Isaías
17 Tüfachi juician dungu feipintuculelngei ta Damasco:
“¡Tüfei! Damasco huariangehuetulayai,
com teifücalehueai.
2 Aroer ñi pu huaria quisucünungeaingün,
üye mu pu quechan ufisa ürcütuaingün,
inei no rume llicalcalayayu.
3 Nehuen-ngechi huaria ngehuelayai Efraín mu.
Damasco ngüneniehuelayai.
Pu mülehuealu Siria mu
afmatungehuelayaingün pu Israel che reque”* feipi Chau Jehová Ñidolcülelu pu hueichafe mu.*
4 “Feichi antü Jacob nehue afmatungelayai,
tañi tremolechi cuerpo* tronglinagai.
5 Tüfachi antü trürümngeafui feichi cosechangelu ca ñimitungelu* lonco cachilla.
Trürümngeafui feichi üñiftungelu reque Refaím laf mapu meu.
6 Quiñeque sofralu müten mülehueai.
Femngechi rupaquei cupafcangelu ti olivo anümca,
epu, cüla afülechi aceituna müten mülehuei ti doi alüpüralechi rou meu,*
meli, quechu müten mülehuei cümeque rou mu doi hulquelu” feipicünui Chau Jehová, Israel ñi Chau Dios.
7 Feichi antü ti huentru adquintuafi tañi deumaeteu, puhulafi ñi quintun Israel ñi Lifngechi Ngünechen meu. 8 Adquintulayafi fillque altar ñi deumael quisu ñi cuhu mu. Puquintulayafi quisu tañi deumael: tati orcon mamüll ñi poyengequeel* ca ti altar cheu ñi lüpümngequen incienso.*
9 Feichi antü tañi nehuen-ngechi huaria quiñe huellilechi mülehue reque feletuai mahuidantu mu,
quiñe elcünungeelchi chamida reque pu Israel che ñi adquiñ mu.
Huellilechi mülehuengetuai.
10 Ngüyünentufimi* ta Chau Dios tami montulqueteu.
Quiñe cura reque cuñiutucuqueimu, huelu raquiduamtucunielafimi.
Feimu cümeque tucucan nieimi,
huelu rangiñ mu tucuimi quiñe ca mapu dios ñi anümca.
11 Antü mu malalmaquefimi tami tucucan cuñiutucun mu,
pulihuen mu femqueimi ñi choyüal* tami fün.
Huelu ti cosecha ñamnagai cutrancülelmi cam rume huesa cutrantupiuquelelmi.
12 ¡Allcütumun! ¡Fentren troquiñche pofolcaumequeingün!
Illculechi* lafquen reque feleingün.
¡Pu troquiñche huaqueñcüleingün!
Allcüngequeingün nehuen-ngechi co reque raracümequelu.
13 Pu troquiñche allcüngeai fentren raracülechi co reque.
Chau Dios illcutudunguafi, fei camapu lefmahuaingün.
Lefmahuaingün pinu reque* ñi yequeteu cürüf mülen mu mahuida meu,
ancülechi troltro reque ñi yequeteu fütra cürüf.
14 Nagantü mu müleai llican dungu.
Petu hunnole, ngehuetulayaingün.
Femngechi rupayaingün taiñ pu huehueteu,
ca femngechi feleaingün taiñ pu müntuñmaeteu* taiñ fillem.