Isaías
23 Tüfachi juician dungu feipicünulelngei ta Tiro:
¡Eyütumün pu huentru mülelu Tarsis ñi farcu mu!
Cheu ñi acuquen farcu teifücalei, pepi conün-ngelai.
Kitim mapu mu quimeldungungepai tüfachi dungu.
2 Ñücüfcülemün eimün, pu mülelu lafquen mapu mu.
Pu negociaquelu Sion mu noingün ti lafquen mu,
fei engün riculeimünmeu.
3 Sihor* tañi fillque fün ca chem tañi cosechangeel Nilo mu fill lafquen mu rupai,
fei Tiro huehui plata tüfa ñi duam meu,
caquelu troquiñche cafei.
4 Ahuem, Sidón, quiñe nehuen-ngechi huariangeimi deumangelu lafquen meu,
huelu yehueaimi, ti lafquen feipilu cai:
“Iñche choyülan, feimu cutrancaulan.
Tremümlan huecheque huentru ca üllchaque domo”.*
5 Tati pu che allcülu chem ñi rupayal ta Egipto, trücohui ñi piuque.*
Fei ca femngechi duamcüleai tati pu che allcüle chem ñi rupayal ta Tiro.
6 ¡Noaimün ti lafquen mu ca amumün Tarsis mu!
¡Eyütumün eimün, tati pu mülelu lafquen mapu mu!
7 ¿Tüfa am tamün huaria? Üyeu mülefui fentren ayühun cuifi meu, hue deumangelu müten.
Tañi pu che ca mapu mu amuquefuingün ñi mülepual.
8 ¿Inei am ta dulli ñi femngechi femngeal ta Tiro?
Tiro elfalcünuquefui inei tañi lonco ülmen-ngeal.
Tañi pu negociaquelu principengefui
ca tañi pu negociante püramyengequefui huall mapu mu.
9 Chau Jehová Ñidolcülelu pu hueichafe mu* dulli ñi femngeal ta tüfa.
Femngechi fentecünuñmayafi tañi mallmahun ñi cüme adngen meu,
ca yehuelcayafi tati pu püramyengequelu huall mapu mu.
10 Ahuem, eimün pu Tarsis che, chumngechi Nilo leufü mangiñmaquefi ti mapu, eimün ca femngechi com püle puhuaimün tamün mapu mu.
Deu ngehuelai cheu ñi müleal pu farcu.
11 Quisu fampuhulniefi ñi cuhu lafquen mu,
nengümcaquefi fillque gobierno.
Chau Jehová teifücafalfi feitichi mülehue cheu ñi ellcauquen che* Fenicia mu.
12 Quisu feipi: “Ahuem, eimi, Sidón ñi üllcha püñeñ,*
tati cutrancangelu, ayüuhuelayaimi.
Huitrapürange, notunge lafquen mu ca amunge ta Kitim mu.
Huelu üye mu no rume tüngcülelayaimi”.*
13 ¡Ngüneduamfimün pu caldeo che ñi mapu!
Tüfachi troquiñche elcünufi ti mapu ñi müleal pu culliñ huellin mapu mu* miyauquelu.
Asiria ta femlai.
Deumaingün alüpürachi ruca reque ñi lefcontuafiel.
Trafocafingün tañi fütraque ülmenque ruca,
fei teifülehuei.
14 Eyütumün, pu che mülelu Tarsis ñi farcu mu,
apümcangei tamün ellcaupeyüm.
15 Feichi antü Tiro ngüyünentungeai* 70 tripantu mu, tunten tripantu ñi mongelequen quiñe lonco ülmen. Rupale feiti 70 tripantu, Tiro rupayai ñi chem pin ti pod domo* ñi ülcantun:
16 “Eimi domo pod mongen yenielu, ngüyünentungeimi.* Nüfinge quiñe arpa, fei miyaunge huaria püle.
Cüme dungulfinge tami arpa,
entunge fentren ülcantun.
Femngechi raquiduamtucungetuaimi”.
17 Rupale 70 tripantu Chau Jehová huiño raquiduamtucuafi ta Tiro. Fei Tiro quiñe pod domo reque* huiño cullingeai tañi cüdahueltuafiel com pu gobierno ñi mülen mapu meu. 18 Huelu chem tañi huehual ca tañi cullingeal püntücünulelngeai* ta Chau Jehová. Guardacünungelayai ca ngülümcünungelayai. Tañi cullitu yelelngeai tati pu mülelu Chau Jehová ñi adquiñ meu. Fei engün iyaingün, tuduamaingün ca ülmenque tacun tucutuhuaingün.