2 Juan

1 Iñche, ti füchache,* huirintuculelfiñ tüfachi carta tati dullin papai ca tañi pu püñeñ. Rüf piuqueyefiñ engün, iñche müten no, cafei com pu quimürpufilu ti rüf dungu. 2 Piuqueyefiñ engün tati rüf dungu ñi duam mu. Taiñ piuque mu mülei ti rüf dungu, fei rumel mülecayai. 3 Taiñ Chau Ngünechen ca tañi Fotüm Jesucristo eluaiñmeu ti rüf quimeltun ca tati piuqueyehun. Fei engu rume cutranpiuqueyeiñmeu, füreneaiñmeu ca eluaiñmu cüme felen.

4 Quimün tami pu püñeñ ñi miyahun tati rüf dungu mu chumngechi feipieiñmeu taiñ Fütra Chau, feimu rume ayühun. 5 Feula mai llellipueyu papai taiñ hueluconque piuqueyehual. Huirintuculel-laeyu quiñe hue huercün dungu. Ellaca mu deu llohuiyiñ tüfachi dungu. 6 ¿Chumngechi pengelaiñ piuqueyehun? Inanieñmayafiyiñ tañi huercün dungu. Chumngechi allcütuimün ellaca mu, tüfa tati huercün dungu: rumel pengelqueaimün piuqueyehun. 7 Mapu mu mülei fentren ngünencachefe, feichi pu che feyentuquelaingün Jesucristo ñi cüpan huentru reque. Fei tati ngünencachefe ca ti caiñetuquefilu ta Cristo.

8 Cuñiutucuhuaimün, femngechi ñamümlayafimün chem taiñ nierpuel yafüluhun mu. Cafei llohuaimün com ti cümeque dungu tamün nieleteu Chau Ngünechen. 9 Chau Ngünechen ayüquelafi tati inaquenolu Cristo ñi quimeltun ca quimeltuquelu caque dungu. Huelu taiñ Fütra Chau ca tañi Fotüm ayüquefi tati inaniefilu Cristo ñi quimeltun. 10 Puule eimün meu quiñe che caque dungu quimeltuquelu, lloulayafimün ruca meu, chalilayafimün rume. 11 Tati chalifilu feichi che culpaconquei* tañi huesaque femün meu.

12 Nien fentren dungu tamün huirintuculelafiel, huelu cüpa feipiulayiñ papel ca tinta meu. Doi mai ayünien tamün pemeafiel, fei cüme nütramcahuaiñ, femngechi rume ayüucüleaimün.

13 Lemoria* pieimu tami lamngen ñi pu püñeñ, tati dullin domo.