Isaías
63 Cüpalei Edom mu, Bozrá huaria meu,
fillque huilüfcülechi color* niei tañi tacun.
Afmatufalchi tacun yeniei.
Fütra nehuen mu trecalei.
¿Inei am chi?
“Iñche tati, nor dunguquelu,
ca tati nielu nehuen ñi montulcheal”.
2 ¿Chumngelu* quelülei tami tacun?
Ti pünocaquelu ofad ñi tacun reque felei, ¿chumngelu chi?
3 “Iñche quisu pünofiñ ti ofad.
Chem che no rume mülerquelai iñche engu.
Tañi illculen mu* pünocanierquefiñ.
Fente tañi illculen meu fentecünulan ñi pünomequefiel.
Tañi tacun pütefmangei* quisu tañi mollfüñ meu,
com podi.
4 Eluhun tañi piuque mu ñi huiñoleltuafiel ñi femün tañi pu caiñe.
Acui chi tripantu ñi ngillanentuafiel tañi pu che.
5 Adquintun, huelu inei no rume mülelai ñi quelluntucual.
Afduamcülehuen, inei no rume eluulai ñi quellual.
Iñche tañi lipang mu montulchen,*
ca tañi illcun nehuentucueneu.
6 Tañi illcun mu pünocafiñ fillque troquiñche,
ngollilcafiñ reque tañi illcun mu.
Hutrulnacümfiñ* tañi mollfüñ engün mapu meu”.
7 Chau Jehová rume füreneiñmu,
fentren cümeque dungu femfi pu Israel che.
Feimu dunguan chumngechi Chau Jehová pengelcünui ñi rume piuqueyechen*
ca dunguan Chau Jehová ñi femün tañi püramyengeal.
8 Quisu ta feipi: “Rüfcünu fei engün iñche ñi pu chengeingün, tañi pu yall* püntütripanoalu* iñche mu”.*
Feimu montulchefengerpui fei engün meu.
9 Cutrantupiuquelelu engün, quisu inaye cutrantupiuquei.
Quisu tañi huerquen* montulfi engün.
Tañi piuqueyefiel ca tañi cutranpiuqueyefiel mu ngillanentufi engün.
Huitrañpüramfi ca cuñiutucufi engün com feitichi tripantu mu.
10 Huelu feyentulaingün ca hueñancülfingün ta Chau Dios chaftufilu engün tañi nehuen.
Feimu caiñengerpui quisu engün meu
ca hueichafi engün.*
11 Fei hula raquiduamtucuingün cuifi rupachi tripantu mu
feichi mongelelu Moisés, Chau Dios ñi cüdaufe.
Feipingün: “¿Cheu mülei tañi nentueteu* lafquen mu quiñentrür tañi pu che ñi pu camañfe engün?*
¿Cheu mülei tati elufilu ñi nehuen?
12 ¿Cheu mülei tati quelluntucufilu ta Moisés tañi fütra nehuen mu?
¿Cheu mülei tati hudamentufilu ti co fei engün ñi adquiñ mu,
femngechi turpu ñi ngoimanentungenoal* tañi üi?
13 ¿Cheu mülei tati rulpafilu engün illculechi co mu?*
Mutrurlaingün rume ñi miyahun mu
quiñe cahuellu reque miyaulu laf mapu mu.*
14 Chau Jehová tañi nehuen mu ürcütui engün
pu culliñ reque naglu laf mapu mu ñi ürcütual”.
Femngechi adniefimi tami pu che
ñi püramyengeal tami ayüfal üi.
15 Tami mülehue alüpüralei, yamfali* ca afmatufali.*
Nagquintunge huenu mu cheu tami mülen, fei ngüneduamnge.
¿Chumngelu duamtumuhuequelaiñ? ¿Chumngelu chumquelaimi tami nehuen mu?
¿Cheu mülei tami rume piuqueyechen ca tami cutranpiuqueyechen?
Nünacümfimi tati.*
16 Eimi iñchiñ taiñ Chau.
Abrahán quimlayafeiñmu,
Israel quimhuetulayafeiñmu chi,
huelu eimi iñchiñ taiñ Chau, ahuem, Jehová.
Cuifingetui tami ngillanentuniemuquefiel.
17 Ahuem, Chau Jehová, ¿chumngelu elcünumuiñ taiñ famtripayal tami rüpü mu?
¿Chumngelu elcünumuiñ taiñ trencül piuquecünuhual,* fei tami yamnoafiel?
Huiñotunge fente tami piuqueyefiel tami pu cüdaufe,
pu troquiñche tami ngen-ngeel.
18 Tami lif troquiñche pichiñma ngen-ngeingün ti mapu mu tami elufiel.
Taiñ pu caiñe pünocafingün tami yamfal mülehue.
19 Rume cuifingetui taiñ felen feichi pu che reque turpu tami ngüneniequenofiel,
feichi pu che reque turpu yenienofilu tami üi.