufalchi ruca mu.
Fülcülei* ti antü tañi castigangeal Babilonia, raquiantünielngei”.