Isaías
50 Tüfa ñi feipin Chau Jehová:
“Feipifiñ tamün ñuque ñi amutual, ¿cheu mülei ti huirintucun ñi elufiel tañi hudayafiel?
¿Defelu am iñche, feimu fendehuiyiñ?
Tamün huelulcan mu cai fendengeimün
ca tamün culpan mu* feipingei tamün ñuque ñi amutual.
2 Fei cüpalu iñche, ¿chumngelu* inei no rume ngerquelai?
Mütrümlu* iñche, ¿chumngelu inei no rume huiñoldungulai?*
¿Nehuen-ngelai am tañi cuhu ñi montulcheal?
¿Nielan am ta nehuen tañi lifrenentucheal?
Mülenolu co funaquei pu challhua
ca laquei engün huihun mu.
3 Dumiñ mu tacucünufiñ ti huenu
ca curü tacun reque tuculelfiñ”.
4 Doi Fütra Ñidol Jehová quimeltueneu ñi chem pial,
femngechi cümeque dungun mu ñi huiñoldungulelafiel tati ürcülelu.
Quisu nepelqueneu fill pulihuen,
trepelqueneu ñi allcütual pu quimeltumequengelu reque.
6 Hulcünun ñi furi ñi cupafcayaeteu tañi pu caiñe
ca hulcünun ñi ange ñi entuñmayaeteu engün tañi payun.
Ellcacünulan* tañi ange tañi pu illamcamequeteu ca tofcütumequeteu.
7 Huelu ti Doi Fütra Ñidol Jehová quelluaeneu,
feimu illamcangelu troquiulayan,
nehuencünuhun quiñe yafülechi cura reque
ca quimün tañi yehuelcangenoal.
8 Fülcülei* inei ñi nor che pieteu.
¿Inei am dalluntucuaeneu?*
Puñmaucüleayu.*
¿Inei juiciantucuafeneu?
Fülconpape.
9 Ti Doi Fütra Ñidol Jehová quelluaeneu.
¿Inei am culpantucuafeneu?
Fei engün quiñe huesa tacun reque feleaingün
piru ñi iqueteu.
10 ¿Inei am eimün mu yamniefi* ta Chau Jehová
ca allcüquefi ñi feipin tañi cüdaufe?
¿Inei am miyahurquei fütra dumiñ mu, ngenon mu pelon?
Maneluupe Chau Jehová ñi üi mu ca recüluupe tañi Chau Dios mu.
11 Com eimün, tati pu üyümmequefilu ti cütral
ca femcünumequelu ñi püteftripayal,*
miyaumün tamün cütral ñi pelon mu
rangi tati püteftripamequelu.
Femngechi cutrancahuaiñ:
tranalehueaimün rume cutrantun mu.