Isaías
36 Ti lonco ülmen Ezequías yeniefui 14 tripantu tañi ngünenieel. Feichi mu Asiria ñi lonco ülmen, Senaquerib pingelu, lefcontumefi ca nüfi Judá ñi fillque huaria nielu fütra cura malal.* 2 Fei hula Asiria ñi lonco ülmen huercüfi ti rabsaque.* Cafei Lakís huaria mu huercüfi fentren hueichafe* ñi amual Jerusalén mu, cheu ñi mülen ti lonco ülmen Ezequías. Mülepuingün ina huitrunco püle. Feiti huitrunco puhui cheu ngülümngequei co huechuñ püle, ca mülei ti rüpü mu puulu cheu ñi cüchaquen tacun pu che. 3 Fei Eliaquim, Sebná ca Joá trafmefingün ta rabsaque. Eliaquim, Hilquías ñi fotüm, adcünuquefui ti lonco ülmen ñi ruca. Sebná fei tati secretario. Joá, Asaf ñi fotüm, huirintucuquefui chem ñi rupan ti troquiñ mapu mu.
4 Feimu ti rabsaque feipifi engün: “Fürenemuchi, feipiafimün ta Ezequías: ‘Tüfa ñi feipin ti fütra lonco ülmen, Asiria ñi lonco ülmen: “¿Chemu fente maneluucüleimün? 5 Eimi feipimi ‘Nien quimün ca pepiluhun tañi hueichayal’. Huelu tami feipin falilai tati. Eimün, ¿inei mu maneluhuimün tamün cüpa caiñetumuafiel? 6 Eimi maneluucüleimi Egipto tami quelluaeteu. Tüfa quiñe huatrolechi* rüngi reque felei. Quiñe che recüluule tüfa mu, dipoconai* ca chüngarconai tañi cuhu mu. Ti Faraón, Egipto ñi lonco ülmen, femngechi femquefi com pu maneluulu quisu mu. 7 Eimün feipimün ‘Maneluuqueiñ taiñ Chau Ngünechen Jehová mu’. Huelu, ¿Ngünechen mai ngen-ngefui pu yamfal mülehue* ca tati fillque altar ñi entuel Ezequías? Cafei Ezequías feipifi ta Judá ca Jerusalén ‘Tüfachi altar mülelu Jerusalén mu mülei tamün pochongnagal’,* ¿felei no am?”’. 8 Feimu eimi ca tañi ñidol, Asiria ñi lonco ülmen, eldungucünuaimu: eluayu 2 mil cahuellu nielmi fentren che ñi püracahuelluafiel. 9 Eimi maneluhulmi Egipto ñi carretela* ca tañi pu püracahuellulelu mu, ¿chumngechi eluafimi ñi huiño huitrautual quiñe gobernador rume ñi nieel tañi ñidol, tati doi illamfalngelu tañi pu cüdaufe mu? 10 ¿Cüpapen mai ñi apümcayafiel tüfachi mapu, fei tañi feipinoeteu Jehová? Jehová ta feipieneu: ‘Lefcontuafimi feichi mapu ca apümcayafimi’”.
11 Rupalu tüfa, Eliaquim, Sebná ca Joá feipifingün ti rabsaque: “Fürenemuiñ, arameo quehun mu* dungumuaiñ iñchiñ, tami pu cüdaufe, iñchiñ adümquefiyiñ. Dungumuquiliyiñ pu judio ñi quehun dungu mu, ca allcütumequei pu che mülelu ti fütra cura malal mu”. 12 Huelu ti rabsaque feipi: “Tañi ñidol, ¿huercüpeneu mai tamün feipiafiel tüfachi dungu eimün ca tamün ñidol müten? ¿Cümenoafulu ñi allcütual pu anülelu fütra cura malal mu? Tüfa engün iyai tañi me ca pütocoai tañi huilleñ quiñentrür eimün”.
13 Ti rabsaque huitrapürai ca huirari pu judio ñi quehun dungu mu: “¡Allcütumün ñi feipin ti fütra lonco ülmen, Asiria ñi lonco ülmen! 14 Tüfa tañi feipin ti lonco ülmen: ‘Eluulayaimün tamün ngünencayaeteu Ezequías. Fei montul-layaimünmeu. 15 Tamün maneluhual Jehová mu Ezequías feipiaimünmu: “Chau Jehová rüf montulaiñmu. Asiria ñi lonco ülmen hueulayafi tüfachi huaria”. 16 Huelu allcütulayafimün ta Ezequías. Tüfa tañi feipin Asiria ñi lonco ülmen: “Caiñetumuhuelayan ca eluumün tamün hueungeal. Femngechi com eimün iyaimün ti fün hulquelu tamün anüm ofad ca tamün higuera. Cafei pütocoaimün quisu tamün rünganco mu.* 17 Fei cüpali hula, yehuaiñ quiñe mapu mu tamün mapu reque felelu. Feichi mapu hulquei quetran, hue pulcu, cofque ca anüm ofad. 18 Eluulayaimün tamün ngünencayaeteu Ezequías feipilu ‘Chau Jehová montulaiñmu’. Pu troquiñche ñi dios montul-lafingün tañi mapu Asiria ñi lonco ülmen tañi cuhu mu, ¿felelai? 19 ¿Cheu mülei Hamat ca Arpad ñi pu dios? ¿Cheu mülei pu dios ñi nieel Sefarvaim? ¿Montulfingün am ta Samaria iñche tañi cuhu mu? 20 Tüfachi fillque troquiñche ñi pu dios, ¿montulpefi mai tañi mapu iñche tañi cuhu mu? Fei Jehová, ¿montulpeafi mai ta Jerusalén iñche tañi cuhu mu?”’”.
21 Huelu fei engün dungulai, chem pilaingün rume. Ti lonco ülmen feipifilu cai engün “Huiñoldungulayafimün”.* 22 Fei Eliaquim, Sebná ca Joá huichafcafingün* ñi tacun, pemefingün ta Ezequías, ca feipifingün chem ñi feipin ti rabsaque. Eliaquim, Hilquías ñi fotüm, adcünuquefui ti lonco ülmen ñi ruca. Sebná fei tati secretario. Joá, Asaf ñi fotüm, huirintucuquefui chem ñi rupan ti troquiñ mapu mu.